Leson 3

Ki sennla Zezi Kri?

Akoz Zezi i apel “premye-ne tou kreasyon” Bondye? (1)

Akoz i ganny apele “Laparol”? (1)

Akoz Zezi ti vin lo later konman en zonm? (2-4)

Akoz i ti fer bann mirak? (5)

Ki Zezi pou fer byento? (6)

1. Zezi ti en lespri dan lesyel avan ki i ti vin lo later. I ti premye kreasyon Bondye e alor i apel “premye-ne tou kreasyon” Bondye. (Kolosyen 1:15; Revelasyon 3:14) Zezi i sel Garson ki Bondye ti kree li tousel. Avan son nesans Zezi ti travay avek Zeova pour ede kree tou lezot keksoz dan lesyel e lo later. (Proverb 8:22-31; Kolosyen 1:16, 17) Bondye ti osi servi li konman portparol prensipal. Se pour sa ki Zezi i apel “Laparol.”—Zan 1:1-3; Revelasyon 19:13.

2. Bondye ti anvoy son garson lo later ler i ti transfer son lavi dan vant Mari. Alor papa Zezi pa ti en zonm. Se pour sa ki Zezi pa ti erit okenn pese, ni lenperfeksyon. Bondye ti anvoy Zezi lo later pour trwa rezon: (1) Pour ansenny nou laverite lo Bondye (Zan 18:37), (2) pour montre li fidel dan en fason parfe e kit en legzanp pour nou swiv (1 Pyer 2:21), e (3) pour sakrifye son lavi pour liber nou dan pese ek lanmor. Akoz sa ti neseser?—Matye 20:28.

3. Par son dezobeisans, Adan ti fer sa ki Labib i apel “pese.” Pour sa, Bondye ti kondann li amor. (Zenez 3:17-19) I ti nepli lo sa nivo ki Bondye ti’n ekspekte pour li, alor i ti nepli parfe. Ptit-a-pti i ti vin vye, e apre mor. Adan ti transmet pese avek son zanfan. Se pour sa ki nou osi nou vin vye, nou malad e nou mor. Konman limanite ti pou kapab ganny sove?—Romen 3:23; 5:12.

4. Zezi ti en zonm parfe parey Adan. Sepandan Zezi pa ti fer parey Adan, i ti obeir son papa dan en fason parfe, menm dan gran difikilte. I ti alor kapab sakrifye son lavi zonm parfe e pey pour pese Adan. Se sa ki Labib i apel “pri pour sov limanite” oubyen ranson. Alor bann zanfan Adan i kapab ganny delivre anba kondannasyon lanmor. Tou sa ki met zot konfyans dan Zezi i kapab ganny pardonnen pour zot pese e ganny lavi eternel.—1 Timote 2:5, 6; Zan 3:16; Romen 5:18, 19.

5. Kan Zezi ti lo later, i ti geri bann malad, nouri bann dimoun lafen e kalmi bann tanpet. I ti menm resisit dimoun mor. Akoz i ti fer sa bann mirak? (1) I ti annan pitye pour bann dimoun ki ti pe soufer e i ti oule ed zot. (2) Son bann mirak ti laprev ki i ti garson Bondye. (3) Son bann mirak ti osi montre sa ki i pou fer pour bann imen obeisan ler i vin Lerwa tou later.—Matye 14:14; Mark 2:10-12; Zan 5:28, 29.

6. Zezi ti mor, me Bondye ti resisit li e i ti retourn dan lesyel konman en kreatir spirityel. (1 Pyer 3:18) Apre sa, Bondye in fer li vin Lerwa. Byento, Zezi pou kapab retir tou mesanste ek soufrans lo later.—Psonm 37:9-11; Proverb 2:21, 22.

[Portre lo paz 7]

Pandan son minister, Zezi ti ansennyen, i ti fer bann mirak e i ti menm donn son lavi pour nou