Sapit Dizwit

“Zot pa fer parti Lemonn”

1. (a) Ki Zezi ti priye an faver son bann disip avan son lanmor? (b) Akoz “pa fer parti lemonn” i tre enportan?

SA ZOUR swar avan ki i ti ganny met amor, Zezi ti priy pour son bann disip. Vi ki i ti konnen ki zot ti pou ganny met anba bann presyon terib par Satan, Zezi ti dir avek son Papa: “Mon pa demann ou pour tir zot dan lemonn, me mon demann ou, pour prezerv zot kont sa enn ki apel Malen. Zot pa fer parti lemonn parey mwan mon pa fer parti lemonn.” (Zan 17:15, 16) Akoz i tre enportan pour reste separe avek sa monn? Parski Satan i dirizan sa monn. Bann Kretyen pa pou anvi fer parti avek en monn ki anba son kontrol.—Lik 4:5-8; Zan 14:30; 1 Zan 5:19.

2. Dan ki sans ki Zezi pa ti fer parti lemonn?

² Pa fer parti lemonn pa vedir ki Zezi ti mank lanmour pour lezot. Okontrer, i ti geri bann malad, resisit bann mor, e ansenny bann dimoun lo Rwayonm Bondye. I ti menm donn son lavi pour limanite. Me i pa ti kontan bann move latitid ek aksyon bann dimoun ki ti manifeste leta lespri sa monn Satan. Se pour sa ki i ti averti nou kont bann keksoz parey bann dezir imoral, en fason viv materyalis, e rod popilarite. (Matye 5:27, 28; 6:19-21; Lik 20:46, 47) I pa etonnan, alor, ki Zezi ti osi evite partisip dan bann politik sa monn. Kantmenm i ti en Zwif, i pa ti pran okenn kote dan bann largiman politik ant Ronm ek bann Zwif.

“Mon Rwayonm pa sorti lo sa Later”

3. (a) Ki lakizasyon konsernan Zezi ki bann sef relizye Zwif ti fer avek Pilat, e akoz? (b) Kwa ki montre ki Zezi ti napa okenn lentere pour vin en lerwa imen?

³ Mazin sa ki ti arive kan bann sef relizye Zwif ti fer aret Zezi e anmenn li kot Pons Pilat, gouverner Romen. An realite, sa bann sef ti trouble parski Zezi ti’n ekspoz zot lipokrizi. Pour nobou fer sa gouverner pran aksyon kont Zezi, zot ti akiz li an dizan: “Nou’n trouve ki sa zonm pe met troub dan nou nasyon, i defann nou pey taks Sezar, e i pe dir ki se limenm Mesi, en lerwa.” (Lik 23:2) Evidaman, sa ti en mansonz parski enn an avan kan bann dimoun ti oule fer Zezi vin lerwa, i ti refize. (Zan 6:15) I ti konnen ki dan lavenir i ti pou vin en Lerwa dan lesyel. (Lik 19:11, 12) Osi, i ti pou ganny kouronnen, pa par imen, me par Zeova.

4. Ki ti latitid Zezi anver pey taks?

⁴ Zis trwa zour avan larestasyon Zezi, bann Farizyen ti esey fer Zezi dir en keksoz ki ti pou fer li koupab konsernan peyman taks. Me i ti dir: “Montre mwan en larzan. Figir ek non lekel ki lo la?” Kan zot ti dir “Sezar,” i ti reponn: “Alor, rann Sezar sa ki pour Sezar, e Bondye sa ki pour Bondye.”—Lik 20:20-25.

5. (a) Ki leson Zezi ti ansenny son bann disip letan i ti ganny arete? (b) Ki mannyer Zezi ti eksplik rezon par deryer sa ki i ti’n fer? (c) Apre ki Zezi ti’n ganny kestyonnen, ki ti arive?

⁵ Non, Zezi pa ti ansenny rebelyon kont bann lotorite profann. Kan bann larme ek lezot zonm ti vin aret Zezi, Pyer ti tir son lepe e tap enn sa bann zonm, e koup son zorey. Me Zezi ti dir: “Met ou lepe dan son plas. Tou sa ki servi lepe pou mor par lepe.” (Matye 26:51, 52) Son lannmen, Zezi ti eksplik son aksyon avek Pilat, an dizan: “Mon Rwayonm pa sorti lo sa later. Si mon Rwayonm ti sorti lo sa later, mon bann serviter ti a lager pour defann mwan kont lotorite Zwif.” (Zan 18:36) Pilat ti admet ki i pa’n trouv Zezi “koupab pour okenn sa bann lofans ki zot in mete kont li.” Me i ti soumet avek presyon ki lafoul ti pe met lo li, e i ti fer Zezi ganny kloute lo poto.—Lik 23:13-15; Zan 19:12-16.

Bann Disip i swiv Legzanp Zezi

6. Konman ki bann premye Kretyen ti montre ki zot evit leta lespri lemonn me ki zot ti kontan lezot dimoun?

⁶ Bann disip Zezi ti alor konpran kwa ki enplike dan pa fer parti lemonn. I ti vedir evit bann leta lespri ek aksyon sa monn ki Bondye pa aprouve, ki ti enkli bann divertisman vyolan e imoral dan bann sirk ek teat Romen. Parski zot ti evit bann tel divertisman, sa bann disip ti ganny konsidere konman bann dimoun ki ay zot prosen. Me zot pa ti ditou ay zot prosen, okontrer zot ti travay dir pour ed lezot benefisye avek bann provizyon ki Bondye ti’n donnen pour delivrans.

7. (a) Vi ki zot pa ti fer parti lemonn, ki bann premye Kretyen ti sibir? (b) Konman ki zot ti konsider bann sef politik ek peyman taks, e akoz?

⁷ Bann disip Zezi ti ganny persekite parey li osi i ti gannyen, souvan par bann zofisye gouvernman ki ti’n mal ganny enformen. Toudmenm, ver lannen 56 N.L., zapot Pol ti ekri bann Kretyen an Ronm, pour ankouraz zot pour “soumet avek bann lotorite ki gouvernen [bann sef politik], parski napa okenn lotorite amwen ki Bondye in etabli li.” Sa pa vreman vedir ki Zeova ki etabli bann gouvernman, me i les zot egziste ziska ki son Rwayonm i domin later antye. Alors, i ti apropriye pour Pol konsey bann Kretyen pour respekte bann zofisye lemonn e pour pey taks.—Romen 13:1-7; Tit 3:1, 2.

8. (a) Ziska ki pwen bann Kretyen i devret soumet avek bann gouvernman? (b) Konman ki bann premye Kretyen ti swiv legzanp Zezi?

⁸ Toutfwa, soumisyon avek bann sef politik i devret relatif, non pa absoli. Kan i annan en konfli ant lalwa Zeova ek lalwa zonm, sa bann ki servi Zeova i obeir Son lalwa. Remark sa ki liv On the Road to Civilization—A World History i dir lo bann premye Kretyen: “Bann Kretyen ti refize akonplir serten devwar bann sitwayen Romen. Bann Kretyen . . . ti santi ki antreprann servis militer ti en vyolasyon zot lafwa. Zot pa ti pou okip okenn pozisyon dan politik. Zot pa ti pou ador lanperer.” Kan lakour siprenm Zwif ti “defann” bann disip pour prese, zot ti reponn: “Nou devre obei Bondye plito ki zonm.”—Akt 5:27-29.

9. (a) Akoz bann Kretyen an Zerizalenm ti azir dan sa fason an 66 N.L.? (b) Dan ki fason sa i servi konman en bon legzanp?

⁹ Bann disip pa ti pran okenn kote dan bann konfli politik e militer. An 66 N.L., bann Zwif an Zide ti revolte kont Sezar. Larme Romen ti vitman anserkle Zerizalenm. Ki bann Kretyen dan sa lavil ti fer? Zot ti rapel konsey Zezi pour sorti dan sa lavil. Kan bann Romen ti ale tanporerman, bann Kretyen ti sove par travers Larivyer Zourden e al dan rezyon montanny Pela. (Lik 21:20-24) Pozisyon ki zot ti pran i servi konman en legzanp pour bann Kretyen fidel plitar.

Kretyen pa pran par lo okenn Kote dan sa bann dernyen Zour

10. (a) Dan ki travay bann Temwen Zeova i reste okipe, e akoz? (b) Dan ki domenn ki zot pa’n siport okenn kote?

¹⁰ Eski resi istorik i montre ki i annan en group dan sa bann dernyen zour ki pa’n siport okenn kote parey bann premye Kretyen? Wi, bann Temwen Zeova in fer sa. Toudilon sa peryod letan, zot tou zot in kontinyen prese ki Rwayonm Bondye i sa sel mwayen ki pou anmenn lape dirab, prosperite, ek boner pour sa bann ki kontan ladrwatir. (Matye 24:14) Me an sa ki konsern bann konfli parmi bann nasyon, zot in mentenir zot pozisyon e zot pa’n siport okenn kote.

11. (a) Konman ki pozisyon ki bann Temwen i pran i diferan avek sa ki bann sef relizye i fer? (b) Ki pwenn-vi bann Temwen Zeova i annan lo sa ki lezot i fer dan domenn politik?

¹¹ Parkont, i evidan ki bann sef relizye sa monn in bokou enplike dan bann zafer politik. Dan serten pei zot in aktivman partisip dan bann konpanny elektoral swa pour oubyen kont bann kandida. Serten sa bann sef relizye i menm okip bann pozisyon dan politik. Serten in met presyon lo bann politisyen pour favoriz bann progranm ki bann sef relizye i aprouve. Sepandan, bann Temwen Zeova pa mel dan politik. Zot pa ni anpes lezot zwenn en parti politik, ni met kandidatir pour en pozisyon dan politik, oubyen vote dan bann eleksyon. Zezi ti dir ki son bann disip pa pou fer parti lemonn, alor Temwen Zeova pa partisip dan politik.

12. Ki’n arive lefe ki bann relizyon sa monn in siport en kote ou en lot?

¹² Parey Zezi ti predir, bann nasyon in kontinyelman fer lager. Menm bann diferan group dan en menm pei in lager avek kanmarad. (Matye 24:3, 6, 7) Bann sef relizye in preske toultan siport en nasyon oubyen en group plis ki lezot, e zot in ankouraz zot bann dimoun pour fer parey. Rezilta? Dimoun ki dan menm relizyon i touy kanmarad dan bann lager senpleman akoz diferans dan nasyonalite oubyen tribi. Sa i kontrer avek lavolonte Bondye.—1 Zan 3:10-12; 4:8, 20.

13. Ki levidans i montre konsernan pozisyon bann Temwen Zeova?

¹³ Sepandan, bann Temwen Zeova in strikteman refize pour siport okenn kote dan tou konfli. Latour Veyer le 1 Novanm 1939 an Angle ti fer resorti: “Tou sa ki lo kote Senyer pa pou siport bann nasyon ki pe lager.” Temwen Zeova dan tou nasyon e anba tou sirkonstans i kontinyen mentenir sa pozisyon. Zot pa les bann lager ek politik sa monn ki koz divizyon kas zot lasosyasyon frer enternasyonal. Zot “forz zot lepe an pyos e zot lans an sizay.” Vi ki zot pa siport okenn kote, zot nepli aprann lager.—Izai 2:3, 4; 2 Korentyen 10:3, 4.

14. Ki bann Temwen Zeova in sibir vi ki zot in reste separe avek sa monn?

¹⁴ Vi ki zot pa siport okenn kote, ki sa in anmennen pour zot? Zezi ti dir: “Parski, zot pa fer parti lemonn, . . . lemonn, . . . i ay zot.” (Zan 15:19) Bokou Temwen Zeova in ganny anprizonnen parski zot serviter Bondye. Serten in ganny tortire, menm ganny touye, zis parey ti arive avek bann Kretyen premye syek. Sa i akoz Satan, ‘bondye sa syek,’ i opoz bann serviter Zeova, ki pa fer parti son monn.—2 Korentyen 4:4; Revelasyon 12:12.

15. (a) Ver kwa ki tou bann nasyon pe marse, e kwa ki bann Temwen Zeova i fer atansyon pour evite? (b) Akoz separasyon avek lemonn i en keksoz tre serye?

¹⁵ Bann serviter Zeova i ere ki zot pa fer parti lemonn, parski tou son bann nasyon pe al ver zot lafen dan Armagedon. (Danyel 2:44; Revelasyon 16:14, 16; 19:11-21) Sa maler pa pou ariv lo nou akoz nou separe avek sa monn. Konman en pep ini lo later antye, nou fidel avek Rwayonm seles Bondye. I vre, par pa fer parti lemonn, nou eksperyans son bann ridikil ek persekisyon. Me tre byento, sa pou arete, parski sa prezan monn mesan anba direksyon Satan pou ganny detri pour touzour. Lo lot kote, sa bann ki servi Zeova pou viv pour touzour dan son nouvo monn drwat anba direksyon Rwayonm Bondye.—2 Pyer 3:10-13; 1 Zan 2:15-17.

Revizyon

• Konman ki Zezi ti montre kwa ki enplike dan “pa fer parti lemonn”?

• Ki ti latitid bann premye Kretyen anver (a) leta lespri lemonn, (b) lotorite dan lemonn, e (c) pey taks?

• Dan ki fason bann Temwen Zeova dan letan modern in demontre ki zot pa siport okenn kote konman Kretyen?

[Portre lo paz 165]

Zezi ti eksplike ki li ek son bann disip “pa fer parti lemonn”