Sapit Dis
En Rwayonm “ki pa pou zanmen ganny detri”
1. Ki fe ki’n ganny aksantye par bann levennman mondyal toudilon listwar limanite?
ZOUR apre zour, bann levennman mondyal i konfirm sa fe ki bann imen pa’n trouv boner par rezet souvrennte Zeova e esey diriz zot lekor zot menm. Napa okenn sistenm gouvernman imen ki’n nobou anmenn bann byenfe pour tou dimoun san fer okenn lapliferans. Kantmenm imen in devlop zot konnesans dan domenn lasyans lo en pli o nivo ki zanmen oparavan, zot pa’n zanmen kapab sirmont maladi oubyen met en lafen avek lanmor, pa ni menm pour en endividi. Dominasyon imen pa’n elimin lager, vyolans, krim, koripsyon, oubyen lapovrete. Bann gouvernman dominer i ankor pe domin bann dimoun dan plizyer landrwa. (Eklezyast 8:9) Teknolozi, vorasite, e linyorans i bann fakter ki kontribye pour polye later, delo, ek ler. Bann zofisye ki mal organiz lekonomi i fer difisil pour bokou dimoun obtenir bann nesesite lavi. Sa plizyer milye lannen ki zonm in dominen in fer sa fe vin evidan: “Pour zonm ki’n ganny tire dan sirfas later, son semen pa apartenir. I pa apartenir pour zonm ki pe marse pour diriz son lepa.”—Zeremi 10:23.
2. Ki sa sel solisyon pour bann problenm limanite?
2 Ki solisyon? Se Rwayonm Bondye, ki Zezi ti ansenny son bann disip pour priye: “Ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:9, 10) Rwayonm seles Bondye i ganny dekrir dan 2 Pyer 3:13 konman sa “nouvo lesyel,” ki pou diriz sa “nouvo later,” setadir sa sosyete imen drwat. Rwayonm seles Bondye i telman enportan ki Zezi ti fer li tenm prensipal son predikasyon. (Matye 4:17) I ti montre priyorite ki i devret annan dan nou lavi, ler i ti konsey nou: “Rod plito Rwayonm Bondye ek son lazistis.”—Matye 6:33.
3. Akoz aprann lo Rwayonm Bondye i en keksoz tre irzan ozordi?
3 Aprann lo Rwayonm Bondye i en keksoz tre irzan ozordi, akoz sa Rwayonm pou byento sanz fason ki later i ganny gouvernen pour touzour. Danyel 2:44 i predir: “E dan bann zour sa bann lerwa [bann gouvernman ki pe dirize konmela], Bondye lesyel pou etabli en rwayonm [dan lesyel] ki pa pou zanmen ganny detri. E sa rwayonm li menm pa pou pas avek okenn lezot pep [imen pa pou zanmen diriz later ankor]. I pou kraz e met en lafen avek tou sa bann rwayonm [prezan] e li menm i pou dire pour letan endefini.” Donk, sa Rwayonm pou met en lafen avek sa bann dernyen zour par detri sa sistenm mesan an antye. Dominasyon sa later par sa Rwayonm seles pou nepli ganny konteste. Pa nou devret rekonesan ki soulazman ki sa pou anmennen i aprezan tre pros!
4. An konneksyon avek sa Rwayonm, ki ti arive dan lesyel an 1914, e akoz sa i enportan pour nou?
4 An 1914, Zezi Kri ti ganny enstale konman Lerwa e i ti ganny otorize pour ‘al domin omilye [son] bann lennmi.’ (Psonm 110:1, 2) Sa menm lannen, “bann dernyen zour” sa sistenm mesan aktyel ti konmanse. (2 Timote 3:1-5, 13) Dan sa menm letan, bann levennman ki Danyel ti’n vwar dan vizyon profetik ti vin en realite dan lesyel. “Ansyen bann Zour,” Zeova Bondye, ti donn avek Fis de lonm, Zezi Kri, “dominasyon ek dinite ek rwayonm, pour ki bann pep, kominote nasyonal ek bann lalang, zot tou zot servi li.” Letan i ti pe raport lo sa vizyon, Danyel ti ekri: “Son dominasyon i en dominasyon endefini ki pa pou pase, e son rwayonm, i enn ki pa pou ganny retire.” (Danyel 7:13, 14) Se gras a sa Rwayonm seles dan lanmen Kris Zezi ki Bondye pou permet bann ki kontan ladrwatir pour gout bann benediksyon san limit ki i ti’n plàn kan i ti met nou premye paran dan Paradi.
5. Ki detay konsernan sa Rwayonm ki vreman enteres nou, e akoz?
5 Eski i ou dezir pour vin en size fidel sa Rwayonm? Si wi, ou pou vreman enterese dan fason ki sa gouvernman seles i organize e pe fonksyonnen. Ou pou anvi konnen ki i pe fer konmela, ki i pou akonpli dan lavenir, e ki i ekspekte avek ou. Anmezir ki ou egzamin sa Rwayonm pli oprofon, ou lapresyasyon pour li i devret grandi. Si ou byen akeyir son dominasyon, ou pou pli byen ekipe pour dir lezot konsernan bann keksoz merveye ki sa Rwayonm pou fer pour bann imen obeisan.—Psonm 48:12, 13.
Bann Dirizan Rwayonm Bondye
6. (a) Dapre Labib, lekel ki pou eksprim son drwa pour dirize atraver Rwayonm Mesyanik? (b) Ki mannyer nou ganny afekte par sa ki nou aprann konsernan sa Rwayonm?
6 Enn bann premye keksoz ki en tel egzaminasyon i revele se ki sa Rwayonm Mesyanik i en mwayen ki Zeova i servi pour eksprim son drwa pour dirize. Se Zeova ki ti donn “dominasyon ek dinite ek rwayonm” avek son Garson. Apre ki Garson Bondye ti’n ganny otorize pour konmans dirize konman Lerwa, bann lavwa dan lesyel ti fer sa deklarasyon apropriye: “Rwayonm lemonn in vin rwayonm nou Senyer [Zeova Bondye], e son Kris. E i [Zeova] pou rennyen pour touzour.” (Revelasyon 11:15) Alors tou sa ki nou remarke konsernan sa Rwayonm e sa ki i akonpli i kapab atir nou pli pros avek Zeova li menm. Sa ki nou aprann i devret devlop dan nou en dezir pour soumet avek son souvrennte pour touzour.
7. Akoz i enteres nou bokou ki Zezi Kri i Sef Adzwen Zeova?
7 Konsider, osi, lefe ki Zeova in met Zezi Kri lo tronn konman son Sef Adzwen. Etan Zouvriye Abil ki Bondye in servi pour fer later ek imen, Zezi i konn nou bann bezwen plis ki nou. Deplis, depi konmansman listwar imen, i’n demontre son ‘latasman avek bann garson zonm.’ (Proverb 8:30, 31; Kolosyen 1:15-17) Son lanmour i telman gran pour imen ki i ti personnelman vin lo later e donn son lavi konman en ranson an nou faver. (Zan 3:16) Alors, i’n fer li disponib konman en mwayen pour liber nou dan pese ek lanmor e donn nou loportinite pour ganny lavi eternel.—Matye 20:28.
8. (a) Kontrerman avek bann dominasyon imen, akoz gouvernman Bondye pou dirab? (b) Ki relasyon “lesklav fidel e pridan” i annan avek sa gouvernman seles?
8 Rwayonm Bondye i en gouvernman stab e dirab. I pou kapab dire vi ki lanmor napa okenn kontrol lo Zeova. (Abakouk 1:12) Kontrerman avek bann lerwa imen, Zezi Kri, sa enn ki Bondye in donn rwayote, i osi imortel. (Romen 6:9; 1 Timote 6:15, 16) Pou annan 144,000 dimoun ki pou asosye avek Kris lo bann tronn seles, bann serviter fidel Bondye sorti dan “tou ras, tou langaz, tou pep ek tou nasyon.” Sa bann osi i ganny lavi imortel. (Revelasyon 5:9, 10; 14:1-4; 1 Korentyen 15:42-44, 53) Gran mazorite zot i deza dan lesyel, e larestan zot i ankor lo later ki denozour i form “lesklav fidel e pridan,” ki pe fidelman promouvwar bann lentere sa Rwayonm lo later.—Matye 24:45-47, NW.
9, 10. (a) Ki bann tandans koronpi ki koz divizyon ki sa Rwayonm pou retire? (b) Si nou pa anvi vin lennmi Rwayonm Bondye, ki lasosyasyon nou devret evite?
9 Tre byento, dan son letan fikse, Zeova pou anvoy son bann larme an aksyon pour netway later. Zot pou detri pour touzour sa bann imen ki deside pour refize rekonnet son souvrennte e ki mepriz bann dispozisyon plen avek lanmour ki i fer atraver Zezi Kri. (2 Tesalonisyen 1:6-9) Sa pou zour Zeova, sa moman ki lontan nou ti pe espere pour li ganny zistifye konman Souvren Iniversel. “Gete! Zour Zeova pe vini, kriyel avek firer ensi ki lakoler brilan, . . . pour ki i detri bann peser dan sa pei.” (Izai 13:9) “Sa zour i en zour firer, en zour ladetres ek langwas, en zour tanpet ek dezolasyon, en zour fernwar ek teneb, en zour nyaz ek teneb epe.”—Tsefanya 1:15.
10 Fo relizyon ek tou bann gouvernman imen ek zot larme, ki’n ganny kontrole par sef mesan e envizib sa monn, pou ganny detri pour touzour. Tou bann ki asosye avek sa monn par pourswiv en lavi egois, dezonnet, e imoral pou ganny detri. Satan avek son bann demon pou ganny anprizonnen pour mil an, e sa pou anpes zot annan okenn kontakt avek zabitan later. Rwayonm Bondye pou apre annan kontrol total lo bann zafer later. Vreman sa pou en soulazman pour tou bann ki kontan ladrwatir!—Revelasyon 18:21, 24; 19:11-16, 19-21; 20:1, 2.
Bann Lobzektif sa Rwayonm —Konman i ganny akonpli
11. (a) Konman Rwayonm Mesyanik pou akonpli plan Zeova pour later? (b) Ki dominasyon Rwayonm pou vedir pour sa bann dimoun ki pou viv lo later dan sa letan?
11 Rwayonm Mesyanik pou antyerman akonpli plan orizinal Bondye pour later. (Zenez 1:28; 2:8, 9, 15) Ziska prezan, imen pa’n kapab siport sa plan. Sepandan, “sa nouvo monn ki pe vini” pou ganny kontrole par Fis de lonm, Zezi Kri. Tou bann ki sirviv legzekisyon zizman Zeova lo sa vye sistenm pou travay dan linite anba direksyon Kris, Lerwa, par fer tou sa ki i demande avek lazwa, afen ki later antye i vin en paradi. (Ebre 2:5-9) Tou imen pou rezwir travay zot lanmen e profit plennman prodiksyon later an labondans.—Psonm 72:1, 7, 8, 16-19; Izai 65:21, 22.
12. Konman bann size Rwayonm pou ganny ede pour rezwir en lespri ek en lekor parfe?
12 Kan Adan ek Ev ti ganny kree, zot ti parfe, e ti plan Bondye pour ki later i ganny ranpli avek zot desandans, e pour zot tou rezwir en lespri ek lekor parfe. Anba dominasyon sa Rwayonm, sa plan pou vin en realite manifik. Sa i enplik retir tou lefe pese, e alor dan sa ka, Kris pa servi zis konman Lerwa me osi konman Gran Pret. Avek pasyans, i pou ed son bann size obeisan pour benefisye avek valer sakrifis son prop lavi imen ki efas pese.
13. Ki bann byenfe fizik ki pou ganny realize anba dominasyon Rwayonm?
13 Anba dominasyon Rwayonm, bann zabitan later pou apresye bann byenfe fizik merveye. “Sa letan lizye bann aveg pou ganny ouver, e zorey bann sourd pou ganny debouse. Sa letan sa enn ki bwate pou grenpe parey en serf, e lalang sa enn ki kozpa pou pous bann kriye lazwa.” (Izai 35:5, 6) Lapo ki’n defigire par lavyeyes oubyen maladi pou vin pli fre parey pour en zanfan, e bann defayans kronik pou ganny ranplase par en bon lasante ranpli avek viger. “Ki son laser [lapo] i vin pli fre ki dan son zenes; ki i reganny viger bann zour son zenes.” (Zob 33:25) Sa zour pou arive kan personn pou napa rezon pour dir, “Mon malad.” Akoz? Parski bann imen ki annan lakrent pour Bondye pou ganny soulaze avek fardo pese ek son bann konsekans terib. (Izai 33:24; Lik 13:11-13) Wi, Bondye “pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”—Revelasyon 21:4.
14. Pour imen vin parfe, ki sa i enplike?
14 Sepandan, vin parfe i enplik plis ki annan en lekor ek en lespri ki an bonn sante. I enkli byen reflekte bann kalite Zeova, vi ki nou’n ganny kree ‘dan zimaz Bondye, dapre son resanblans.’ (Zenez 1:26) Pour nobou ariv koumsa, bokou ledikasyon i neseser. Dan sa nouvo monn, “pou annan ladrwatir.” Alor, parey Izai ti predir, “ladrwatir i sa ki bann zabitan later prodiktif pou sertennman aprann.” (2 Pyer 3:13, NW; Izai 26:9) Sa kalite i anmenn lape—ant dimoun tou ras, parmi bann zanmi entim, ant bann manm fanmiy e, sirtou avek Bondye li menm. (Psonm 85:10-13; Izai 32:17) Sa bann ki aprann ladrwatir pou progresivman ganny edike dapre sa ki lavolonte Bondye i ete pour zot. Anmezir ki lanmour pour Zeova i ganny anrasinen byen profon dan zot leker, zot pou swiv son bann prensip dan tou laspe zot lavi. Zot pou kapab dir parey Zezi ti dir, ‘mon touzour fer sa ki fer mon papa plezir.’ (Zan 8:29) Pa lavi pou gou kan sa pou vin en realite pour tou imen!
Bann Lakonplisman ki deza evidan
15. An servan sa bann kestyon dan sa paragraf, met lanfaz lo bann lakonplisman sa Rwayonm e montre ki nou devret pe fer konmela.
15 Bann lakonplisman enpresyonan Rwayonm Bondye ek son bann size i evidan. Sa bann kestyon ek verse Labib swivan pou fer nou rapel serten sa bann lakonplisman, ensi ki bann keksoz ki bann size sa Rwayonm i kapab e devret pe fer konmela menm.
Kont lekel ki sa Rwayonm ti premyerman pran aksyon, e avek ki rezilta? (Revelasyon 12:7-10, 12)
Apre ki Zezi ti ganny entronize, larestan ki group ki ti konmans ganny rasanble? (Revelasyon 14:1-3)
Ki travay ki Zezi ti predir i pou fer apre konmansman gran ladetres, parey i ganny rikorde dan Matye 25:31-33?
Ki travay preliminer ki pe ganny akonpli denozour? Lekel ki pe partisip ladan? (Psonm 110:3; Matye 24:14; Revelasyon 14:6, 7)
Akoz bann adverser politik e relizye pa’n kapab aret travay predikasyon? (Zekarya 4:6; Akt 5:38, 39)
Ki bann sanzman ki’n arive dan lavi sa bann ki soumet avek dominasyon Rwayonm? (Izai 2:4; 1 Korentyen 6:9-11)
Rwayonm pour Mil An
16. (a) Ki kantite letan Kris pou dirize? (b) Ki bann keksoz merveye ki pou ganny fer pandan e apre sa letan?
16 Apre ki Satan ek son bann demon in ganny zete dan labim, Zezi Kri ek son 144,000 asosye pou dirize konman lerwa ek pret pour mil an. (Revelasyon 20:6) Pandan sa peryod, imen pou gradyelman vin parfe, vi ki pese ek lanmor Adamik pou ganny eliminen pour touzour. Alafen son Renny Milener, apre ki i’n fer son devwar avek sikse konman Lerwa ek Pret Mesyanik, Zezi “pou remet Rwayonm” avek son Papa, e “alor Bondye i ava tou pour tou dimoun.” (1 Korentyen 15:24-28) Apre sa, Satan pou ganny large pour en pe letan pour teste bann imen ki’n ganny sove akoz zot siport souvrennte iniversel Zeova. Apre ki sa tes final i konplete, Zeova pou detri Satan ek bann rebel ki’n al lo son kote. (Revelasyon 20:7-10) Sa bann ki siport souvrennte Zeova—son drwa pour dirize—pou’n demontre antyerman zot fidelite ferm. Zot pou apre antre dan en relasyon apropriye avek Zeova, ganny aksepte par li konman son bann garson ek fiy, divinman aprouve pour lavi eternel.—Romen 8:21.
17. (a) Ki pou arive avek sa Rwayonm alafen sa mil an? (b) Dan ki sans ki sa Rwayonm “pa pou zanmen ganny detri”?
17 Alor, rol Zezi ek son 144,000 asosye pou sanze an relasyon avek later. Ki zot pou fer apre sa mil an? Labib pa dir nanryen lo la. Me si nou fidelman siport souvrennte Zeova, nou pou vivan alafen sa Renny Milener pour vwar ki Zeova in plàn pour zot ensi ki pour son liniver enpresyonan. Toutfwa, renny milener Kris “pa pou pase” e son Rwayonm “pa pou ganny retire.” (Danyel 7:14) Dan ki sans? En fakter se ki, sa lotorite ki dominen pa pou ganny pase dan lanmen lezot ki annan diferan bi, vi ki Zeova ki pou Sef. Osi, sa Rwayonm “pa pou zanmen ganny detri” parski son bann lakonplisman pou dirab pour touzour. (Danyel 2:44) E sa Lerwa ek Pret Mesyanik ek son bann lerwa ek pret asosye pou ganny onore pour touzour pour zot servis fidel ki zot in rann Zeova.
Revizyon
• Akoz Rwayonm Bondye i sel solisyon pour problenm limanite? Kan ki Lerwa Rwayonm Bondye ti konmans dirize?
• Kwa ki atir ou plis konsernan Rwayonm Bondye e sa ki i pou akonpli?
• Ki bann lakonplisman sa Rwayonm ki nou deza kapab vwar, e ki par nou annan ladan?
[Portre lo paz 93]
Anba Rwayonm Bondye, tou dimoun pou aprann ladrwatir