Tou Soufrans pou fini byento!

Serten moman dan ou lavi, petet ou’n demande, ‘Akoz i annan sa kantite soufrans?’ Pour plizyer milye lannen, imen in soufer en kantite avek lager, lapovrete, dezas, krim, lenzistis, maladi, ek lanmor. Sa dernyen san tan ki’n pase, limanite in fer fas avek bokou plis soufrans ki oparavan. Eski tousala en zour pou fini?

Nou ganny rekonforte ler nou konnen ki soufrans pou fini, e i pou fini byento! Parol Bondye, Labib, i dir: “Bann dimoun mesan pou nepli la. . . . Me bann dimoun ki annan limilite pou reste lo later, e zot pou vreman tir bokou plezir dan labondans lape.” Pour konbyen letan? “Bann dimoun drwat pou posed later, e zot pou reste lo la pour touzour.”—Psonm 37:10, 11, 29.

Apre ki Bondye in retir mesanste ek soufrans, later pou vin en paradi. Apre sa, dimoun pou kapab viv pour touzour an bonn sante e ere. Parol Bondye i predir: “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.”—Revelasyon 21:4.

Dan sa nouvo lemonn, menm bann dimoun mor pou retourn vivan pour ki zot kapab benefisye avek sa bann benediksyon: “Tou dimoun bon konman move, pour resisite.” (Akt 24:15) Pour sa rezon Zezi ti kapab dir avek en kriminel ki ti’n repantir e ki ti demontre lafwa dan li: “Ou pou avek mwan dan paradi.”—Lik 23:43.

Akoz Soufrans ti konmanse?

Vi ki Bondye ti’n plàn pour imen annan en lavenir merveye, akoz i ti les soufrans konmanse? Akoz i’n permet soufrans ale pour tou sa letan?

Ler Bondye ti kree Adan ek Ev, I ti kree zot avek en lekor ek en lespri parfe. I ti met zot dan en zoli zarden e donn zot travay ki zot ti pou kontan pour fer. Labib i dir: “Bondye ti vwar tou keksoz ki i ti’n fer e, gete! I ti tre bon.” (Zenez 1:31) Si zot ti’n obeir Bondye, zot ti pou’n fer bann zanfan parfe, e later antye ti pou’n vin en paradi, kot dimoun ti pou viv pour touzour dan lape ek boner.

Bondye ti met dan Adan ek Ev liberte pour swazir, ki en kado merveye. Zot pa ti pou parey bann robot ki napa lespri. Me pour zot kontinyen ere, sa ti depan lo si zot servi zot liberte pour swazir dan en bon fason, savedir pour obeir lalwa Bondye. Parey Bondye i dir: “Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe fer ou mars dan sa semen ki ou devret marse.” (Izai 48:17) Mal servi zot liberte pour swazir ti pou anmenn katastrof, vi ki imen pa’n ganny kree pour reisi san led Bondye. Labib i dir: “Semen en imen i pa pour li. I pa pour en imen ki pe marse pour diriz son lepa.”—Zeremi 10:23.

Malerezman, nou premye paran ti santi ki zot kapab viv san led Bondye e reisi. Me ler zot ti rezet dominasyon Bondye, i pa ti kontinyen les zot reste dan zot leta parfe. Alors zot ti konmans deteryore ziska finalman zot ti vin vye e mor. Vi ki nou zot zanfan, nou osi nou’n vin enparfe e nou mor.—Romen 5:12.

Kestyon enportan—Lekel ki annan Drwa dirize?

Akoz Bondye pa ti detrir Adan ek Ev e kree en lot koup imen? Akoz souvrennte iniversel Bondye, setadir son drwa pour dirize, ti’n ganny atake. Kestyon ti, Lekel ki annan drwa dirize, e dominasyon lekel ki bon? Deplis, Eski imen ti pou kapab fer pli byen si zot pa ti ganny dirize par Bondye? Par donn zot ase letan pour sey servi tou zot liberte parey zot ti anvi, Bondye ti pou montre enn fwa pour tou si imen i pli byen anba son dominasyon oubyen lo zot menm. Letan ki Bondye in donnen ti pou ase pour zot sey tou kalite sistenm politik, sosyal, ekonomik, ek larelizyon san gidans Bondye.

Ki rezilta? Plizyer milye lannen listwar imen i montre ki dimoun i deplizanpli soufer. Pandan sa dernyen syek, imen in fer fas avek soufrans pli dir ki zanmen oparavan. Plizyer milyon dimoun ti ganny touye pandan dezyenm Lager Mondyal. Plis ki 100 milyon ti ganny masakre dan bann lager. Krim ek vyolans i partou. Labi drog i en fleo partou dan lemonn. Bann maladi ki ganny transmet par sèks pe kontinyen propaze. Sak lannen, dizenn milyon dimoun i mor lafen e mor avek maladi. Lavi fanmiy ek valer moral in deteryore partou. Napa okenn gouvernman imen ki annan solisyon pour sa bann problenm. Napa enn ki’n elimin lavyeyes, maladi, ek lanmor.

Kondisyon ki imen i ladan i zis parey sa ki Labib ti predir pour nou letan. Parol Bondye i idantifye nou lepok konman “bann dernyen zour” sa lemonn mesan kot “pou annan letan difisil.” Zis parey Labib i dir, ‘bann move dimoun ek bann anbeter, in fer touzour plis progre dan sa ki mal.’—2 Timote 3:1-5, 13.

Soufrans pou fini byento

Tou levidans i montre ki nou pe apros lafen sa letan kot zonm in viv san led Bondye, ki’n anmenn katastrof. I kler ki zonm pa kapab diriz lo zot menm san led Bondye. Zis dominasyon Bondye ki kapab anmenn lape, boner, bon lasante, ek lavi eternel. Alor sa letan kot Zeova in permet mesanste ek soufrans i pros pour fini. Byento Bondye pou entervenir dan zafer imen, i pou sanz kondisyon sa lemonn konpletman.

Profesi Labib i dir: “Dan bann zour sa bann lerwa [bann dominasyon imen ki egziste konmela] Bondye lesyel pou etabli en rwayonm [dan lesyel] ki pa pou zanmen ganny detrir. . . . I pou kraz e met en lafen avek tou sa bann rwayonm [bann dominasyon konmela], e li menm i pou dire pour en letan endefini.” (Danyel 2:44) Aksyon ki Zeova pou pran pour prouv son drwa pour dirize par son Rwayonm dan lesyel i lansennyman enportan dan Labib. Ler i ti pe predir en laspe enportan siny “bann dernyen zour,” Zezi ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14.

Ler lafen i arive, lekel ki pou reste vivan? Labib i reponn: “Bann ki drwat pou reste lo later, e bann ki san repros ki pou reste lo la. Bann mesan zot, zot pou ganny retire lo later.” (Proverb 2:21, 22) Bann ki drwat i bann ki aprann lavolonte Zeova e fer li. Zezi Kri ti dir: “Lavi eternel . . . savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Wi, “lemonn pou disparet . . . , me sa ki fer lavolonte Bondye i reste eternelman.”—1 Zan 2:17.

Eksepte kan i endike, bann sitasyon Lekritir Ebre in ganny tradwir apartir New World Translation of the Holy Scriptures​—With References e bann sitasyon Lekritir Grek in ganny retire dan Nouvo Testaman an Kreol Seselwa.