Ankouraz e fortifye Lodyans

NENPORT ki problenm ki zot pe fer fas avek, bann serviter Bondye i devret trouv lankourazman dan kongregasyon Kretyen. Pour akonpli sa, sirtou bann ansyen zot devret fer sir ki zot diskour ek konsey i ankourazan. Bann ansyen i devret demontre zot parey “en landrwa kasyet kont divan e en labri kont tanpet lapli, parey delo ki pe koule dan en later sek, parey lonbraz en gro ros dan en later epize.”—Iza. 32:2.

Si ou en ansyen, eski ou diskour i rafresi e rekonfort lezot? Eski zot donn plis determinasyon sa bann ki pe esey servi Zeova fidelman? Eski zot transmet lankourazman pour persevere pour fer lavolonte Bondye kantmenm dimoun pa enterese oubyen opoze? E si dan ou lodyans i annan bann ki dekouraze, pe soufer anba bann presyon ekonomik, oubyen pe lite avek en maladi grav ki napa gerizon, ki ou pou fer? Ou kapab ‘fortifye ou bann frer ek ser avek parol ou labous.’—Zob 16:5.

Servi loportinite ki ou annan konman en orater pour ed ou bann frer ek ser ganny lespwar ek lafors avek Zeova e atraver bann dispozisyon ki i’n fourni.—Rom. 15:13; Efe. 6:10.

Rapel zot sa ki Zeova in fer. Montre zot konman Zeova in ed son pep atraver bann difikilte dan lepase i en bon fason pour ankouraz lezot.—Rom. 15:4.

Zeova ti dir avek Moiz pour “ankouraz” e “fortifye” Zozye avan ki Izrael ti antre dan Later Promiz, ki sa letan ti pe ganny okipe par bann nasyon lennmi. Konman ki Moiz ti fer sa? Dan prezans Zozye, Moiz ti rapel sa nasyon bann keksoz ki Zeova ti fer pour zot pandan ki zot ti kit Lezip. (Det. 3:28; 7:18) Moiz ti osi rakont bann laviktwar ki Zeova ti’n donn zot lo bann Amorit. Apre Moiz ti enplor Zozye: “Annan kouraz ek lafors.” (Det. 31:1-8) Ler ou pe esey ankouraz ou bann frer ek ser, eski ou ed zot ganny lafors par rapel zot sa ki Zeova in deza fer pour zot?

Parler serten dimoun i telman inonde par zot problenm ki zot mazinen si zot pou zanmen en zour eksperyans bann benediksyon Rwayonm. Rapel zot ki bann promes Zeova i fidel.—Zoz. 23:14.

Dan serten pei nou bann frer pe fer fas avek bann lalwa gouvernman ki anpes zot pres sa bon nouvel. Dan bann tel ka, bann ansyen i kapab ed bann konpanyon Kretyen ganny lafors atraver leksperyans bann zapot Zezi Kri. (Akt 4:1–5:42) E fer resorti lafason ki Bondye ti aranz bann levennman ki ganny rikorde dan liv Ester pou sertennman ankouraz bann frer pour annan kouraz.

Parler bann endividi i asiste bann renyon kongregasyon me zot pa fer plis progre ki sa. Zot kapab santi ki Bondye pa pou zanmen pardonn zot parski zot fason viv avan ti tro move. Petet ou kapab rakonte konman Zeova ti azir avek Lerwa Manase. (2 Kron. 33:1-16) Oubyen ou kapab rakont konsernan bann dimoun dan ansyen Korent ki ti sanz zot fason viv, ti vin Kretyen, e ti ganny deklare drwat par Bondye.—1 Kor. 6:9-11.

Eski serten i santi ki bann problenm ki zot pe eksperyanse i endike ki zot in perdi faver Bondye? Ou kapab rapel zot sa ki Zob ti eksperyanse e konman i ti ganny bokou benediksyon akoz i ti mentenir son lentegrite avek Zeova. (Zob 1:1-22; 10:1; 42:12, 13; Pson. 34:19) Bann fo zanmi Zob ti dan lerer ler zot ti deklare ki Zob ti’n bezwen komet serten pese. (Zob 4:7, 8; 8:5, 6) Lo lot kote ler Pol ek Barnabas ti pe fortifye bann disip e “ankouraz zot pour reste ferm dan lafwa,” zot ti dir: ‘Nou bezwen pas par bokou soufrans pour antre dan Rwayonm Bondye.’ (Akt 14:21, 22) Ozordi osi i leka, ou kapab fortifye sa bann ki pe eksperyans bann leprev par fer resorti ki landirans i neseser delapar tou Kretyen ki dan moman difisil e sa i annan en gran valer dan lizye Bondye.—Prov. 27:11; Mat. 24:13; Rom. 5:3, 4; 2 Tim. 3:12.

Ankouraz sa bann ki ekout ou pour reflesir konsernan bann fason ki Zeova in akonpli son promes dan zot prop lavi. Par servi detrwa rapel, zot kapab vwar konman Zeova in azir anver zot personnelman, zis parey i ti promet. Dan Psonm 32:8, nou lir: “Mon pou fer ou annan disernman e enstri ou dan semen ki ou devret ale. Mon lizye pou lo ou pour konsey ou.” Ler ou ed sa bann ki ekout ou pour rapel konman Zeova in gid oubyen fortifye zot, ou pou ed zot vwar pour zot menm ki Zeova i pran swen avek zot e ki i pou vreman ed zot dan nenport leprev ki zot pe fer fas avek.—Iza. 41:10, 13; 1 Pyer 5:7.

Montre Lazwa dan sa ki Bondye pe fer konmela. Ler ou pe esey ankouraz ou bann frer ek ser, atir zot latansyon lo sa ki Zeova pe fer konmela. Ler ou koz lo sa bann keksoz dan en fason ki montre ki zot rann ou zwaye sa pou stimil sa menm santiman dan leker sa bann ki ekout ou.

Annou konsider konman Zeova i ed nou fer fas avek presyon lavi. I montre nou pli bon fason pour viv. (Iza. 30:21) I eksplike akoz i annan krim, lenzistis, lapovrete, maladi, ek lanmor e i dir nou konman i pou met en lafen avek tousala. I anserkle nou avek en lasosyasyon frer ki marke avek lanmour. I akord nou sa don presye, lapriyer. I konfye nou avek sa privilez pour vin son bann temwen. I revel avek nou ki Kris in deza ganny kouronnen dan lesyel konman Lerwa e ki bann dernyen zour sa vye sistenm pe rapidman ariv ver son lafen.—Rev. 12:1-12.

Anplis ki sa bann benediksyon, nou annan nou bann renyon kongregasyon, ek bann diferan lasanble. Ler ou koz lo sa bann dispozisyon dan en fason ki montre vre lapresyasyon pour sa bann keksoz ou pou fortifye determinasyon lezot pour pa neglize rasanble avek zot bann frer ek ser.—Ebr. 10:23-25.

Bann rapor ki montre konman ki Zeova i beni nou zefor ki nou fer dan predikasyon i osi en sours lafors. Dan premye syek ler Pol ek Barnabas ti lo larout pour Zerizalenm, zot ti donn “bokou lazwa tou bann frer” par rakont an detay konman bann non-Zwif ti pe aksepte Bondye. (Akt 15:3) Ou osi kapab anmenn lazwa pour bann frer ek ser par partaz bann leksperyans ankourazan avek zot.

Ler ou ed bann endividi pour vwar valer sa ki zot pe fer, sa pou donn zot plis lankourazman. Felisit zot pour partisip dan minister Kretyen. Felisit sa bann ki lavyeyes ek maladi pe limit zot aktivite me ki pe andire fidelman. Rapel zot ki Zeova pa oubliy sa lanmour ki zot in demontre pour son non. (Ebr. 6:10) Lafwa ki’n ganny prouve anba leprev i en posesyon ki annan en tre gran valer. (1 Pyer 1:6, 7) Nou bezwen fer nou bann frer ek ser rapel sa.

Koz avek Santiman konsernan nou Lespwar. Bann promes enspire konsernan bann keksoz ki pou arive i en gran sours lankourazman pour tou sa ki kontan Bondye. Petet laplipar dimoun dan ou lodyans in souvan antann sa bann parol. Me par lapresyasyon ki ou demontre ler ou koz konsernan sa bann promes, zot kapab vin vivan, fer lodyans met konfyans dan zot lakonplisman, e fer zot leker deborde avek rekonesans. Par aplik sa ki ou’n aprann dan Lekol Minister Teokratik i kapab ed ou pour fer sa.

Zeova li menm i sours prensipal kouraz ek lafors pour son pep. Kantmenm sa, ou kapab korpere avek li pour transmet bann tel benediksyon. Ler ou koz avek kongregasyon, servi byen sa loportinite pour fer sa.