Si ou maryaz i pros pour kase

1, 2. Ler en maryaz i dan problenm, ki kestyon ki devret ganny demande?

AN 1988, en madanm Italyen apele Lucia ti dan en gran depresyon.a Son maryaz ti pe kase apre dis an ki zot ti’n marye. Plizyer fwa, i ti’n esey rekonsilye avek son mari, me keksoz pa ti’n mars byen. Alors i ti separe avek son mari akoz zot ti tro diferan e i ti vwar li bezwen elve son de fiy li tousel. Ler i mazin sa letan, Lucia i rakonte: “Mon ti konvenki ki napa nanryen ki ti pou kapab sov nou maryaz.”

² Si ou pe rankontre problenm dan ou maryaz, ou kapab konpran ki mannyer Lucia ti santi. Petet ou maryaz i dan problenm e ou pe mazinen si i ankor kapab ganny sove. Si sa i leka, ou pou trouv li itil pour konsider sa kestyon: Eski mon’n swiv tou bann bon konsey ki Bondye in donnen dan Labib pour fer mon lavi maryaz reisi?​—Psonm 119:105.

3. Kantmenm divors in vin popiler, ki reaksyon ki’n ganny obzerve parmi bokou dimoun ki’n divorse ek zot fanmiy?

³ Ler problenm ant mari ek madanm i vin grav, i paret ki kite i keksoz pli fasil pour fer. Bokou pei in eksperyans en ogmantasyon sokan dan fanmiy kase. Kantmenm sa, bann letid ki’n ganny fer resaman i endike ki en gran poursantaz zonm ek fanm ki’n divorse i regrete ki zot maryaz in kase. En gran kantite zot i soufer avek plis problenm lasante fizik oubyen mantal, ki sa bann ki kontinyen reste ansanm. Souvan pour plizyer lannen apre, bann zanfan ki zot paran in divorse i konfize e zot pa santi zot zwaye. Paran ek zanmi sa fanmiy kase i osi soufer. Ki mannyer Bondye, Loter maryaz, i vwar sa sitiasyon?

4. Konman ki bann problenm dan en maryaz i kapab ganny rezourd?

⁴ Parey bann sapit avan in fer remarke, Bondye ti anvi ki maryaz i dir pour lavi. (Zenez 2:24) Alors, akoz en kantite maryaz i kase? Sa i pa en keksoz ki ariv en sel kou. Laplipar-di-tan i annan bann siny ki endik son larive. Bann pti problenm dan en maryaz i kapab vin deplizanpli pli gro ziska ki zot paret enposib pour rezourd. Me si sa bann problenm i ganny rezourd atan avek led Labib, bokou maryaz i kapab ganny sove.

FODRE REZONNAB

5. Ki realite ki bann dimoun marye i bezwen aksepte dan zot lavi maryaz?

⁵ En keksoz ki parfwa kree problenm se bann ekspektasyon ki pa rezonnab ki enn oubyen tou le de dimoun marye i kapab annan. Bann liv zistwar lanmour, magazin popiler, progranm televizyon, ek film i kapab kree bann ekspektasyon ek rev ki lwen avek realite lavi. Ler sa bann rev pa vin vre, en dimoun i kapab santi ki i’n ganny tronpe, i pa satisfe, e i menm ankoler. Me konman ki de dimoun enparfe i kapab trouv lazwa dan zot lavi maryaz? I demann bokou zefor pour kapab reisi.

6. (a) Ki pwennvi ekilibre Labib i donnen lo maryaz? (b) Nonm detrwa rezon ki anmenn dezakor dan maryaz.

⁶ Labib i pratik. I rekonnet ki maryaz i anmenn lazwa, me i osi averti ki bann ki marye ‘pou ganny problenm dan zot lavi.’ (1 Korentyen 7:28) Parey nou’n deza fer remarke, tou le de dimoun i enparfe e zot annan tandans pour fer pese. Zot mantalite ek santiman e osi lafason ki zot in ganny elve i diferan. Parfwa, bann koup pa tonm dakor lo bann size parey larzan, zanfan, ek boper ek belmer. Napa ase letan pour fer keksoz ansanm e bann problenm seksyel i osi kapab anmenn dezakor.b I pran letan pour tret sa bann size, me pran kouraz! Laplipar koup i arive sirmont sa bann problenm e tonm dakor avek kanmarad lo solisyon pour zot problenm.

DISKIT BANN DEZAKOR

7, 8. Ki Labib i ankouraz bann koup pour fer kan i annan en malantandi antre zot oubyen kan enn in bles lot?

⁷ Bokou i vwar li difisil pour reste kalm ler zot diskit bann keksoz ki’n bles zot, bann malantandi, oubyen bann febles personnel. Olye dir fransman: “Mon santi ki ou pa konpran mwan,” en msye ouswa en madanm i kapab vin en pe ankoler e egzazer sa problenm. Bokou pou dir: “Ou konn zis ou,” oubyen, “Ou pa kontan mwan.” Vi ki sa lot pa anvi fer diskisyon, i kapab pa reponn.

⁸ En pli bon fason fer se pour swiv sa konsey Labib: “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar.” (Efezyen 4:26) Kan zot ti pe al selebre zot 60 tyenm lanniverser maryaz, en koup marye ki’n viv ere ansanm, ti ganny demande kwa ki’n ed zot maryaz reisi. Sa mari ti dir: “Nou ti aprann pour pa al dormi avan ki nou rezourd nou bann dezakor, menm bann pli pti dezakor.”

9. (a) Dapre Labib, ki sa laspe dan kominikasyon ki tre enportan? (b) Ki en msye ek en madanm marye i souvan bezwen fer, menm si i demann kouraz ek limilite pour fer sa?

⁹ Kan en mari ek en madanm pa tonm dakor, zot tou le de zot bezwen “pare pou ekoute, me pran letan avan koze, avan pran lakoler.” (Zak 1:19) Apre ki zot in ekout kanmarad atantivman, zot tou le de zot kapab vwar li neseser pour demann leskiz. (Zak 5:16) Fodre annan limilite ek kouraz pour dir senserman, “Eskize mon’n bles ou.” Me rezourd bann dezakor dan sa fason i ed en koup marye en kantite. I pa pou zis rezourd zot bann problenm me i osi devlop en lafeksyon ek en lentimite ki pou fer zot trouv plis plezir dan konpanni kanmarad.

RANPLI OU DEVWAR KONZIGAL DAN LAVI MARYAZ

10. Ki mezir proteksyon ki Pol ti konsey bann Kretyen Korent pour pran ki kapab aplik pour en Kretyen ozordi?

¹⁰ Kan zapot Pol ti ekrir bann Korentyen, i ti konsey zot pour marye “pour rezon tantasyon limoralite.” (1 Korentyen 7:2) Sa lemonn ozordi i pli move, oubyen menm pli pir ki ansyen Korent. Bann topik imoral ki bann dimoun i koz lo la ouvertman, bann fason sanze endesan, ek bann zistwar ki eksit bann move dezir dan bann magazin, liv, lo televizyon, ek sinema, tousala i kontribye pour eksit bann lapeti seksyel ki pa apropriye. Pour bann Korentyen ki ti pe viv dan en lanvironnman koumsa, zapot Pol ti dir: “Vomye zot marye ki zot brile avek pasyon.”​—1 Korentyen 7:9.

11, 12. (a) Ki en mari ek en madanm i drwa kanmarad, e dan ki leta lespri ki sa i devret ganny fer? (b) Si en koup pa ranpli zot devwar konzigal pour en pe letan, ki mannyer sa sitiasyon i kapab ganny trete?

¹¹ Pour sa rezon ki Labib i demann bann Kretyen ki’n marye: “En mari i devret ranpli son devwar konman mari anver son madanm e demenm en madanm i devre fer parey anver son mari.” (1 Korentyen 7:3) Remarke ki lanfaz i ganny mete lo donnen, non pa lo demande. Relasyon entim dan en maryaz i vreman satisfezan si sakenn i enterese avek byennet kanmarad. Par egzanp, Labib i demann bann mari pour tret zot madanm “an akor avek konnesans.” (1 Pyer 3:7, NW) Sa i sirtou leka konsernan ranpli devwar konzigal dan lavi maryaz. Si en madanm pa ganny trete avek tandres, i kapab vwar li difisil pour rezwir sa laspe dan lavi maryaz.

¹² I annan serten moman kot bann dimoun marye i kapab priv kanmarad sa devwar konzigal dan lavi maryaz. Sa i kapab leka avek en madanm diran serten moman dan lemwan oubyen ler i santi li fatige. (Vwar Levitik 18:19.) I kapab leka avek en mari letan i pe fer fas avek en problenm grav dan travay e son lespri i fatige. Ler devwar konzigal dan lavi maryaz pa posib pour en pe letan, sa mari ouswa madanm i pli byen kapab siporte si tou le de i diskit fransman sa sitiasyon e tonm dakor par “konsantman kanmarad.” (1 Korentyen 7:5) Sa pou anpes zot tou le de tir bann move konklizyon. Si parkont, en madanm i volonterman priv son mari oubyen si en mari i fer par ekspre pour pa ranpli son devwar konzigal avek lanmour, enn i kapab tonm dan tantasyon. Dan en sitiasyon koumsa, bann problenm i kapab leve dan lavi maryaz.

13. Ki bann Kretyen i kapab fer pour gard zot panse prop?

¹³ Parey tou Kretyen, bann serviter Bondye ki’n marye i devret evit pornografi, ki kapab kree bann move dezir ki kont natir dan zot. (Kolosyen 3:5) Zot devret vey zot panse ek aksyon ler zot an konpanni en dimoun lot sèks. Zezi ti averti: “En dimoun ki get madanm en lot zonm avek dezir in deza komet adilter avek li dan son leker.” (Matye 5:28) Par aplik konsey Labib ki annan pour fer avek sèks, bann koup i devret kapab evite tonm dan tantasyon e komet adilter. Zot kapab kontinyen rezwir sa relasyon entim merveye dan maryaz kot sèks i ganny vwar konman en kado presye ki sorti kot Loter maryaz, Zeova.​—Proverb 5:15-19.

REZON KI LABIB I DONNEN POUR DIVORSE

14. Ki sitiasyon tris ki nou vwar parfwa? Akoz?

¹⁴ Erezman, dan laplipar maryaz Kretyen, nenport problenm ki leve i kapab ganny rezourd. Me parfwa sa i pa leka. Vi ki imen i enparfe e pe viv dan en lemonn ranpli avek pese ki ganny kontrole par Satan, i arive ki serten maryaz i pros pour kase. (1 Zan 5:19) Ki mannyer bann Kretyen i devret fer fas avek en sitiasyon difisil koumsa?

15. (a) Ki sa sel rezon ki Labib i donnen pour divorse avek posibilite pour remarye? (b) Akoz serten pa’n deside pour divorse avek zot msye ouswa madanm ki’n tronp zot?

¹⁵ Parey nou’n mansyonnen dan Sapit 2 dan sa liv, relasyon seksyel an deor maryaz i sel rezon ki Labib i donnen pour divorse avek posibilite pour remarye.c (Matye 19:9) Si ou annan laprev konkret ki ou msye ouswa ou madanm marye in tronp ou, alor ou annan en desizyon difisil pour fer. Eski ou pou kontinyen reste avek li dan sa maryaz oubyen ou pou rod en divors? Napa okenn lalwa pour sa. Serten Kretyen in senserman pardonn sa msye ouswa sa madanm ki’n repantir, e sa maryaz ki’n ganny prezerve in byen marse apre sa. Lezot in deside pour pa divorse akoz zot zanfan.

16. (a) Nonm serten keksoz ki’n pous serten pour divorse avek zot msye ouswa madanm marye ki’n tronp zot. (b) Ler en msye ouswa madanm inosan i fer en desizyon pour divorse oubyen non, akoz personn pa devret kritik son desizyon?

¹⁶ De lot kote, kan enn in tronp lot, sa i kapab anmenn lansentman oubyen bann maladi transmet par sèks. Oubyen petet bann zanfan i bezwen ganny proteze kont labi seksyel delapar en papa oubyen manman. Evidaman, i annan en kantite keksoz pour konsidere avan ki en desizyon i ganny fer. Parkont, si ou’n aprann ki ou msye ouswa ou madanm marye in tronp ou e apre ou rekonmans annan relasyon seksyel avek li, ou pe alor montre ki ou’n pardonn li e anvi kontinyen reste avek li. Rezon pour divorse avek posibilite pour remarye dapre Labib nepli valid aprezan. Personn pa devret pe mel dan ou zafer e esey enfliyans ou desizyon, ni devret kritik ou desizyon kan ou’n fer li. Ou pou bezwen viv avek konsekans ou desizyon. “Sakenn i devre anmenn son prop fardo.”​—Galat 6:5.

REZON POUR SEPARE

17. Si napa relasyon seksyel an deor maryaz, ki restriksyon Labib i plase lo separasyon oubyen divors?

¹⁷ Eski i annan sitiasyon ki kapab zistifye separasyon oubyen posibilite pour divorse avek ou msye ouswa madanm menm si i pa’n tronp ou? Wi, me dan en ka koumsa, en Kretyen pa lib pour rod en lot dimoun pour remarye avek. (Matye 5:32) Menm si Labib i permet separasyon, i spesifye ki sa enn ki pe kite i devret ‘reste tousel ou sinon retournen.’ (1 Korentyen 7:11) Ki serten sitiasyon ekstrenm ki kapab fer en separasyon neseser?

18, 19. Ki serten sitiasyon ekstrenm ki kapab fer en msye ouswa madanm mazinen pour separe legalman oubyen divorse, menm si i pa posib pour li remarye apre?

¹⁸ En fanmiy i kapab napa lemwayen pour viv akoz sa mari i pares e i annan bann move labitid.d Petet i gaspiy tou larzan ki sa fanmiy i annan dan bann zwe larzan oubyen pour aste drog ek lalkol. Labib i dir: “Si en dimoun i pa port swen . . . bann ki viv dan son lakaz, i’n abandonn lafwa e i pir ki en non-krwaryan.” (1 Timote 5:8) Si sa zonm i refize sanz son fason, petet i menm pran larzan son madanm pour siport son bann vis, sa madanm i kapab deside pour rod en separasyon legal pour protez li ek son zanfan.

¹⁹ En tel separasyon i osi kapab neseser si en msye ouswa madanm i tre vyolan anver sa dimoun ki i’n marye avek. Petet i bat li bokou ziska en pwen ki son lasante, e menm son lavi i an danze. Deplis, si en msye ouswa madanm pe konstaman esey fors sa dimoun ki i’n marye avek pour kas komannman Bondye dan en serten fason, sa enn ki pe ganny menase i kapab osi konsider separasyon. Sa i sirtou si sitiasyon i ariv ziska en tel pwen kot lavi spirityel sa dimoun i an danze. Sa enn ki an danze i kapab konklir ki sel fason pour “obei Bondye plito ki zonm” se pour ganny en separasyon legal.​—Akt 5:29.

20. (a) Dan ka kot en fanmiy pe kase, ki bann zanmi ek ansyen matir i kapab ofer, e ki zot pa kapab fer? (b) Lefe ki Labib i mansyonn posibilite pour divorse e separe, bann dimoun ki’n marye pa devret servi sa konman en leskiz pour fer kwa?

²⁰ Dan tou bann ka labi ekstrenm dan maryaz, personn pa devret met presyon lo sa enn ki inosan pour separe oubyen pour reste avek sa dimoun. Menm si bann zanmi ek bann ansyen matir i kapab ofer sipor ek konsey baze lo Labib, zot pa konn tou detay ki arive ant en mari ek en madanm. Zis Zeova ki kapab vwar sa. Byensir, en madanm Kretyen pa pou onor laranzman maryaz ki Bondye in etablir si i servi bann rezon ki pa valab pour met en lafen avek son maryaz. Me si en sitiasyon vreman danzere i persiste, napa personn ki devret kritik sa madanm si i deside pour separe. Sa i osi leka pour en mari Kretyen ki rod separasyon. “Nou tou nou pou paret devan Bondye pour ganny zize.”​—Romen 14:10.

KONMAN EN MARYAZ KASE TI GANNY SOVE

21. Ki leksperyans ki montre ki konsey Labib lo maryaz i marse?

²¹ Trwa mwan apre ki Lucia, ki ti ganny mansyonnen pli boner, ti separe avek son mari, i ti zwenn bann Temwen Zeova e konmans etidye Labib avek zot. I eksplike: “Mon pa ti pe ekspekte ki Labib i ofer bann solisyon pratik pour mon problenm. Apre zis en semenn letid, mon ti deswit anvi rekonsilye avek mon mari. Ozordi mon kapab dir ki Zeova i konnen konman pour sov bann maryaz ki dan kriz akoz son lansennyman i ed bann msye ek madanm aprann konman pour annan lapresyasyon pour kanmarad. I pa vre ki Temwen Zeova i diviz bann fanmiy, parey serten i dir. Dan mon ka, in ariv tou lekontrer.” Lucia ti aprann konman pour met bann prensip Labib an pratik dan son lavi.

22. Dan kwa ki tou koup marye i devret annan konfyans?

²² Legzanp Lucia pa en leksepsyon. Maryaz i devret en benediksyon, non pa en fardo. Pour ki sa i arive, Zeova in fourni pli bon sours konsey ki kapab egziste pour maryaz. Sa i son Parol presye. Labib i kapab fer “sa ki napa leksperyans saz.” (Psonm 19:7-11) I’n sov en kantite maryaz ki ti pre pour kase e i’n amelyor bokou lezot ki ti annan bann problenm grav. Fotespere ki tou koup marye i annan konfyans total dan konsey ki Zeova i fourni konsernan lavi maryaz. I vreman efikas!