Leson 11

Krwayans ek Koutim ki Bondye pa kontan

Ki bann kalite krwayans ek koutim ki move? (1)

Eski bann Kretyen i devret krwar ki Bondye i en Trinite? (2)

Akoz bann vre Kretyen pa selebre Nwel, Pak, oubyen lanniverser nesans? (3, 4)

Eski bann dimoun mor i kapab fer ditor bann ki vivan? (5)

Eski Zezi ti mor lo en lakrwa? (6)

Eski i enportan pour fer plezir Bondye? (7)

1. Pa tou krwayans ek koutim ki move. Me Bondye pa aprouv bann ki sorti dan en fo larelizyon oubyen ki kont sa ki Labib i dir.—Matye 15:6.

2. Trinite: Eski Zeova i en Trinite, setadir en Bondye an trwa personn? Non, Zeova, nou Papa, i “sel vre Bondye.” (Zan 17:3; Mark 12:29) Zezi i son Garson premye ne, e i bezwen soumet avek Bondye. (1 Korentyen 11:3) Papa i pli gran ki son Garson. (Zan 14:28) Lespri sen i pa en dimoun, i lafors aktif Bondye.—Zenez 1:2; Akt 2:18.

3. Nwel ek Pak: Zezi pa ti ne le 25 Desanm. I ti ne apepre le 1 Oktob, en letan dan lannen kot bann berze ti vey zot mouton deor pandan lannwit. (Lik 2:8-12) Zezi pa ti zanmen demann bann Kretyen pour fet son lanniverser. I ti plito dir son bann disip pour komemor oubyen rapel son lanmor. (Lik 22:19, 20) Nwel ek son bann koutim i sorti dan bann fo larelizyon lontan. I menm keksoz pour bann koutim Pak, tel parey servi bann lapen ek dizef. Bann premye Kretyen pa ti selebre ni Nwel ni Pak e ni bann vre Kretyen pa pe fer li ozordi.

4. Lanniverser nesans: Sel de lanniverser nesans ki Labib i mansyonnen ti ganny organize par bann dimoun ki pa ti ador Zeova. (Zenez 40:20-22; Mark 6:21, 22, 24-27) Bann premye Kretyen pa ti selebre lanniverser nesans. Koutim lafet lanniverser nesans in sorti dan bann fo larelizyon lontan. Bann vre Kretyen i donn kado e anmize dan nenport ki moman dan lannen.

5. Lafreyer pour dimoun mor: Bann dimoun mor pa kapab fer, ni resanti nanryen. Nou pa kapab ed zot e zot pa kapab fer nou ditor. (Psonm 146:4; Eklezyast 9:5, 10) Nanm i mor; i pa kontinyen viv apre lanmor. (Ezekyel 18:4) Me parfwa bann move lanz, oubyen demon, zot fer krwar ki zot sa dimoun mor. Tou bann koutim ki annan pour fer avek lafreyer oubyen kominikasyon avek dimoun mor i move.—Izai 8:19.

6. Lakrwa: Zezi pa ti mor lo en lakrwa. I ti mor lo en poto. Mo Grek ki’n ganny tradwir “lakrwa” dan bokou Labib i annefe zis en morso dibwa. Senbol lakrwa in sorti dan bann fo larelizyon lontan. Bann premye Kretyen pa ti ni servi ni ador lakrwa. Alors, eski ou krwar ki i byen pour servi lakrwa pour ador Bondye?—Deterononm 7:26; 1 Korentyen 10:14.

7. Petet i difisil pour abandonn serten sa bann krwayans oubyen koutim. Ou bann fanmiy oubyen ou zanmi i kapab esey konvenk ou pour pa sanz ou krwayans. Me fer plezir Bondye i pli enportan ki fer plezir zonm.—Proverb 29:25; Matye 10:36, 37.

[Portre lo paz 22]

Bondye pa en Trinite

[Portre lo paz 23]

Nwel ek Pak in sorti dan bann fo larelizyon lontan

[Portre lo paz 23]

Napa okenn rezon pour ador bann dimoun mor oubyen per zot