Sapit De

Glorifye Zeova konman sa sel vre Bondye

1. Lekel sa sel vre Bondye?

LABIB i dir ki kantmenm i annan bokou ki ganny konsidere konman bondye, “pour nou i annan en sel Bondye, Papa.” (1 Korentyen 8:5, 6) Sa “sel Bondye” i Zeova, Kreater tou keksoz. (Deterononm 6:4; Revelasyon 4:11) Zezi ti fer referans lo li konman “mon Bondye, ki osi zot Bondye.” (Zan 20:17) I ti dakor avek Moiz, ki oparavan ti’n dir: “Zeova i sa vre Bondye; napa okenn lezot apard ki li.” (Deterononm 4:35) Zeova i pli siperyer ki okenn lezot keksoz ki ganny adore, tel parey zidol, imen ki ganny konsidere konman bondye, ouswa son lennmi Satan Dyab, ki ‘bondye sa syek.’ (2 Korentyen 4:3, 4) Kontrerman avek tousala, Zeova i sa “sel vre Bondye” parey Zezi ti apel li.—Zan 17:3.

2. Anmezir ki nou aprann konsernan Bondye, ki lefe sa i kapab annan lo nou lavi?

² Bann dimoun rekonesan ki aprann konsernan bann kalite atiran Bondye, osi byen sa ki i’n fer e pou fer pour nou, i ganny atire ver li. Anmezir ki zot lanmour pour Zeova i agrandi, zot santi zot pouse pour glorifye li. Konman? En fason pour fer sa se par koz lo li avek lezot. Romen 10:10 i dir: “Sa ki anons avek son labous pou ganny sove.” En lot fason se par imit li an parol e an aksyon. Efezyen 5:1 i dir: “Parski zot bann zanfan ki Bondye i kontan, fer tou zot zefor pour fer tou parey li.” Pour kapab fer sa pli byen, nou bezwen konn bann vre kalite Zeova.

3. Lekel bann kalite prensipal Bondye?

³ Partou dan Labib, i annan bokou deklarasyon ki revel bann kalite Bondye ki remarkab. Son kat kalite prensipal se lasazes, lazistis, pwisans, ek lanmour. ‘Avek li i annan lasazes.’ (Zob 12:13) “Tou son bann semen i lazistis.” (Deterononm 32:4) I “for an pwisans.” (Izai 40:26) “Bondye i lanmour.” (1 Zan 4:8) Toutfwa, parmi sa kat kalite prensipal Bondye, lekel ki pli remarkab, sa enn ki plis ki tou lezot kalite i idantifye ki kalite Bondye i ete?

“Bondye i Lanmour”

4. Lekel parmi bann kalite Bondye ki ti motiv li pour kree liniver ek tou bann keksoz vivan?

⁴ Reflesir lo kwa ki ti motiv Zeova pour kree liniver ek bann kreatir spirityel ek bann imen entelizan. Eski ti son lasazes oubyen son pwisans? Non, kantmenm Bondye ti servi zot, zot pa ti sa lafors ki ti motiv li. E son lazistis pa ti demande ki i partaz kado lavi. Plito, gran lanmour Bondye ti ensit li pour partaz lazwa pour viv konman en dimoun entelizan avek lezot. Lanmour ti pous li pour plàn ki bann imen obeisan i viv pour touzour dan Paradi. (Zenez 1:28; 2:15) Lanmour in fer li fer en laranzman pour retir kondannasyon ki pese Adan in anmennen lo limanite.

5. Dapre Labib, Zeova i personnifikasyon ki kalite, e akoz?

⁵ Anfet, parmi tou bann kalite ki Bondye i annan, sa enn pli remarkab se son lanmour. I son karakteristik oubyen son natir. Menm si son lasazes, lazistis, ek pwisans i enportan, Labib pa zanmen dir ki Zeova i okenn sa bann kalite. Me i dir ki i lanmour. Wi, Zeova i personnifikasyon lanmour. Sa lanmour ki ganny gide par prensip, non pa par lemosyon. Lanmour Bondye i ganny gouvernen par bann prensip laverite ek ladrwatir. I pli bon kalite lanmour, ki Zeova Bondye li menm i demontre. En tel lanmour pa ditou egois e i toultan ganny akonpannyen par aksyon ki demontre klerman sa lanmour.

6. Kwa ki fer li posib pour nou imit Bondye, kantmenm i pli siperyer ki nou?

⁶ Se sa kalite merveye ki apel lanmour ki fer nou kapab imit en tel Bondye. Konman bann senp imen, enparfe, ki annan tandans pour fer bann fot, nou kapab panse ki nou pa pou zanmen kapab reisi imit Bondye. Me la en lot legzanp gran lanmour Zeova: I rekonnet nou bann limit e i pa ekspekte perfeksyon avek nou. I konnen ki ozordi nou lwen avek perfeksyon. (Psonm 51:5) Se pour sa ki Psonm 130:3, 4 i dir: “Si ou ti vey bann fot, O Ya, O Zeova, lekel ki ti pou kapab debout? Parski avek ou i annan vre pardon.” Wi, Zeova i “en Bondye mizerikord e konpasyon, pa ankoler vitman, e ris an labonte leker.” (Egzod 34:6) “Ou, O Zeova, ou bon e pare pour pardonnen.” (Psonm 86:5) Pa sa i ankourazan! Pa i rekonfortan pour servi sa Bondye merveye e pour eksperyans son soutyen ranpli avek lanmour ek mizerikord!

7. Konman lanmour Zeova i kapab ganny trouve dan son travay kreasyon?

⁷ Lanmour Zeova i kapab ganny trouve dan son travay kreasyon. Mazin sa kantite keksoz ki Zeova in donn nou pour nou rezwir, tel parey bann zoli montanny, lafore, lak, ek bann losean. I’n donn nou en gran varyete nouritir pour satisfer nou gou e soutenir nou. Osi, Zeova in donn nou en gran kantite fler ki zoli e santi bon, osi byen bann zannimo vreman enkrwayab ki i’n kree. I’n fer bann keksoz ki ti pou fer plezir imen, kantmenm i pa ti oblize fer li. I vre, vi ki nou pe viv dan sa monn mesan dan nou kondisyon enparfe, nou pa kapab rezwir son kreasyon plennman. (Romen 8:22) Me zis mazin sa ki Zeova pou fer pour nou dan Paradi! Sa psalmis i asir nou: “Ou pe ouver ou lanmen e satisfer dezir [apropriye] tou kreatir vivan.”—Psonm 145:16.

8. Ki legzanp pli remarkab lanmour Zeova pour nou?

⁸ Ki legzanp pli remarkab lanmour Zeova pour limanite? Labib i eksplike: “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Eski akoz labonte zonm ki Zeova ti fer sa? Romen 5:8 i reponn: “Bondye in prouv son lanmour pour nou: kan nou ti ankor peser, Kris in mor pour nou.” Anfet, Bondye in anvoy son Garson parfe lo later pour donn son lavi konman en sakrifis ranson pour reaste nou anba kondannasyon pese ek lanmor. (Matye 20:28) Sa i ouver en semen pour bann dimoun ki kontan Bondye ganny lavi eternel. Erezman, lanmour Bondye i pour tou sa bann ki oule fer son lavolonte, akoz Labib i dir nou: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”—Akt 10:34, 35.

9. Lefe ki Zeova in donn son Garson konman en ranson pour nou, konman ki sa i devret enfliyans nou?

⁹ Lefe ki Zeova in donn son Garson konman en ranson pour nou, e ki alor ouver semen pour ganny lavi eternel, konman sa i enfliyans lafason ki nou servi nou lavi konmela? I devret aprofondi nou lanmour pour sa vre Bondye, Zeova. Anmenmtan, i devret fer nou anvi ekout Zezi, ki reprezant Bondye. ‘[Zezi] in mor pour tou bann vivan pour ki bann vivan i nepli viv pour zot menm, me pour li ki’n mor e resisite pour zot.’ (2 Korentyen 5:15) Pa i en plezir pour swiv lepa Zezi, vi ki i ti egzanpler dan imit lanmour ek konpasyon Zeova! Sa in ganny demontre par sa ki Zezi ti dir avek bann ki ti annan limilite: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.”—Matye 11:28-30.

Montre Lanmour pour lezot

10. Nonm serten fason nou kapab montre lanmour pour lezot Kretyen?

¹⁰ Konman nou kapab montre ki nou annan sa kalite lanmour ki Zeova ek Zezi i annan pour nou, pour lezot Kretyen? Remark sa kantite fason ki nou kapab fer sa: “Lanmour i pasyan, e i bon; lanmour pa zalou ou vant son prop lekor. I pa arogan e i pa fer nanryen ki fer onte. Lanmour pa rod son prop lentere; i pa pran lakoler, e i pa gard rankin. Lanmour pa montre kontantman dan lenzistis, me i rezoui dan laverite. Lanmour i pardonn tou, i krwar tou, i esper tou, i siport tou. Lanmour i reste pour touzour.”—1 Korentyen 13:4-8; 1 Zan 3:14-18; 4:7-12.

11. Pour ki ankor nou devret montre lanmour, e konman?

¹¹ Pour lekel ankor nou devret montre lanmour, e konman? Zezi ti dir: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Sa i enplik partaz bon nouvel lo sa nouvo monn merveye Bondye avek sa bann ki pa ankor vin nou bann konpanyon Kretyen. Zezi ti klerman montre ki nou pa devret kontan zis bann ki partaz menm krwayans avek nou, akoz i ti dir: “Si zot kontan zis bann ki kontan zot, ki rekonpans zot pou gannyen? Eski bann kolekter taks pa i fer parey! E si zot koz zis avek zot bann frer, eski zot in fer keksoz ekstraordiner? Eski bann payen pa i fer parey!”—Matye 5:46, 47; 24:14; Galat 6:10.

“Mars onon Zeova”

12. Akoz non Bondye i aplik zis pour li tousel?

¹² En lot laspe enportan pour glorifye sa vre Bondye se konnen, servi, e ansenny lezot son non inik, Zeova. Sa psalmis ti eksprim sa ve senser: “Ki dimoun i kapab konnen ki ou, ki ou non i Zeova, se ou tousel ki Tre O lo tou later.” (Psonm 83:18) Non Zeova i vedir “I fer arive.” I sa Enn ki fer bann plan e ki toultan akonpli zot. E zis vre Bondye ki annan drwa port sa non, akoz imen pa zanmen kapab asire ki zot bann zefor pou reisi. (Zak 4:13, 14) Zis Zeova tousel ki kapab dir ki son parol “pou annan en sikse serten” dan sa ki i’n anvoye. (Izai 55:11) Bokou i santi zot touse oprofon kan zot vwar pour premye fwa non Bondye dan zot Labib e aprann ki i vedir. (Egzod 6:3) Me zot pou benefisye par sa konnesans si selman zot “mars onon Zeova . . . pour touzour.”—Mika 4:5.

13. Ki i enplike dan konn non Zeova e mars an son non?

¹³ Konsernan non Bondye, Psonm 9:10 i dir: “Sa bann ki konn ou non pou met konfyans dan ou.” Sa i enplik plis ki zis konn non Zeova, parski konn non Zeova pa neseserman vedir annan konfyans dan li. Konn non Bondye i vedir rekonnet ki kalite Bondye Zeova i ete, respekte son lotorite, obeir son komannman, met nou konfyans dan li dan tou keksoz. (Proverb 3:5, 6) Pareyman, mars onon Zeova i enplik dedye nou lavi avek li e reprezant li konman enn son adorater, e vreman servi nou lavi an armoni avek son lavolonte. (Lik 10:27) Eski ou pe fer sa?

14. Si nou anvi servi Zeova pour touzour, kwa ki neseser apard ki senpleman santi nou oblize servi li?

¹⁴ Si nou anvi servi Zeova pour touzour, nou motivasyon pa devret senpleman ki nou santi nou oblize pour fer li. Zapot Pol ti ankouraz Timote, ki ti’n servi Zeova pour bokou lannen: “Egzers ou lekor avek latasman avek Bondye konman ou bi.” (1 Timote 4:7, NW) Latasman i sorti dan en leker ki ranpli avek lapresyasyon pour sa dimoun ki pe resevwar sa latasman. “Latasman avek Bondye” se kan ou eksprim profon loner ek respe pour Zeova. Ler en dimoun i annan latasman avek Bondye, sa i evidan par en lanmour profon ki sa dimoun i demontre pour Zeova akoz en sitan gran lestim pour li ek son bann fason fer. I fer nou anvi ki tou dimoun i tret son non avek en gran respe. Nou devret kiltiv latasman avek Bondye dan nou lavi si nou pou mars onon Zeova, sa sel vre Bondye, pour touzour.—Psonm 37:4; 2 Pyer 3:11.

15. Ki mannyer nou kapab donn Bondye en latasman pour li tousel?

¹⁵ Pour servi Bondye dan en fason akseptab, nou bezwen donn li en devosyon total dan nou ladorasyon, vi ki i ‘en Bondye ki demann en latasman pour li tousel.’ (Egzod 20:5) Nou pa kapab kontan Bondye e anmenmtan kontan sa monn mesan, ki Satan i son bondye. (Zak 4:4; 1 Zan 2:15-17) Zeova i konnen egzakteman ki kalite dimoun sakenn ant nou pe esey vini. (Zeremi 17:10) I vwar si nou vreman kontan ladrwatir e i pou ed nou andir nou bann leprev dan lavi toulezour. Par siport nou avek son lespri sen pwisan, i pou ed nou pour ranport laviktwar lo mesanste ki pe anvair lemonn. (2 Korentyen 4:7) Osi, i pou ed nou mentenir nou lesperans ferm pour lavi eternel dan en paradi lo later. Pa sa i en lesperans merveye! Nou devret annan gran lapresyasyon pour sa e volonterman servi sa vre Bondye, Zeova, ki’n fer lavi eternel posib.

16. Ki ou devret anvi fer, ansanm avek plizyer milyon lezot dimoun?

¹⁶ Plizyer milyon dimoun dan lemonn antye in aksepte avek lazwa lenvitasyon sa psalmis ki ti ekri: “O glorifye Zeova avek mwan, ou pep, e annou loue son non ansanm.” (Psonm 34:3) Zeova i envit ou pour vin parmi sa gran lafoul ki pe ogmante dan tou nasyon, ki pe glorifye e loue li.

Revizyon

• Ki kalite Bondye Zeova i ete? Ki mannyer nou benefisye par en konprenezon kler lo son bann kalite?

• Konman nou kapab ed lezot dimoun pour aprann laverite konsernan Bondye?

• Ki i enplike dan konn non Zeova e mars an son non?

[Portre lo paz 14]

Zeova, dan son gran lanmour, ‘pou ouver son lanmen e satisfer dezir tou kreatir vivan’