Sapit Sis
Kestyon ki nou tou nou bezwen reponn
1, 2. (a) Ki kestyon Satan ti souleve an Edenn? (b) Par sa ki i ti dir, konman ki sa kestyon ti enplike?
OU ENPLIKE dan en kestyon pli enportan ki limanite pe fer fas avek. Ou pozisyon konsernan sa kestyon pou determin ou lavenir eternel. Sa kestyon ti ganny souleve ler rebelyon ti eklate an Edenn. Pandan sa letan, Satan ti demann Ev: “Eski i vre ki Bondye in dir ki zot pa devret manz [fri sorti] dan tou pye dibwa sa zarden?” I ti reponn ki konsernan en pye dibwa Bondye ti’n dir: “Zot pa devret manze . . . pour ki zot pa mor.” Apre Satan ti direkteman akiz Zeova konmkwa i ti pe koz manti, an dizan ki ni lavi Ev ni lavi Adan pa ti depann lo lobeisans anver Bondye. Satan ti deklare ki Bondye ti pe refiz son bann kreatir en bon keksoz—abilite pour etablir zot prop standar dan lavi. Satan ti pretann: “Bondye i konnen, ki sa zour menm ki zot pou manz li, zot lizye pou sertennman ouver e sertennman zot pou vin parey Bondye, pour konn sa ki bon ek sa ki move.”—Zenez 3:1-5.
2 Annefe, Satan ti pe dir ki bann imen ti pou pli byen par fer zot prop desizyon olye ki obeir bann lalwa Bondye. I ti alor kestyonn lafason ki Bondye i dirize. Sa ti soulev sa kestyon tre enportan lo souvrennte iniversel Bondye, savedir, son drwa pour dominen. Sa kestyon ti ganny souleve: Eski zonm pou pli byen lo zot menm oubyen zot bezwen depan lo gidans Zeova? Zeova ti’n kapab egzekit Adan ek Ev toudswit, me sa pa ti pou regle sa kestyon konsernan souvrennte dan en mannyer satisfezan. Par les sosyete imen devlope pour en bon pe letan, Bondye ti pou kapab demontre rezilta ki lendepandans avek li ek son bann lalwa ti pou anmennen.
3. Ki dezyenm kestyon ki Satan ti souleve?
3 Latak Satan lo drwa Zeova pour dominen pa’n aret avek sa ki ti arive an Edenn. I ti senm doutans konsernan fidelite lezot anver Zeova. Sa ti vin en dezyenm kestyon ki ti relye tre pros avek sa enn premye. Sa kestyon ti al ziska pour enkli bann desandans Adan ek Ev ek tou bann garson spirityel Bondye, menm Garson premye ne Zeova ki i telman kontan. Par egzanp, pandan letan Zob, Satan ti konteste ki sa bann ki servi Zeova i fer li, non pa akoz lanmour pour Bondye ek son fason dirize, me pour bann rezon egois. I ti argimante ki kan zot pou eksperyans bann difikilte, zot tou zot pou soumet avek zot bann dezir egois.—Zob 2:1-6; Revelasyon 12:10.
Ki Listwar in prouve
4, 5. Ki listwar in prouve konsernan si zonm i kapab diriz son prop lepa?
4 En pwen esansyel dan sa kestyon konsernan souvrennte i sa: Bondye pa ti kree imen avek abilite pour viv endepandan avek son dominasyon. Pour zot benefis i ti fer zot depan lo son bann lalwa drwat. Profet Zeremi ti rekonnet sa: “Mon konnen, O Zeova, ki pour zonm ki’n ganny tire dan sirfas later, son semen pa apartenir. I pa apartenir pour zonm ki pe marse pour diriz son lepa. Koriz mwan, O Zeova.” (Zeremi 10:23, 24) Alor Parol Bondye i enplor nou: “Met ou konfyans dan Zeova avek tou ou leker e pa apiy lo ou prop lentelizans.” (Proverb 3:5) Zis parey Zeova in fer limanite ganny gouvernen par son bann lalwa fizik pour reste vivan, i’n osi fer bann lalwa moral, ki si i ganny obeir, i pou kree en sosyete ki annan larmoni.
5 Evidaman, Bondye ti konnen ki lafanmiy imen pa pou zanmen kapab reisi diriz lo li menm san son dominasyon. Imen in etablir diferan sistenm politik, ekonomik e relizye, dan en lesey pour vin endepandan avek dominasyon Bondye, me zot zefor in anven. Sa bann diferan sistenm in anmenn dimoun dan konfli avek kanmarad ki pa zanmen fini, ki’n anmenn vyolans, lager, ek lanmor. “Zonm in domin zonm ver son ditor.” (Eklezyast 8:9) Se egzakteman san menm ki’n arive toudilon listwar imen. Parey i’n ganny predir dan Parol Bondye, bann move dimoun ek bann anbeter in kontinyen “fer touzour plis progre dan sa ki mal.” (2 Timote 3:13) E 20 tyenm syek, kot limanite in fer bann gran progre dan lasyans ek lendistri, i’n osi eksperyans bann dezas pli pir ki zanmen in deza arive. Sa parol dan Zeremi 10:23 in toutafe prouve ki imen pa ti’n ganny kree pour diriz son prop lepa.
6. Ki mannyer Bondye pou byento rezourd lendepandans imen avek li?
6 Bann konsekans katastrofik lendepandans zonm avek Bondye in antyerman demontre e i pou touzour demontre ki dominasyon par zonm pa zanmen kapab reisi. Dominasyon Bondye i sa sel fason pour ganny boner, linite, lasante, ek lavi. E Parol Bondye i montre ki letan pe aprose kot Zeova pou nepli tolere ki imen i viv endepandan avek li. (Matye 24:3-14; 2 Timote 3:1-5) Byento, i pou entervenir dan bann zafer imen e i pou konfirm son dominasyon lo later antye. Profesi Labib i dir: “E dan bann zour sa bann lerwa [dominasyon imen ki egziste], Bondye lesyel pou etabli en rwayonm [dan lesyel] ki pa pou zanmen ganny detri. E sa rwayonm li menm pa pou pas avek okenn lezot pep [imen pa pou zanmen domin later ankor]. I pou kraz e met en lafen avek tou sa bann rwayonm [denozour] e li menm i pou dire pour letan endefini.”—Danyel 2:44.
Sirviv dan nouvo Monn Bondye
7. Kan dominasyon Bondye pou met en lafen avek dominasyon zonm, lekel ki pou sirviv?
7 Kan dominasyon Bondye pou met en lafen avek dominasyon zonm, lekel ki pou sirviv? Labib i reponn: “Bann zonm drwat [sa bann ki siport drwa Bondye pour dominen] i sa bann ki pou reste lo later, e bann ki san repros i sa bann ki pou ganny garde. An se ki konsern bann mesan [sa bann ki pa siport drwa Bondye pour dominen], zot pou ganny retranse lo later.” (Proverb 2:21, 22) Pareyman, sa psalmis ti dir: “En pti pe letan ankor, e sa enn mesan pou nepli la . . . Bann dimoun drwat pou posed later, e zot pou reste lo la pour touzour.”—Psonm 37:10, 29.
8. Ki mannyer Bondye pou konpletman zistifye son souvrennte?
8 Apre ki sistenm Satan in ganny detri, Bondye pou entrodwir son nouvo monn, ki pou konpletman elimin vyolans, lager, lapovrete, soufrans, maladi, ek lanmor ki’n met limanite dan lesklavaz pour plizyer milye lannen. Dan en fason vreman zoli, Labib i dekrir bann benediksyon ki pe esper bann imen obeisan: “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 21:3, 4) Par mwayen son Rwayonm dan lesyel gouvernen par Zezi, Bondye pou konpletman zistifye Son drwa pour vin nou Souvren, savedir, nou Sef.—Romen 16:20; 2 Pyer 3:10-13; Revelasyon 20:1-6.
Konman serten ti reponn sa Kestyon
9. (a) Konman sa bann ki’n reste fidel avek Zeova ti vwar son parol? (b) Ki mannyer Noe ti montre son fidelite, e konman nou kapab benefisye avek son legzanp?
9 Toudilon listwar, ti annan bann zonm ek fanm fidel ki ti demontre zot fidelite anver Zeova konman zot Souvren. Zot ti konnen ki zot lavi ti depann lo ekout e obeir li. Noe ti enn sa bann dimoun. Alor Bondye ti dir avek Noe: “Lafen tou laser in vin devan mwan . . . Fer en lars pour ou.” E Noe ti soumet avek gidans Zeova. Kantmenm zot ti ganny averti, lezot dimoun dan sa letan ti viv zot lavi konmsi ti napa nanryen ekstraordiner ki ti pou arive. Me Noe ti konstri en tre gro lars e kontinyen reste okipe pour pres avek lezot konsernan bann prensip drwat Zeova. Sa resi i kontinyen par dir: “Noe ti fer tou sa ki Bondye ti’n demann li. I ti fer egzakteman parey.”—Zenez 6:13-22; Ebre 11:7; 2 Pyer 2:5.
10. (a) Ki mannyer Abraam ek Sara ti siport souvrennte Zeova? (b) Dan ki fason nou kapab benefisye avek legzanp Abraam ek Sara?
10 Abraam ek Sara ti osi demontre bann bon legzanp an rapor avek siport souvrennte Zeova, par fer tou sa ki i ti demann zot. Zot ti viv an Our bann Kaldeen, en lavil prospere. Me kan Zeova ti demann Abraam pour al dan en lot pei, en pei ki i pa ti konnen, Abraam “ti ale zis parey Zeova ti dir li.” Sara ti san dout annan en lavi konfortab—avek en lakour, bann zanmi, ek fanmiy. Toudmenm, i ti soumet avek Zeova ek son mari e i ti al Kanaan, kantmenm i pa ti konnen ki bann kondisyon ki ti pe esper li laba.—Zenez 11:31–12:4; Akt 7:2-4.
11. (a) Anba ki sirkonstans ki Moiz ti siport souvrennte Zeova? (b) Konman legzanp Moiz i kapab benefisye nou?
11 Moiz ti en lot dimoun ki ti siport souvrennte Zeova. E i ti fer sa dan bann sitiasyon byen difisil, par egzanp i ti bezwen fer fas avek Faraon, Lezip. Sa pa ti akoz Moiz ti annan konfyans dan li menm. Okontrer, i ti dout son abilite pour koz byen. Me i ti obeir Zeova. Avek sipor Zeova ek led son frer, Aaron, Moiz ti plizyer fwa delivre parol Zeova kot Faraon ki ti vreman antete. Menm serten Izraelit ti kritik Moiz severman. Me, Moiz ti fidelman fer tou sa ki Zeova ti’n demann li, e atraver li, Izrael ti ganny libere Lezip.—Egzod 7:6; 12:50, 51; Ebre 11:24-27.
12. (a) Kwa ki montre ki fidelite anver Zeova i enplik plis ki zis fer sa ki Bondye in spesifye an ekri? (b) Konman ki lapresyasyon pour sa kalite fidelite i ed nou pour aplik 1 Zan 2:15?
12 Sa bann ki ti fidel anver Zeova pa ti mazinen ki i sifi zis pour obeir sa ki Bondye in met an ekri. Kan madanm Potifar ti esey antrenn Zozef pour annan relasyon avek li, ti napa okenn komannman ki ti’n ganny met an ekri sorti kot Bondye ki ti enterdi adilter. Toudmenm, Zozef ti konn konsernan laranzman maryaz ki Zeova ti entrodwir an Edenn. I ti konsyan ki annan relasyon seksyel avek madanm en lot msye ti pou depler Bondye. Zozef pa ti enterese pour rode ziska ki degre Bondye ti pou les li vin parey bann Ezipsyen. I ti siport bann prensip Zeova par medit lo bann mannyer ki Bondye i azir avek imen e apre avek en bon konsyans aplik sa ki i ti rekonnet konman lavolonte Bondye.—Zenez 39:7-12; Psonm 77:11, 12.
13. Konman Dyab ti ganny prouve en manter dan ka (a) Zob? (b) sa trwa Ebre?
13 Sa bann ki vreman konn Zeova pa abandonn li, kantmenm zot fer fas avek bann leprev sever. Satan ti dir ki si Zob i perdi son bann byen oubyen son lasante, menm li—ki Zeova ti eksprim son laprouvasyon pour li—pou abandonn Bondye. Me Zob ti prouve ki Dyab i en manter, kantmenm Zob li menm pa ti konnen akoz bann maler ti pe anvair li. (Zob 2:9, 10) Plizyer syek plitar, Satan ki ti pe esey prouve ankor ki son largiman i vre, ti ensit en lerwa ankoler an Babilonn pour menas trwa zenn Ebre avek lanmor dan en four dife si zot pa ti ador en zimaz ki li menm sa lerwa ti’n met an plas. Lefe ki zot ti ganny forse pour swazir ant obeir komannman lerwa e obeir lalwa Zeova konsernan idolatri, zot ti fer konnen avek determinasyon ki zot servi Zeova e ki i ti zot Souvren Siprenm. Fidelite avek Bondye ti pli presye pour zot ki zot lavi!—Danyel 3:14-18.
14. Konman ki i posib pour nou konman imen enparfe prouve ki nou vreman fidel anver Zeova?
14 Dapre sa bann legzanp, eski nou devret konklir ki pour en dimoun reste fidel anver Zeova, i bezwen parfe oubyen si en dimoun in fer en fot savedir i’n konpletman fel? Ditou! Labib i dir nou ki parler Moiz ti fer serten fot. Kantmenm sa ti depler Zeova, i pa ti rezet Moiz. Bann zapot Zezi osi ti annan zot bann febles. Menm si i pran an konsiderasyon lenperfeksyon ki nou’n erite, Zeova i kontan si nou pa inyor son lavolonte par ekspre dan okenn laspe. Si par nou febles nou fer sa ki mal, i enportan ki nou repantir senserman e pa fer sa fot vin en labitid. Dan sa fason nou demontre ki nou vreman kontan sa ki Zeova i dir i byen e ay sa ki i dir i mal. Gras a nou lafwa dan sakrifis Zezi ki kouver pese, nou kapab rezwir en konsyans kler devan Bondye.—Amos 5:15; Akt 3:19; Ebre 9:14.
15. (a) Lekel parmi tou imen ki ti mentenir lentegrite parfe anver Bondye, e ki sa i prouve? (b) Konman sa ki Zezi ti fer i ed nou?
15 Me, eski sa i vedir ki i enposib pour imen annan en lobeisans parfe anver souvrennte Zeova? Pandan plis ki 4,000 an, larepons sa kestyon ti parey en “sekre.” (1 Timote 3:16) Adan, kantmenm i ti’n ganny kree parfe, pa ti donn en legzanp parfe dan latasman avek Bondye. Alor lekel ki ti pou kapab fer sa? Sertennman pa enn son desandans enparfe. Sa sel zonm ki ti kapab fer sa se Zezi Kri. (Ebre 4:15) Sa ki Zezi ti akonpli ti prouve ki Adan, ki ti dan bann kondisyon pli favorab, ti kapab mentenir en fidelite parfe si i ti anvi. Defo pa ti dan travay kreasyon Bondye. Alor, Zezi Kri i sa legzanp ki nou esey imite pa zis dan demontre nou lobeisans pour lalwa divin me osi dan demontre nou latasman personnel avek Zeova, Souvren Iniversel.—Deterononm 32:4, 5.
Ki nou Repons personnel?
16. Akoz ki nou bezwen konstaman vizilan konsernan nou latitid anver souvrennte Zeova?
16 Sakenn ant nou ozordi i bezwen reponn avek sa kestyon lo souvrennte iniversel. Si nou’n deklare ouvertman ki nou lo kote Zeova, nou vin en target Satan. I anmenn presyon sorti dan tou direksyon e i pou kontinyen fer sa ziska lafen son sistenm mesan. Fodre nou reste vizilan. (1 Pyer 5:8) Nou kondwit i montre ki kote nou pran an rapor avek sa kestyon konsernan souvrennte Zeova e lo dezyenm kestyon konsernan fidelite anver Bondye anba leprev. I pa pou bon pour nou si nou vwar kondwit enfidel konman en keksoz ki pa enportan zis akoz i komen dan lemonn. Pour reste fidel, nou bezwen esey aplik bann standar drwat Zeova dan tou laspe nou lavi.
17. Ki i annan konsernan lorizin mansonz e vole ki nou devret evit zot?
17 Par egzanp, nou pa kapab imit Satan, ki “papa tou mansonz.” (Zan 8:44) Nou bezwen koz laverite dan tou nou mannyer azir. Dan sistenm Satan, souvan bann zenn pa koz laverite avek zot paran. Me bann zenn Kretyen i devret evit sa, e alor prouve ki lakizasyon Satan konmkwa ki pep Bondye pa pou reste fidel anba leprev i fo. (Zob 1:9-11; Proverb 6:16-19) Apre i annan bann tranzaksyon biznes ki kapab endike ki en dimoun i lo kote “papa tou mansonz” olye avek Bondye laverite. Sa bann pratik nou evite. (Mika 6:11, 12) Osi, vole pa zanmen ganny aprouve, menm si en dimoun i dan bezwen oubyen si sa dimoun ki’n ganny vole i ris. (Proverb 6:30, 31; 1 Pyer 4:15) Vole i kontrer avek lalwa Bondye, menm si i en pratik komen kot nou reste oubyen si sa keksoz vole napa bokou valer.—Lik 16:10; Romen 12:2; Efezyen 4:28.
18. (a) Alafen Renny Milener Kris, ki leprev ki pou ariv lo tou imen? (b) Ki latitid nou devret kiltive konmela menm?
18 Pandan Renny Milener Kris, Satan ek son bann demon pou dan labim, zot pa pou kapab enfliyans limanite. Sa pou vreman en soulazman! Me apre sa mil an, zot pou ganny large pour en pe letan. Satan avek sa bann ki swiv li pou met presyon lo sa bann ki’n vin parfe e ki reste fidel avek Bondye. (Revelasyon 20:7-10) Si i nou privilez pour vivan pandan sa letan, ki mannyer nou pou reponn sa kestyon lo souvrennte iniversel? Vi ki sa moman tou imen pou parfe, okenn akt enfidel pou ganny fer volonterman e son rezilta pou destriksyon eternel. I tre enportan pour nou konmela menm kiltiv sa labitid pour obeir nenport lenstriksyon ki Zeova i donn nou, atraver son Parol ouswa atraver son lorganizasyon! An fezan sa, nou montre nou latasman senser anver li konman Souvren Iniversel.
Revizyon
• Ki sa kestyon enportan nou tou nou bezwen reponn? Ki mannyer nou’n ganny enplike ladan?
• Kwa ki remarkab dan lafason ki bann zonm ek fanm dan bann letan ansyen ti prouv zot fidelite pour Zeova?
• Akoz i tre enportan ki nou onor Zeova par nou kondwit sak zour?