Sapit Onz
‘Kontinyen rod plito Rwayonm’
1. (a) Akoz Zezi ti ankouraz sa bann ki ti pe ekout li pour rod plito Rwayonm? (b) Ki kestyon nou merit demann nou lekor?
PLIS ki 1,900 an pase dan en diskour an Galile, Zezi ti ankouraz sa bann ki ti pe ekout li pour: ‘Kontinyen rod plito Rwayonm Bondye ek son lazistis.’ Akoz en tel irzans? Eski pa sa moman pour Kris resevwar Rwayonm ti bokou syek plitar? Wi, me Rwayonm Mesyanik pou sa mwayen par ki Zeova pou zistifye son souvrennte e akonpli son plan manifik pour later. Okenn dimoun ki vreman konpran lenportans sa bann keksoz, pou met Rwayonm premye dan son lavi. Si sa ti leka dan premye syek, konbyen plis i devret ete ozordi, la ki Kris in ganny kouronnen konman Lerwa! Alor kestyon se, Eski mon fason viv i montre ki mon pe rod Rwayonm Bondye premye?—Matye 6:33.
2. Ki bann keksoz ki dimoun an zeneral pe rode avek lantouzyasm?
2 Denozour, plizyer milyon dimoun atraver lemonn pe, annefe, rod plito Rwayonm. Zot pe montre zot sipor pour dominasyon Rwayonm par santre zot lavi lo fer lavolonte Zeova, apre ki zot in dedye zot lavi avek li. Lo lot kote, lamazorite dimoun i enterese pour rod bann keksoz dan lavi toulezour. Dimoun pe tay deryer larzan ek bann byen personnel e osi plezir ki larzan i kapab aste. Ouswa zot dedye tou zot lenerzi pour zot mont pli o dan zot karyer. Zot fason viv i montre ki zot enterese zis avek zot prop lekor, bann keksoz materyel, ek plezir. Zot met Bondye dan dezyenm plas, si aprezan zot krwar dan li.—Matye 6:31, 32.
3. (a) Ki kalite larises Zezi ti ankouraz son bann disip pour rode, e akoz? (b) Akoz i pa neseser pour tro trakas nou avek bann keksoz materyel?
3 Sepandan, Zezi ti donn son bann disip sa konsey: “Pa akimil zot larises lo later,” vi ki okenn sa bann keksoz pa dirab. “Plito,” i ti dir, “akimil zot larises dan lesyel” par servi Zeova. Zezi ti ankouraz son bann disip pour gard zot lizye “senp” (NW) par fikse zot latansyon ek lenerzi lo fer lavolonte Bondye. “Ou pa kapab servi Bondye ek larises an menm-tan,” i ti dir zot. Me konsernan bann bezwen materyel—manze, lenz, ek landrwa reste? “Pa bezwen trakase,” Zezi ti konseye. I ti diriz zot latansyon lo bann zwazo—Bondye i nouri zot. Zezi ti ankouraz son bann disip pour pran legzanp lo bann fler—Bondye i sanz zot. Eski pa bann imen entelizan ki servi Zeova i annan plis valer ki okenn sa bann keksoz? “Rod plito Rwayonm Bondye ek son lazistis,” Zezi ti dir, e ou a ganny “tou lezot keksoz osi.” (Matye 6:19-34) Eski ou aksyon i montre ki ou krwar sa?
Pa les nanryen etouf Laverite Rwayonm
4. Si en dimoun i met tro bokou lanfaz lo bann keksoz materyel, ki rezilta sa i kapab annan?
4 I normal pour nou konsernen avek annan ase pour satisfer nou prop bezwen materyel e pour nou fanmiy. Si en dimoun i tro konsernen avek bann keksoz materyel, alor, rezilta i kapab katastrofik. Kantmenm i kapab pretann pour krwar dan Rwayonm, si dan son leker i met lezot keksoz premye, laverite Rwayonm pou ganny etoufe. (Matye 13:18-22) Par egzanp, en zour en zennonm ris ti demann Zezi: “Ki mon bezwen fer pour ganny lavi eternel?” I ti annan en bon moralite e i ti tret lezot byen, me i ti tro atase avek son bann byen materyel. I pa ti pou kapab abandonn sa bann byen materyel pour vin en disip Zezi. Alor i ti les pase en loportinite ki ti pou kapab fer li viv avek Kris dan Rwayonm seles. Sa ti fer Zezi dir: “Konman i vreman difisil pour en dimoun ris antre dan Rwayonm Bondye!”—Mark 10:17-23.
5. (a) Ki bann keksoz ki Pol ti ankouraz Timote pour kontant li avek, e akoz? (b) Konman ki Satan i servi “lanmour larzan” konman en pyez destriktif?
5 Plizyer lannen plitar, zapot Pol ti ekri Timote, ki ti sa letan an Efez, en sant komersyal prospere. Pol ti rapel li: “Nou pa’n vin avek nanryen dan lemonn, e nou pa pou kapab anmenn nanryen avek nou. Alor si nou annan manze ek lenz sa i ase.” I byen pour travay pour fourni “manze ek lenz” pour nou lekor ek nou fanmiy. Me Pol ti averti: “Me bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler.” Satan i rize. Okonmansman i kapab atir en dimoun dan bann pti fason. Sa i kapab swiv par presyon ki pli for, petet en loportinite pour ganny en promosyon oubyen en pli bon louvraz ki byen peye me ki demann letan ki sa dimoun ti’n rezerve pour bann aktivite spirityel. Amwen ki nou reste vizilan, “lanmour larzan” i kapab etouf bann keksoz bokou pli enportan ki annan pour fer avek bann lentere Rwayonm. Pol ti met li koumsa: “Serten dimoun, pour posed larzan in egare lwen avek lafwa e zot in met zot lekor dan en kantite tourman.”—1 Timote 6:7-10.
6. (a) Pour evite tonm dan pyez materyalis, ki nou bezwen fer? (b) Ki konfyans nou kapab annan nenport ki sitiasyon ekonomik sa monn i kapab ladan ozordi?
6 Avek lanmour senser pour son frer Kretyen, Pol ti ankouraz Timote: “Evit tou sa bann keksoz” e “konbat sa bon konba dan lafwa.” (1 Timote 6:11, 12) Nou bezwen fer bokou zefor si nou anvi evite ganny antrennen par fason viv materyalis sa monn otour nou. Me si nou fer zefor entans an armoni avek nou lafwa, Zeova pa pou zanmen abandonn nou. Kantmenm pri lavi i tre o e mank lanplwa i komen, i pou fer sir ki nou annan sa ki nou vreman bezwen. Pol ti ekri: “Pa les lanmour pour larzan domin zot lavi, me kontant zot avek sa ki zot annan, parski Bondye ti dir: ‘Mon pa pou zanmen negliz ou, mon pa pou zanmen abandonn ou.’ Pour sa rezon, nou kapab dir avek kouraz: ‘Senyer i mon sekour, mon pa per personn. Ki dimoun i kapab fer mwan?’” (Ebre 13:5, 6) E Lerwa David ti ekri: “Mon ti en zennonm, mon’n menm vin vye, e pourtan mon pa’n vwar okenn dimoun drwat ganny abandonnen konpletman, ni menm son desandans pe rod dipen.”—Psonm 37:25.
Legzanp bann premye Disip
7. Ki lenstriksyon konsernan predikasyon ki Zezi ti donn son bann disip, e akoz i ti apropriye?
7 Apre ki Zezi ti’n donn son bann zapot formasyon apropriye, i ti anvoy zot an Izrael pour pres bon nouvel e deklare: “Rwayonm lesyel i pros!” Sa ti en mesaz enpresyonan! Zezi Kri, Lerwa Mesyanik, ti omilye zot. Vi ki sa bann zapot ti pe dedye zot lekor pour servis Bondye, Zezi ti ankouraz zot pour annan konfyans ki Bondye pou pran swen avek zot. Alor i ti dir: “Pa bezwen anmenn nanryen avek zot, ni baton, ni sak, ni dipen, ni larzan, e pa menm en dezyenm resanz. E dan nenport ki lakaz ki zot antre, reste lanmenm ziska ler zot kit sa landrwa.” (Matye 10:5-10; Lik 9:1-6) Zeova ti pou fer sir ki zot bezwen ti pou ganny satisfe par bann lezot Izraelit, vi ki lospitalite pour bann etranze ti en koutim pour zot.
8. (a) Zis avan son lanmor, akoz Zezi ti donn nouvo lenstriksyon konsernan predikasyon? (b) Kwa ki bann disip Zezi ti pou kontinyen met premye dan zot lavi?
8 Plitar, zis avan son lanmor, Zezi ti averti son bann zapot ki dan lavenir zot ti pou travay anba bann sitiasyon diferan. Akoz lopozisyon ofisyel kont zot aktivite, lospitalite ti kapab pa sitan ganny byen demontre anver zot an Izrael. Deplis, zot ti pou byento anmenn mesaz Rwayonm kot bann non Zwif. Aprezan zot ti bezwen anmenn “port-monnen” ek “sak.” Toudmenm, zot ti pou kontinyen rod Rwayonm Zeova ek son ladrwatir, e annan sa konfyans ki Bondye ti pou beni zot bann zefor pour ganny manze ek lenz ki zot ti pou bezwen.—Lik 22:35-37.
9. Konman ki Pol ti met Rwayonm premye dan son lavi anmenmtan ki i ti pran swen avek son bezwen fizik, e ki konsey i ti donnen konsernan sa?
9 Zapot Pol ti en bon legzanp en dimoun ki ti aplik konsey Zezi. Pol ti fer minister vin en priyorite dan son lavi. (Akt 20:24, 25) Kan i ti al prese dan en rezyon, i ti fer bann latant pour li kapab pran swen avek son lekor lo plan materyel. I pa ti ekspekte lezot pour pran swen avek li. (Akt 18:1-4; 1 Tesalonisyen 2:9) Toutfwa, avek rekonesans, i ti aksepte lospitalite ek kado kan lezot ti eksprim zot lanmour dan sa fason. (Akt 16:15, 34; Filipyen 4:15-17) Pol ti ankouraz bann Kretyen, pour pa negliz zot lobligasyon familyal pour al prese, me plito pour balans zot bann diferan responsabilite. I ti konsey zot pour travay, pour kontan zot fanmiy, e pour partaz avek lezot. (Efezyen 4:28; 2 Tesalonisyen 3:7-12) I ti ankouraz zot pour met konfyans dan Bondye, non pa dan bann byen materyel, e pour servi zot lavi dan en fason ki montre ki zot vreman konpran kwa ki keksoz pli enportan. An armoni avek bann lansennyman Zezi, sa i vedir rod plito Rwayonm Bondye ek son ladrwatir.—Filipyen 1:9-11.
Kontinyen gard Rwayonm premye dan ou Lavi
10. Ki savedir kontinyen rod plito Rwayonm?
10 Ziska ki degre nou personnelman partaz bon nouvel Rwayonm avek lezot? Dan en serten degre, sa i depan lo nou sitiasyon, ek grander nou lapresyasyon. Gard antet ki Zezi pa ti dir, ‘Rod Rwayonm kan ou napa nanryen pour fer.’ Vi ki i ti konn lenportans sa Rwayonm, i ti eksprim lavolonte son Papa, an dizan: “[Kontinyen, NW] rod plito rwayonm Bondye.” (Lik 12:31) Kantmenm laplipar nou nou bezwen travay pour satisfer nou bezwen e pour nou fanmiy, si nou annan lafwa, nou lavi pou tourn otour travay Rwayonm ki Bondye in donn nou. Anmenmtan, nou pou pran swen avek nou bann responsabilite familyal.—1 Timote 5:8.
11. (a) Konman ki Zezi ti montre ki pa tou ki pou kapab dedye menm kantite letan dan propaz sa mesaz Rwayonm? (b) Ki bann fakter ki pou afekte sa ki en dimoun i kapab fer?
11 Serten parmi nou i kapab dedye plis letan pour pres sa bon nouvel Rwayonm ki lezot. Me dan son parabol konsernan diferan kalite later, Zezi ti montre ki tou sa bann ki zot leker i parey bon later pou raport fri. Ziska ki degre? Sitiasyon sak dimoun i varye. Laz, lasante, ek responsabilite familyal i ennde fakter. Me kan nou annan lapresyasyon senser, nou kapab akonpli bokou keksoz.—Matye 13:23.
12. Ki bon lobzektif spirityel bann zenn i spesyalman ganny ankouraze pour mazin lo la?
12 I bon pour fikse bann lobzektif ki pou ed nou pour elarzi nou partisipasyon dan minister Rwayonm. Bann zenn i devret mazin lo sa bon legzanp ki en zenn Kretyen zele ki ti apel Timote ti demontre. (Filipyen 2:19-22) Ki pli bon karyer zot kapab pran kan zot konplet zot letid profann ki minister aplentan? Bann ki pli aze osi pou benefisye par etablir bann bon lobzektif spirityel.
13. (a) Lekel ki deside kwa ki nou kapab fer personnelman dan servis Rwayonm? (b) Ki nou pou demontre si nou vreman rod plito Rwayonm?
13 Olye kritik sa bann ki nou santi ti kapab fer plis, nou devret santi nou pouse par lafwa pour travay pour nou progre personnel afen ki nou kapab servi Bondye otan ki nou prop sitiasyon i permet nou. (Romen 14:10-12; Galat 6:4, 5) Parey i ganny demontre dan ka Zob, Satan ti konteste ki nou enterese prensipalman avek nou bann prop byen materyel, nou prop konfor, ek nou byennet personnel, e ki nou motivasyon pour servi Bondye i enn ki egois. Me si nou pe vreman rod plito Rwayonm, nou pe kontribye pour prouve ki Dyab i vreman en gran manter. Nou pe donn levidans ki sa ki vin premye dan nou lavi se servi Bondye. Par nou parol ek nou aksyon, nou alor demontre nou lanmour profon pour Zeova, nou sipor fidel pour son souvrennte, e nou lanmour pour nou prosen.—Zob 1:9-11; 2:4, 5; Proverb 27:11.
14. (a) Akoz en progranm pour predikasyon i anmenn benefis? (b) Ziska ki degre bokou Temwen pe partisip dan predikasyon?
14 En progranm i kapab ed nou pour akonpli plis ki sa ki nou ordinerman pe fer. Zeova li menm i annan “en letan fikse” pour akonpli son plan. (Egzod 9:5; Mark 1:15) Si i posib, i bon pour partisip dan predikasyon enn oubyen plizyer fwa sak semenn. Plizyer santenn milye Temwen Zeova otour lemonn in antreprann servis pionye asistan, par depans de er-d-tan par zour pour pres sa bon nouvel. Plizyer santenn milye lezot i servi konman pionye ordiner, par servi apepre de er-d-tan edmi par zour pour proklanm mesaz Rwayonm. Bann pionye spesyal ek bann misyonner i depans plis letan ankor dan servis Rwayonm. Nou osi nou kapab rod loportinite pour partaz lesperans Rwayonm dan nenport sitiasyon avek nenport dimoun ki dispoze pour ekoute. (Zan 4:7-15) Nou dezir se ki nou devret partisip plennman dan sa travay kan nou sitiasyon i permet nou, akoz Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14; Efezyen 5:15-17.
15. An konneksyon avek nou minister, akoz ou santi ki sa konsey dan 1 Korentyen 15:58 i apropriye?
15 Dan linite, dan tou rezyon lo later, e nenport ki nasyon zot ete, bann Temwen Zeova pe partisip dan sa servis. Zot pran aker sa konsey enspire dan Labib: “Reste ferm e solid. Montre touzour plis lentere dan travay Senyer, parski zot konnen ki dan Senyer zot travay pa anven.”—1 Korentyen 15:58.
Revizyon
• Kan Zezi ti dir kontinyen “rod plito Rwayonm,” kwa ki i ti pe endike i devret ganny met dan dezyenm plas?
• Ki pwenn-vi nou devret annan anver pran swen avek nou bezwen fizik ek sa ki pour nou fanmiy? Ki led Bondye pou donn nou?
• Dan ki laspe servis Rwayonm nou kapab partisipe?
[Portre lo paz 107]
Dan tou pei, Temwen Zeova ozordi pe pres bon nouvel avan lafen i arive