Sa ki zanfan i bezwen avek zot paran
TOU paran i partisip dan en keksoz ki imen pa ankor kapab byen konpran. Tou le de, manman ek papa, i kontribye en par avek zot. Sa i fer en nouvo lavi devlope dan vant sa manman pour vin en dimoun demen. Wi, dimoun i apel li en “mirak,” e nou tou nou a dakor ki nesans en baba i vreman en “mirak.”
Byensir, met en zanfan o monn i zis konmansman responsabilite bann paran. Pour konmanse, bann pti baba i depan antyerman lo zot paran. Me anmezir zot grandi, zot bezwen plis latansyon, pa zis swen fizik. Zot bezwen led pour devlope mantalman, emosyonnelman, moralman, e spirityelman.
Pour zanfan devlop byen, zot sirtou bezwen lanmour zot paran. I enportan pour en paran dir son zanfan ki i kontan li. Me son aksyon i pli enportan ankor. Wi, zanfan i bezwen bann paran ki donn bon legzanp. Zot bezwen bann bon gidans ek prensip lo sa ki byen ek sa ki mal. Zot bezwen sa depi ptipti. Si zanfan pa ganny led depi byen boner, i kapab ariv zot bann keksoz ki donn bokou latet fer mal, bann keksoz ki pe arive avek bokou zanfan konmela.
Pli bon prensip ki nou kapab trouve i dan Labib. Napa okenn lansennyman ki donn otan byenfe ki lansennyman Labib. Ler zanfan i ganny ansennyen dapre Labib, zot realize ki zot Kreater oubyen Papa dan lesyel ki pe dir zot sa bann keksoz, pa en lot dimoun. Sa i fer sa konsey annan plis lafors ki okenn lezot konsey.
Labib i ankouraz paran pour travay dir pour fer zot zanfan konpran lenportans annan bann bon prensip. Me anmezir ki zanfan i grandi, paran i kapab vwar li difisil pour koz avek zot lo bann keksoz vreman enportan. Sa liv, Ekout sa gran Ansennyan, in ganny fer avek bi pour anpes en tel sitiasyon devlope. I pou donn ou ek ou zanfan keksoz spirityel pour lir ansanm. Deplis, i pou fer konversasyon devlope ant zanfan ek bann ki lir sa liv avek zot.
Ou pou remarke ki sa liv i ankouraz zanfan pour partisipe. I annan bokou kestyon ki’n ganny byen plase ladan. Kan ou ariv lo sa bann kestyon, ou pou vwar en tire (—). Sa pou rapel ou ki ou bezwen aret en kou e les sa zanfan eksprim sa ki i panse. Zanfan i kontan partisipe. Si zot pa ganny loportinite pour partisipe, zot kapab vitman perdi lentere.
Me pli enportan ankor, sa bann kestyon pou ed ou konnen ki i annan dan lespri ou zanfan. Parler zanfan i kapab pa donn bon larepons. Me sa lenformasyon ki vini apre kestyon in ganny fer ekspreseman pour ed sa zanfan pour devlop sa bon fason panse.
En keksoz spesyal ki annan dan sa liv i son bann portre. I annan plis ki 230 portre. Laplipar portre i ganny akonpannyen avek en kestyon pour zanfan, baze lo sa ki i vwar e sa ki i’n lir. Alor pa bliye diskit lo sa bann portre avek ou zanfan. Zot ede met lanfaz lo bann pwen enportan ki’n ganny diskite dan sak leson.
Ler sa zanfan pe aprann lir, ankouraz li pour lir sa liv avek ou e osi lo li menm. Pli i lir li, pli sa bann bon konsey pou reste grave dan son lespri ek son leker. Me pour devlop plis lafeksyon ek respe ant ou ek ou zanfan, fer zefor pour lir sa liv ansanm, e fer li regilyerman.
Dan en fason ki nou pa ti pou menm mazinen en pe letan pase, bann zanfan ozordi pe ganny ekspoze avek vis seksyel, bann zafer sorsye, ek lezot keksoz degradan ankor. Alor zot bezwen proteksyon e sa liv i ede dan sa domenn. I fer li dan en fason fran me avek respe. Me zanfan i sirtou bezwen ganny gide ver sa Enn ki donn tou lasazes. Sa i nou Papa dan lesyel, Zeova. Sanmenm ki Zezi, sa Gran Ansennyan, ti toultan fer. Nou swete senserman ki sa liv i annan en gran lenfliyans lo ou ek ou fanmiy pour zot viv en lavi ki fer plezir Zeova. Sa i pour zot prop byenfe eternel.