Konman amelyor Abilite pour fer Konversasyon

ESKI normalman ou trouv li fasil pour fer konversasyon avek lezot? Pour bokou, zis sa panse pour angaz dan en konversasyon, sirtou avek en dimoun ki zot pa konnen, i fer zot enkyet. Bann tel dimoun i kapab timid. Zot kapab mazinen: ‘Ki mon pou koz lo la? Konman ki mon kapab konmans sa diskisyon? Konman ki mon kapab kontiny sa konversasyon?’ Bann ki konfidan e ardyese i kapab annan tandans pour domin en konversasyon. Zot defi i kapab pour fer lezot koze fasilman e pour aprann ekout sa ki lezot i dir. Alor nou tou, ki swa timid oubyen ardyese, nou bezwen kontinyen devlop abilite pour fer konversasyon.

Konmans dan Lakour

Pour amelyor ou abilite pour fer konversasyon, akoz ou pa konmans dan lakour? Konversasyon ki annan valer i kapab kontribye bokou ver boner en fanmiy.

Eleman pli enportan pour tel konversasyon se annan profon lafeksyon pour kanmarad. (Det. 6:6, 7; Prov. 4:1-4) Si nou vreman enterese avek lezot, nou kominike, e nou ekoute ler lezot dimoun i anvi dir en keksoz. En lot fakter enportan se annan en keksoz ki vo lapenn rakonte. Si nou annan en progranm regilye lektir ek letid Labib personnel, nou kapab annan bokou pour partaze. An servan sa pti liv Examinons les Écritures chaque jour avek sazes i kapab ensit diskisyon. Petet pandan lazournen nou’n ganny en bon leksperyans dan predikasyon. I kapab ki nou’n lir en keksoz ki enformatif oubyen fer riye. Nou devret fer li en labitid pour partaz sa bann lenformasyon pandan bann bon konversasyon an fanmiy. Sa pou osi ed nou pour fer konversasyon avek lezot dimoun ki pa nou fanmiy.

Koz avek en Etranze

Bokou dimoun i ezite pour konmans en konversasyon avek en dimoun ki zot pa konnen. Me akoz lanmour pour Bondye e pour zot prosen, bann Temwen Zeova i fer en zefor serye pour aprann konman pour fer konversasyon afen pour partaz laverite Labib avek lezot. Kwa ki kapab ed ou pour amelyor dan sa laspe?

Sa prensip ki ganny mansyonnen dan Filipyen 2:4 i tre itil. Nou ganny ankouraze ki nou, “pa devre pran ka zis avek [nou] prop lentere, me osi avek lentere lezot.” Mazin sa dan sa fason: Si ou pa’n zanmen rankontre sa dimoun avan, li i konsider ou konman en etranze. Konman ki ou kapab fer li santi alez? En zoli sourir ek en lakey amikal pou ede. Me i annan plis pour konsidere.

Ou’n kapab enteronp panse sa dimoun. Si, ou esey diskit avek li konsernan sa ki dan ou lespri san enteres ou avek sa ki li i annan dan son lespri, eski i pou reazir dan en bon fason? Ki Zezi ti fer ler i ti zwenn en madanm kot en pi an Samari? Dan son lespri i ti pe mazinen ki i bezwen ganny delo. Zezi ti konmans son konversasyon avek li lo sa baz, e Zezi pa ti tarde pour anmenn sa konversasyon dan en diskisyon spirityel byen vivan.—Zan 4:7-26.

Si ou obzerv byen, ou osi ou kapab detekte kwa ki dimoun i kapab pe mazinen. Eski sa dimoun i paret zwaye oubyen tris? Eski i aze, kekfwa i dan en move kondisyon lasante? Eski ou vwar levidans ki i annan zanfan kot lakour? Eski i paret ki sa dimoun i byen lo plan materyel oubyen ki i pe lite pour ganny bann nesesite lavi? Eski bann dekorasyon lakour oubyen bizou personnel i endik serten lenfliyans relizye? Si ler ou pe akey sa dimoun ou pran an konsiderasyon sa bann keksoz, sa dimoun i kapab vwar ou konman en dimoun ki partaz en lentere komen avek li.

Si ou pa rankontre sa met lakour fas-a-fas, petet zis antann son lavwa atraver en laport fermen, ki ou kapab konklir? Sa dimoun i kapab pe viv dan lafreyer. Eski ou pou servi sa lenformasyon pour konmans en konversasyon atraver laport?

Dan serten landrwa, i posib pour enplik en dimoun dan en konversasyon par rakont li en keksoz lo ou menm—kote ou sorti, akoz ou’n vin devan son laport, akoz ou krwar dan Bondye, akoz ou ti konmans etidye Labib, e konman Labib in ed ou. (Akt 26:4-23) Byensir, ou bezwen annan en lobzektif kler antet e servi en bon zizman, ler ou pe fer sa. Sa, an retour, i kapab motiv sa dimoun pour dir ou serten keksoz lo li menm e konman i vwar keksoz.

Dan serten kiltir, i en koutim pour ofer lospitalite bann etranze. Dimoun i kapab fasilman envit ou pour antre e asize. Apre ki ou’n asize, si ou demann avek polites konsernan sitiasyon sa fanmiy e senserman ekout larepons, sa dimoun i kapab egalman port latansyon lo sa ki ou annan pour dir. Lezot kiltir i menm montre pli gran lentere dan bann viziter, alor petet ou bezwen pas plis letan koze dan ou konversasyon preliminer. E pandan sa konversasyon, zot kapab dekouver ki zot annan keksoz an komen avek ou. Sa i kapab anmenn ver en diskisyon spirityel ki benefisye sa dimoun.

Ki ou pou fer si i annan bokou dimoun dan ou teritwar ki koz lezot langaz? Konman ki ou kapab koz avek sa bann dimoun? Si ou aprann bann senp mo lakey dan serten sa bann langaz, sa dimoun pou realize ki ou enterese avek li. Sa i kapab ouver semen pour plis konversasyon.

Konman pour kontiny en Konversasyon

Si ou pa oule ki konversasyon i aret lanmenm, me i kontinyen, ou pou bezwen montre lentere avek sa ki sa dimoun pe panse. Ankouraz li pour eksprim son lekor si i pare pour fer li. Bann kestyon byen swazir i kapab ede. Bann kestyon lopinyon i pli meyer parski zot ordinerman ankouraz en dimoun pour pa zis reponn wi oubyen non. Par egzanp, apre ki ou’n mansyonn en problenm lokal ki trakasan, ou kapab demande: “Kwa ki ou panse i lakoz sa sitiasyon?” oubyen “Kwa ki pou rezourd sa sitiasyon?”

Ler ou demann en kestyon, ekout atantivman larepons. Montre ou lentere senser par en parol, en lendikasyon ki ou dakor, en zes. Pa enteronpe. Avek en lespri ouver, konsider sa ki pe ganny dir. “Pare pou ekoute, me pran letan avan koze.” (Zak 1:19) Ler i ariv moman pour ou reponn, montre ki ou ti pe vreman ekout sa ki ti pe ganny dir.

Sepandan, realize, ki pa tou dimoun ki pou reponn ou bann kestyon. Serten dimoun i kapab zis reazir par tir son lizye avek ou oubyen fer en sourir. Lezot i kapab senpleman dir wi oubyen non. Pa dezapwente. Annan pasyans. Pa esey fors sa konversasyon. Si sa dimoun i pare pour ekoute, servi sa loportinite pour partaz bann panse Biblik ankourazan. Avek letan, sa dimoun i kapab arive konsider ou konman en zanmi. Petet alor la i pou pare pour partaz son bann panse pli libreman.

Anmezir ki ou koz avek dimoun, prepar pour bann retourn vizit plitar. Si en dimoun i soulev plizyer kestyon, reponn enpe, me kit enn oubyen de pour prosenn fwa ki ou zwenn li. Ofer pour fer resers, e apre partaz rezilta avek li. Si i pa soulev okenn kestyon, ou kapab fini ou konversasyon avek en kestyon ki ou krwar pou enteres li. Ofer pour diskit sa, lo lot vizit. I annan bokou lide dan liv Comment raisonner à partir des Écritures, dan brosir Sa ki Bondye i ekspekte nou fer, e dan bann dernyen nimero Latour Veyer ek Réveillez-vous!

Ler ou koz avek lezot Konpanyon Kretyen

Ler ou rankontre en lot Temwen Zeova pour premye fwa, eski ou pran linisyativ pour konn li byen? Oubyen eski ou zis debout trankil? Lanmour pour nou bann frer i devret pous nou pour anvi arive konn lezot. (Zan 13:35) Konman ki ou kapab konmanse? Ou kapab senpleman dir ou non e demann non sa dimoun. Ordinerman, par demann li konman ki i’n aprann laverite pou anmenn ver en konversasyon enteresan e pou ed zot arive konn kanmarad. Menm si sa ki ou dir i pa sanble sorti fasilman, ou zefor i endik sa dimoun ki ou konsernen avek li, e se sa ki enportan.

Kwa ki kapab kontribye ver en konversasyon enteresan avek en manm ou kongregasyon? Montre lentere senser dan sa dimoun ek son fanmiy. Eski renyon in fek fini? Fer komanter lo bann panse ki ou’n trouv itil. Sa i kapab anmenn benefis pour zot tou le de. Ou kapab mansyonn en pwen enteresan dan en nimero Latour Veyer ek Réveillez-vous! resan. Sa pa devret ganny fer konman en demonstrasyon oubyen pour gete ki kantite zot konnen. Fer li avek en bi pour partaz serten keksoz ki ou’n trouv en plezir spesyal ladan. Ou kapab koz lo en ekspoze ki enn ant zot i kapab annan dan Lekol Minister Teokratik e esanz bann lide lo konman sa i kapab ganny fer. Ou kapab osi partaz bann leksperyans predikasyon.

Byensir, nou lentere dan dimoun i souvan anmenn ver konversasyon lo dimoun—bann keksoz ki zot dir e fer. Fer riye i osi kapab form parti nou konversasyon. Eski sa ki nou pou dir i pou fer dibyen? Si nou pran aker konsey Parol Bondye e ganny motive par lanmour divin, nou bann parol pou sirman fer dibyen.—Prov. 16:27, 28; Efe. 4:25, 29; 5:3, 4; Zak 1:26.

Avan ki nou partisip dan predikasyon, nou prepare. Akoz pa prepar en morso nouvel enteresan pour partaz avek bann zanmi ler nou pe koz avek zot? Ler ou lir e antann bann keksoz enteresan, esey rapel bann pwen ki ou anvi partaz avek lezot. Avek letan, ou pou annan bokou lenformasyon ki ou kapab swazir pour partaz avek ou bann frer ek ser. Sa pou permet ou pour koz lo lezot keksoz apard ki zis lo bann aktivite routin dan lavi toulezour. Pli enportan, ki ou bann parol i donn levidans ki kantite presye Parol Bondye i ete pour ou!—Pson. 139:17.