Koz avek Konviksyon

LER en dimoun i koz avek konviksyon, lezot i vwar ki i konpletman krwar sa ki i pe dir. En tel konviksyon ti evidan dan minister zapot Pol. I ti ekrir sa bann ki ti vin krwayan an Tesalonik: “Nou pa’n anons zot levanzil zis par parol, me osi . . . avek [en konviksyon ferm, NW].” (1 Tesa. 1:5) Sa konviksyon ti evidan dan mannyer ki i ti koze e dan lafason ki i ti azir. Konviksyon ferm i devret osi evidan dan fason ki nou prezant bann laverite Labib.

Demontre konviksyon i pa parey ler en dimoun i ensiste lo son prop lopinyon, asire lo keksoz ki i napa sifizaman levidans konkret, oubyen arogan. Plito, ler en dimoun ki demontre konviksyon i koz lo bann keksoz dan Parol Bondye, i fer li en mannyer ki montre en lafwa ferm.—Ebr. 11:1.

Bann Lokazyon pour eksprim Konviksyon. I enportan pour koz avek konviksyon ler ou dan predikasyon. Souvan ou mannyer koze i kaptir otan latansyon ki ou mesaz. Dimoun i vwar konman ki ou vreman santi konsernan sa ki ou dir. Ou konviksyon i kapab transmet, dan en fason pli pwisan ki parol, ki ou annan serten keksoz tre presye pour partaze.

I osi enportan pour koz avek konviksyon ler pe adres en lodyans bann konpanyon Kretyen. Zapot Pyer ti ekrir son premye let enspire pour ‘ankouraz zot, e asir zot [avek lafors, NW] ki sa i vre lagras Bondye.’ I ti ankouraz son bann frer ek ser pour: “Reste ferm ladan.” (1 Pyer 5:12) Ler pe ekrir kongregasyon an Ronm, zapot Pol ti eksprim konviksyon ki ti benefisye zot. I ti ekrir: “Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir, ni okenn pisans, ni bann zabitan dan lemonn ki anler, ni dan lemonn ki anba, ni okenn lezot kreatir pa pou zanmen kapab separ nou avek lanmour Bondye dan Kris-Zezi nou Senyer.” (Rom. 8:38, 39) Dan en fason konvenkan Pol ti osi ekrir zot konsernan sa nesesite pour pres avek lezot, e son prop zel dan sa aktivite ti klerman demontre ki li menm personnelman ti konvenki son lenportans. (Akt 20:18-21; Rom. 10:9, 13-15) Bann ansyen ozordi i devret annan sa menm konviksyon ler zot ansenny Parol Bondye.

Pandan letan letid ek lezot moman, bann paran i bezwen eksprim zot lekor avek konviksyon ler pe diskit bann keksoz spirityel avek zot zanfan. Pour ki sa i posib, bann paran i devret devlop lanmour pour Bondye e pour son bann prensip dan zot prop leker. Apre zot kapab koz avek konviksyon senser avek zot zanfan, akoz “labous i koz sa ki debord dan leker.” (Lik 6:45; Det. 6:5-7) Annan en tel konviksyon pou osi motiv bann paran pour etablir en legzanp “lafwa senser.”—2 Tim. 1:5.

I sirtou enportan pour eksprim ou lekor avek konviksyon ler ou lafwa i ganny kestyonnen. Petet en kanmarad lekol, en ansennyan, oubyen en koleg travay i etonnen ki ou pa partisip dan en serten selebrasyon. En larepons byen ferm avek en bon rezonnman i kapab ed li pour respekte ou pozisyon ki baze lo Labib. Ki ou pou fer si en dimoun i esey anmenn ou dan en move kondwit—malonnekte, labi drog, oubyen imoralite seksyel? I enportan pour fer kler ki definitivman ou pa pou angaz dan en tel kondwit e ki okenn zefor pour persyad ou pa pou fer ou sanz ou lide. Pour kapab arive fer sa ou bezwen koz avek konviksyon ler ou pe rezet sa demann. Ler i ti pe reziste lentansyon imoral madanm Potifar, Zozef ti klerman deklare: “Alor konman mon a kapab komet sa keksoz sitan mal e vreman fer pese kont Bondye?” Ler sa madanm ti persiste, Zozef ti sove dan sa lakaz.—Zen. 39:9, 12.

Konman demontre Konviksyon. Bann mo ki ou servi i kapab kontribye bokou pour transmet ou konviksyon. Dan plizyer lokazyon Zezi ti entrodwir bann deklarasyon enportan an dizan: “An verite, an verite mon dir ou.” (Zan 3:3, 5, 11; 5:19, 24, 25) Konviksyon ki Pol ti annan i ganny reflekte dan bann tel lekspresyon parey “Mon annan sa lasirans,” “Mon konnen e mon asire dan Senyer Zezi,” e “Mon pa pe koz manti mon pe dir laverite.” (Rom. 8:38; 14:14; 1 Tim. 2:7) Konsernan lakonplisman son parol, parler Zeova ti enspir son bann profet pour fer bann deklarasyon ki ti ranpli avek lanfaz, parey, “I pou san fot ariv vre.” (Aba. 2:3) Ler ou refer avek sa bann profesi, ou kapab koz dan menm fason. Si ou met konfyans pa dan ou prop lekor me dan Zeova e si ou koz avek lezot dan en mannyer respektab, bann lekspresyon ki reflekte menm konviksyon pou endike ki ou annan en lafwa solid.

Konviksyon i kapab osi ganny demontre par en gran senserite ek lafors dan ou lekspresyon. Bann lekspresyon lo ou figir, ou bann zes, ek mouvman ou lekor zot tou zot kontribye anver sa, menm si sa bann keksoz i varye avek en dimoun pour en lot. Menm si ou kanmi oubyen annan en pti lavwa par natir, ler ou totalman konvenki ki sa ki ou pe dir i laverite e ki lezot i bezwen antann sa, ou konviksyon pou vin evidan.

Byensir, nou devret senser ler nou eksprim nou konviksyon. Si dimoun i santi ki nou pe pretann olye ki koz sa ki dan nou leker, i tre probab zot pou konklir ki nou mesaz napa valer. Alor, pli enportan ki tou, montre sa ki ou vreman ete. Depandan lo grander ou lodyans, petet ou bezwen koz avek en pli gran volim lavwa ki labitid e avek plis viger. Me ou bi i devret pour eksprim ou lekor dan en fason senser e natirel.

Led pour koz avek Konviksyon. Vi ki konviksyon i enplik bann santiman ki ou annan lo ou lenformasyon, alor en bon preparasyon i enportan. Senpleman kopi lenformasyon apartir en piblikasyon e apre resit li i pa sifizan. Ou bezwen konpran sa lenformasyon klerman e ou bezwen kapab arive eksprim li dan ou prop mo. Ou devret totalman konvenki ki sa lenformasyon i vre e ki sa ki ou pe dir i annan valer pour ou lodyans. Sa i vedir ki ler ou pe prepar ou prezantasyon, ou pran kont zot sirkonstans osi byen sa ki zot kapab deza konnen lo sa topik oubyen ki mannyer zot kapab pe santi konsernan sa topik.

I pli fasil pour lezot santi nou konviksyon ler nou prezant nou ekspoze avek fasilite koze. Alor, anplis ki prepar bon lenformasyon, travay dir lo ou prezantasyon. Dedye latansyon spesyal lo bann porsyon ou lenformasyon ki demann pour plis senserite afen ki ou kapab prezant zot san depan tro bokou lo ou bann not. Rapel osi, pour priye ki Zeova i beni ou bann zefor. Dan sa fason ou pou “annan kouraz dan nou Bondye” pour koz dan en mannyer ki reflekte ou konviksyon ki ou mesaz i vre e enportan.—1 Tesa. 2:2.