Ki i arive avek nou ler nou mor?

PAREY ou konnen, avek letan dimoun i vin vye, malad, e mor. Menm serten zanfan i mor. Eski ou devret per lanmor oubyen bann dimoun ki’n mor?— Ou konnen ki i arive ler nou mor?—

Dan nou letan, napa personn ki’n mor e apre retournen pour dir nou ki mannyer i ete. Me ler Zezi ti lo later, ti annan en zonm ki ti mor e apre i ti revin vivan. Nou kapab aprann ki i arive apre lanmor ler nou lir lo li. Sa zonm ti en zanmi Zezi e i ti reste Betani, ki en pti lavil obor Zerizalenm. I ti apel Lazar e i ti annan de ser ki ti apel Mart ek Mari. Annou vwar ki Labib i dir ti arive.

En zour Lazar ti tonm malad. Sa letan, Zezi pa ti Betani. Alors Mart ek Mari ti anvoy en dimoun al dir Zezi ki zot frer Lazar ti byen malad. Zot ti konnen ki Zezi i kapab fer zot frer byen. Sanmenm zot ti anvoy sa mesaz. Zezi pa ti en dokter, me i ti’n ganny pouvwar avek Bondye pour geri tou kalite maladi.​—Matye 15:30, 31.

Selman, avan ki Zezi ti ariv kot Lazar, son maladi ti vin pli grav e i ti mor. Me Zezi ti dir son bann disip ki Lazar pe dormi e ki I pe al lev li. Bann disip pa ti konpran ki Zezi i oule dir par sa. Alors Zezi ti fer kler pour zot, e dir: “Lazar in mor.” Ki sa i montre lo lanmor?— I montre ki lanmor i parey ler en dimoun i dan en profon sonmey. En sonmey sitan profon ki i pa ni menm reve.

Zezi ti ariv kot Mart ek Mari. Bann zanmi sa fanmiy ti deza la. Zot ti’n vini pour konsol sa de ser Lazar. Ler Mart ti tande ki Zezi ti pe vini, i ti al zwenn li. Apre Mari osi ti sorti pour al vwar Zezi. I ti sagren en kantite e i ti pe plere. I ti tonm dan lipye Zezi. Lezot zanmi ki ti’n swiv Mari ti pe plere zot osi.

Sa Gran Ansennyan ti demande kote zot in met Lazar. Bann dimoun ti anmenn Zezi kot sa kavern kot zot ti’n anter Lazar. Letan Zezi ti vwar tou dimoun pe plere, i ti konmans plere li osi. I ti konnen ki i vreman fer mal ler nou perdi en dimoun ki nou kontan.

Ti annan en gro ros devan sa kavern. Alors Zezi ti dir: “Tir sa ros.” Eski zot ti vreman bezwen fer sa?— Mart pa ti krwar sa i en bon lide. I ti dir: “Senyer son lekor i deza pi. I’n mor depi kat zour.”

Me Zezi ti dir li: “Pa mon’n dir ou, si ou krwar ou pou war laglwar Bondye?” Zezi ti pe dir ki Mart ti pou vwar en keksoz ki ti pou fer bann dimoun felisit Bondye. Ki Zezi ti pe al fer? Apre ki zot ti’n tir sa ros, Zezi ti priy Zeova byen for. Apre Zezi ti dir avek en lavwa for: “Lazar, sorti!” Ou krwar i ti sorti? Be, i ti kapab sorti?—

Dir mwan, ou kapab lev en dimoun ki pe dormi?— Wi, si ou kriy li for, i pou leve. Be ou kapab lev en dimoun ki pe dormi dan lanmor?— Non. Kantmenm ou a kriy pli for ki ou kapab, sa dimoun mor pa pou tann ou. Napa nanryen ki ou oubyen mwan oubyen nenport dimoun lo later i kapab fer pour lev en dimoun mor.

Me Zezi i diferan. I’n ganny en pouvwar spesyal avek Bondye. Alors ler Zezi ti kriy Lazar, en keksoz enkrwayab ti arive. Lazar ki ti’n mor depi kat zour ti sorti dan sa kavern! I ti revin vivan! I ti kapab respire, marse, e koz ankor! Zezi ti’n resisit Lazar.​—Zan 11:1-44.

Aprezan, ki ti arive avek Lazar ler i ti mor? Eski en keksoz ti sorti avek li (en nanm oubyen en lespri) pour al viv en lot landrwa? Eski nanm Lazar ti al dan lesyel? Eski sa kat zour, i ti dan lesyel avek Bondye e avek bann lanz sen?—

Non. Pa bliye Zezi ti dir Lazar ti pe dormi. Ki mannyer i ete ler ou dormi? Ler ou dan en profon sonmey, ou pa konnen ki pe pase otour ou, non?— E ler ou leve, ou pa konnen ki kantite letan ou ti pe dormi. Fodre ou get lo en revey pour konnen.

I koumsa menm avek bann dimoun ki’n mor. Zot pa konn nanryen ki pe pase. Zot pa santi nanryen. E zot pa kapab fer nanryen. Koumsa menm ti ete avek Lazar ler i ti mor. Lanmor i zis parey ler en dimoun i dan en profon sonmey kot i pa mazin nanryen. Labib i dir: “Bann mor, zot pa konn nanryen.”​—Eklezyast 9:5, 10.

En lot keksoz: Si Lazar ti dan lesyel pour sa kat zour, pa i ti pou’n koz lo la?— E si i ti dan lesyel, eski Zezi ti pou fer li retourn lo later, kan sa ler dan lesyel i gou?— Be non!

Pourtan, bokou dimoun i dir nou annan en nanm, e zot dir nou nanm i kontinyen viv apre ki nou’n mor. Zot dir ki nanm Lazar ti vivan dan en landrwa. Me Labib pa dir sa li. I dir ki Bondye ti fer sa premye zonm, Adan, vin “en nanm vivan.” Savedir Adan ti en nanm. Labib i osi dir ki ler Adan ti fer pese, i ti mor. I ti vin en “nanm mor,” e i ti retourn dan lapousyer, sa lapousyer ki i ti ganny fer avek. Labib i osi dir ki tou desandans Adan in erit pese ek lanmor zot osi.​—Zenez 2:7; 3:17-19; Nonm 6:6; Romen 5:12.

I kler alor ki nou napa en nanm ki kit nou lekor ler nou mor. Nou tou nou en nanm. E nou tou nou’n erit pese avek Adan. Labib i dir: ‘Nanm ki fer pese pou mor.’​—Ezekyel 18:4.

I annan dimoun ki per bann mor. Zot per pour pas dan simityer akoz zot krwar bann mor i annan en nanm e sa nanm i kapab fer zot en keksoz. Me eski en dimoun mor i kapab fer ditor en dimoun vivan?— Sa pa posib.

Serten dimoun i menm krwar ki bann mor i kapab retourn kot bann dimoun vivan konman en lespri. Zot met manze deor pour sa bann dimoun mor. Me bann dimoun ki fer sa pa vreman krwar sa ki Bondye i dir lo bann mor. Si nou krwar sa ki Bondye i dir, nou pa pou per bann mor. E si nou vreman kontan sa lavi ki Bondye in donn nou, nou pou montre li par fer bann keksoz ki fer Bondye plezir.

Me ou kapab demann ou lekor: ‘Eski Bondye pou redonn lavi bann zanfan ki’n mor? Eski i vreman anvi redonn zot lavi?’ Nou a koz lo la dan lot sapit.