Eski ou ti a kontan konn plis lo Labib?

Akfer lir Labib?

LABIB pa parey okenn lezot liv—i kontyen bann lenstriksyon ranpli avek lanmour sorti kot Bondye. (1 Tesalonisyen 2:13) Ou pou benefisye bokou si ou aplik sa ki Labib i ansennyen. Ou lanmour pour Bondye pou agrandi e ou pou vin pli pre avek li, li ki donn “tou don ekselan, tou kado parfe.” (Zak 1:17) Ou pou konnen konman pour apros li dan lapriyer. Ou pou eksperyans led Bondye dan bann letan difisil. Si ou viv ou lavi an armoni avek bann standar ki ganny trouve dan Labib, Bondye pou donn ou lavi eternel.—Romen 6:23.

Dan Labib nou kapab vwar serten laverite ki fer keksoz vin pli kler pour nou. Bann dimoun ki aprofondi zot konnesans dan Labib i ganny libere avek bann fo konsep ki domin lavi plizyer milyon endividi. Par egzanp, konn laverite lo sa ki arive apre ki nou’n mor i liber nou dan lafreyer ki bann dimoun mor i kapab fer nou ditor oubyen ki nou bann fanmiy ek zanmi pros ki’n kit nou pe soufer. (Ezekyel 18:4) Lansennyman Labib lo rezireksyon i rekonfort bann ki’n perdi en dimoun pros dan lanmor. (Zan 11:25) Ler nou konn laverite lo bann lanz mesan, sa i met nou an gard kont bann danze ki grigri i anmennen e i ed nou pour konpran akoz i annan sitan en kantite problenm lo later.

Bann prensip ki Bondye in donnen dan Labib i montre nou ki mannyer pour viv pour nou eksperyans bann byenfe fizik. Par egzanp, kan nou “rezonnab” dan nou labitid sa i kontribye ver en bon lasante. (1 Timote 3:2) Ler nou “pirifye nou avek tou sa ki sali lekor ek lespri,” nou pe evite detrir nou lasante. (2 Korentyen 7:1) Letan nou aplik konsey Bondye ki ganny trouve dan Labib i osi promot boner dan lavi maryaz ek respe pour nou prop lekor.—1 Korentyen 6:18.

Ou pou vin en dimoun ki pli zwaye si ou met an pratik Parol Bondye. Konnesans Labib i ed nou pour trouv lape lespri, lakontantman, e i osi donn nou lespwar. I ed nou pour kiltiv bann kalite ki tre atiran tel konman lafeksyon, lanmour, lazwa, lape, labonte, ek lafwa. (Galat 5:22, 23; Efezyen 4:24, 32) Sa bann kalite i ed nou pour vin en pli bon mari oubyen madanm, en pli bon papa oubyen manman, e en pli bon garson oubyen fiy.

Eski ou’n deza mazin lo lavenir? Bann profesi Labib i fer nou konnen ki nou pe viv dan en letan byen enportan dan listwar imen. Sa bann profesi pa zis dekrir kondisyon sa monn ozordi me i osi montre ki Bondye pou byento transform later dan en paradi.—Revelasyon 21:3, 4.

Led pour konpran Labib

Petet ou’n deza esey lir Labib me ou vwar li difisil pour konpran. Petet ou pa konnen kote pour gete dan Labib pour trouv larepons ou bann kestyon. Si sa i leka, ou pa sa sel dimoun ki dan sa sitiasyon. Nou tou nou bezwen led pour konpran Parol Bondye. Bann Temwen Zeova pe fourni plizyer milyon dimoun en lenstriksyon Biblik dan 235 pei. Zot ti pou kontan pour ed ou osi.

Ordinerman i pli bon etidye Labib pti gin par pti gin, an konmansan avek bann lansennyman debaz. (Ebre 6:1) Anmezir ki ou kontinyen, ou pou pli byen kapab pran “nouritir solid”—setadir, bann laverite en pe pli profon. (Ebre 5:14) Se Labib ki nou lotorite. Bann piblikasyon baze lo Labib, tel konman brosir Sa ki Bondye i ekspekte nou fer, pou ed ou pour konpran bann referans Biblik lo diferan size.

Eski ou pare pour konsakre en Letan sak Semenn pour konpran Labib?

En letid Labib i kapab ganny aranze pour ou dan en moman ek en landrwa ki pli konvenab pour ou. Bokou i etidye an prive dan zot prop lakaz. I annan serten ki menm etidye lo telefonn. Letid pa ganny fer dan en laklas kot i annan plizyer dimoun me an prive, dapre ou sirkonstans personnel, ki enkli ou nivo konnesans ek ledikasyon. I napa okenn legzanmen e napa nanryen ki pou ganny fer pour fer ou santi ou anbarase. Ou bann kestyon lo Labib pou ganny reponn, e ou pou aprann ki mannyer ou pou kapab vin pli pre avek Bondye.

Ou pa pou bezwen peye pour sa letid Labib. (Matye 10:8) I ganny ofer gratwitman avek dimoun dan tou sort relizyon e avek bann endividi ki pa pe pratik okenn relizyon me ki enterese senserman pour aprofondi zot konnesans dan Parol Bondye.

Lekel ki kapab partisip dan diskisyon? Ou fanmiy antye. Nenport zanmi ki ou anvi envite i kapab osi partisipe. Oubyen si ou prefere, diskisyon i kapab deroule avek zis ou tousel.

Bokou dimoun i rezerv enn er-d-tan tou le semenn pour etidye Labib. Si ou kapab konsakre plis letan oubyen si ou annan mwens letan pour donnen sak semenn, bann Temwen pou fer zot disponib pour ed ou.

En Lenvitasyon pour aprann

Nou envit ou pour pran kontak avek bann Temwen Zeova. En fason ki ou kapab fer sa se par ekrir an adresan lo enn sa bann ladres ki trouve anba. Apre sa, laranzman pou ganny fer pour en dimoun kondwir en letid Labib gratwit avek ou.

□ Anvoy en kopi sa brosir Sa ki Bondye i ekspekte nou fer.

□ Silvouple pran kontak avek mwan osize en letid Labib gratwit.

Eksepte kan i endike, bann sitasyon Lekritir Grek in tire dan Nouvo Testaman an Kreol Seselwa.