Akoz nou bezwen respekte lotorite?

1, 2. (a) Akoz nou kapab vwar li difisil pour respekte lotorite? (b) Ki kestyon nou pou egzaminen?

ESKI ou’n deza vwar ki en zanfan i fer ler i’n ganny demande pour fer en keksoz ki i pa anvi fer? Petet i pou fer son figir anmer. I tann son paran pe koz avek li e i konnen ki i bezwen respekte lotorite son paran. Me i zis pa anvi obeir. Sa i en keksoz ki tanzantan i ariv avek nou tou.

² I pa toultan fasil pour respekte lotorite. Eski parfwa ou vwar li difisil pour obeir sa bann ki annan plis lotorite ki ou? Si wi, pa zis ou tousel ki bezwen fer fas avek sa. Nou pe viv dan en lepok, kot bokou plis dimoun ki oparavan, pa oule respekte lotorite. Me Labib i dir ki nou bezwen respekte sa bann ki annan plis lotorite ki nou. (Proverb 24:21) Anfet, sa i esansyel si nou anvi reste dan lanmour Bondye. Aprezan, sa i fer nou demann serten kestyon. Akoz i kapab vreman difisil pour nou respekte lotorite? Akoz Zeova i demann nou pour fer sa e kwa ki pou ed nou? Finalman, dan ki fason nou kapab montre respe pour lotorite?

AKOZ I KAPAB DIFISIL

3, 4. Kan ki pese ek lenperfeksyon ti konmans egziste e akoz nou lenperfeksyon i fer li difisil pour nou respekte lotorite?

³ An bref, annou vwar de rezon akoz i kapab vreman difisil pour nou respekte sa bann ki annan lotorite. Premyerman, nou enparfe. Dezyenmman, sa bann ki annan lotorite zot osi zot enparfe. Pese ek lenperfeksyon ti konmans egziste en bann letan pase, sa ti arive dan zarden Edenn kan Adan ek Ev ti rebel kont lotorite Bondye. Alors, pese in egziste akoz rebelyon. Menm ziska ozordi nou ne avek sa tandans pour rebele.​—Zenez 2:15-17; 3:1-7; Psonm 51:5; Romen 5:12.

⁴ Vi ki nou enparfe, i fasil pour nou vin orgeye e arogan. Me parkont, limilite i en kalite ki nou pa byen byen trouve, ki fer ki nou pou bezwen fer bokou zefor pour devlop e gard sa kalite. Menm si i kapab ki nou pe fidelman servi Bondye pour plizyer lannen, nou kapab vin antete e orgeye. Par egzanp, mazin Kora ki ti reste fidel avek pep Zeova menm si zot ti pas dan bokou difikilte. Me kantmenm sa, i ti telman anvi ganny plis lotorite ki i ti annan lodas fer sa pep rebel kont Moiz, sa zonm ki ti annan plis limilite lo later sa lepok. (Nonm 12:3; 16:1-3) Mazin osi Lerwa Ouziya, ki akoz lorgey ti antre dan tanp Zeova e fer en servis sakre ki zis bann pret ki ti annan drwa fer. (2 Kronik 26:16-21) Zot tou le de ti pey ser pour zot rebelyon. Me zot move legzanp i en bon rapel pour nou tou. Nou bezwen rezet lorgey akoz sa i kapab fer li difisil pour nou respekte lotorite.

5. Ki mannyer imen enparfe in mal servi zot lotorite?

⁵ De lot kote, bann imen enparfe ki o pouvwar, zot osi zot fer li difisil pour bokou dimoun respekte lotorite. Bokou ki annan lotorite i kriyel, abiz zot pouvwar e mal servi li. An realite, tou dilon listwar imen, sa bann ki annan lotorite in mal servi zot pouvwar. (Eklezyast 8:9) Par egzanp, Sail ti en bon dimoun ki ti annan limilite kan Zeova ti swazir li pour vin lerwa. Parkont, i ti les lorgey ek zalouzi kontrol li ki apre i ti persekit David, en zonm fidel. (1 Samyel 9:20, 21; 10:20-22; 18:7-11) Pli tar, David ti vin enn bann pli bon lerwa ki ti deza egziste Izrael. Me apre i ti mal servi son pouvwar kan i ti pran madanm Ouriya, en Itit e apre met sa zonm inosan devan lo fron batay pour li ganny touye. (2 Samyel 11:1-17) Wi, akoz lenperfeksyon i difisil pour dimoun byen servi zot pouvwar. E i pli pir ankor ler sa bann ki o pouvwar pa respekte Zeova. Apre ki i ti’n dekrir lafason ki serten lepap Katolik ti’n anmenn persekisyon en pe partou, en zonm ki travay dan gouvernman Langleter ti ekrir: “Pouvwar i tant pour fer dimoun vin koronpi e annan tou pouvwar i fer dimoun vin koronpi konpletman.” Apre ki nou’n vwar konman ki pouvwar in ganny mal servi dan listwar, annou vwar akoz nou devret respekte lotorite?

AKOZ NOU BEZWEN RESPEKTE LOTORITE?

6, 7. (a) Ki nou lanmour pour Zeova i pous nou pour fer e akoz? (b) Ki latitid nou bezwen annan pour kapab soumet?

⁶ Pli bon rezon akoz nou respekte lotorite i annan pour fer avek lanmour, savedir lanmour pour Zeova, pour nou prosen e menm pour nou lekor. Vi ki nou kontan Zeova plis ki tou lezot keksoz, nou anvi rezwir son leker. (Proverb 27:11; Mark 12:29, 30) Nou konnen ki son dominasyon, son drwa pour diriz liniver, in ganny kestyonnen isi lo later depi ki rebelyon ti konmanse dan zarden Edenn. E nou osi konnen ki laplipar dimoun in pran kote avek Satan e zot pa aksepte dominasyon Zeova. Nou, nou vreman kontan ki nou siport Zeova. Kan nou lir sa bann parol ki vreman zoli dan Revelasyon 4:11, pa sa i tous nou en kantite. Pa i kler pour nou ki Zeova i annan drwa diriz liniver! Nou siport son dominasyon e les li diriz nou dan nou lavi.

⁷ Sa kalite respe i enplik lobeisans ek soumisyon menm ler i pa fasil. Nou pare pour obeir Zeova akoz nou kontan li. Parkont, i pou annan letan kot nou pou vwar li vreman difisil pour obeir. Kan sa i arive, parey sa zanfan ki nou’n mansyonnen o konmansman, nou pou bezwen aprann soumet. Nou rapel ki Zezi ti soumet avek son Papa, pour fer son lavolonte, menm si i ti kapab vreman difisil pour fer li. I ti dir avek son Papa: “Si sa i ou lavolonte, eparny mwan sa lakoup; e pourtan non pa dapre mon lavolonte, me ou lavolonte.”​—Lik 22:42.

8. (a) Konman ki nou souvan montre nou soumisyon anver lotorite Zeova e ki nou aprann lo santiman Zeova an rapor avek sa? (b) Kwa ki kapab ed nou pour ekout konsey e aksepte disiplin? (Vwar bwat “Ekout konsey e aksepte disiplin.”)

⁸ Byensir, konmela Zeova pa koz avek nou personnelman, i servi son Parol ek son bann reprezantan isi lo later. Alors, laplipar di tan nou montre ki nou soumet avek lotorite Zeova kan nou respekte sa bann ki i’n donn lotorite, oubyen sa bann ki i kontinyen permet zot annan plis lotorite ki nou. Si nou rebel kont zot, par egzanp si nou refize aksepte zot konsey ek disiplin ki baze lo Labib, nou pou ofans Bondye. Kan bann Izraelit ti konplent e rebel kont Moiz, pour Zeova, i ti konmsi zot ti pe rebel kont li.​—Nonm 14:26, 27.

9. Akoz lanmour pour nou prosen pou pous nou pour respekte lotorite? Donn en legzanp.

⁹ Nou osi montre ki nou respekte lotorite akoz nou kontan nou prosen. Ki mannyer sa i posib? Bon, esey mazinen ki ou en solda dan larme. Pour ki zot kapab reisi e menm pour zot sirviv, sa pou depan lo korperasyon sak solda, zot lobeisans ek respe anver sa bann diferan o zofisye dan larme. Si ou pa soumet avek sa bann ki annan lotorite dan larme, lavi ou bann lezot kanmarad solda pou kapab an danze. I vre, lafors militer in fer en pake dezord dan lemonn ozordi. Me parkont, Zeova i annan bann larme ki fer zis sa ki byen pour imen. En kantite fwa dan Labib, Bondye i ganny apele “Zeova bann larme.” (1 Samyel 1:3) I en Komandan ki komann en gran latroup diferan lanz pwisan. Parfwa Zeova i konpar son bann serviter lo later avek larme. (Psonm 68:11; Ezekyel 37:1-10) Si nou rebel kont sa bann ki Zeova in swazir pour diriz nou, eski pa nou ava pe met lavi nou bann frer ek ser Kretyen an danze zis parey sa bann solda ki nou’n koz lo la? Kan en dimoun i rebel kont bann ansyen ki’n ganny apwente, lezot osi dan kongregasyon i kapab soufer. (1 Korentyen 12:14, 25, 26) Kan en zanfan i rebele, tou dimoun dan fanmir i soufer. Alors, nou montre nou lanmour pour nou prosen ler nou pare pour demontre respe ek korperasyon.

10, 11. Akoz i dan nou lavantaz pour nou obeir lotorite?

¹⁰ Nou osi respekte lotorite akoz se nou menm ki benefisye. Kan Zeova i demann nou pour respekte lotorite, souvan i fer resorti bann byenfe ki nou pou gannyen si nou fer sa. Par egzanp, i demann bann zanfan pour obeir zot paran pour ki zot kapab viv lontan e trouv lazwa dan lavi. (Deterononm 5:16; Efezyen 6:2, 3) I demann nou pour respekte bann ansyen dan kongregasyon, akoz si nou pa fer sa, sa i kapab afekte nou spirityelman. (Ebre 13:7, 17) I dir nou obeir bann lotorite dan lemonn akoz sa i pour nou prop proteksyon.​—Romen 13:4.

¹¹ Eski ou pa pou dakor ki ler nou konnen akoz Zeova i oule nou obeir, sa i ed nou pour respekte lotorite? Aprezan, annou vwar konman nou kapab respekte lotorite dan trwa laspe enportan dan nou lavi.

MONTRE RESPE DAN LAFANMIR

12. Ki rol Zeova in donn en msye oubyen en papa dan lafanmir e ki mannyer i kapab zwe byen sa rol?

¹² Zeova ki ti entrodwir lafanmir. Vi ki i en Bondye annord, i’n aranz lafanmir dan en fason ki keksoz i kapab mars byen. (1 Korentyen 14:33) I’n donn sa msye oubyen papa, lotorite pour vin sef dan lafanmir. En msye i montre respe pour son Sef, Kris Zezi, kan i imit lafason ki Zezi i egzers son lotorite lo kongregasyon. (Efezyen 5:23) Alors, en msye pa devret refize pour pran son responsabilite, me i devret desarz son responsabilite avek kouraz, i pa devret parey en diktater oubyen brit, plito i devret bon, rezonnab e annan lanmour. I gard antet ki i annan zis en serten degre lotorite e ki Zeova i annan plis lotorite ki li.

13. Ki mannyer en madanm oubyen en manman dan lafanmir i kapab byen akonplir son rol dan en fason ki fer plezir Zeova?

¹³ En madanm oubyen manman dan lafanmir i devret vin en led oubyen sipor pour son msye. Li osi tou in ganny serten lotorite dan lafanmir, akoz Labib i koz lo “lalwa ou manman.” (Proverb 1:8) Byensir, i annan mwens lotorite ki son msye. En madanm Kretyen i montre ki i respekte son msye ler i ed li akonplir son rol konman sef lafanmir. I pa kraz son msye, manipil li, oubyen pran son plas. Plito, i siport e korpere avek son msye. Kan son msye i pran en desizyon ki i pa kontan, i kapab avek respe eksprim son santiman, me finalman i soumet. Si son msye pa en Temwen, sitiasyon i kapab difisil, me si i pare pour soumet, sa i kapab ankouraz son msye pour esey vin pros avek Zeova.​—1 Pyer 3:1.

14. Ki mannyer bann zanfan i kapab fer zot paran ek Zeova kontan?

¹⁴ Kan bann zanfan i obeir zot papa ek manman, sa i fer Zeova kontan. Kan zot fer sa, zot fer zot paran fyer e kontan. (Proverb 10:1) Dan bann fanmir kot i annan zis en paran tousel, bann zanfan i aplik sa menm prensip lo lobeisans, zot konnen ki zot manman oubyen papa i kapab pli bezwen zot sipor ek korporasyon. Kan tou dimoun dan fanmir i akonplir byen zot rol ki Bondye in donn zot, sa i fer ki i annan lape ek lazwa dan fanmir. Sa i anmenn loner pour Zeova, sa Enn ki’n fer li posib pour tou fanmir egziste.​—Efezyen 3:14, 15.

MONTRE RESPE DAN KONGREGASYON

15. (a) Ki mannyer nou kapab montre ki nou respekte lotorite Zeova dan kongregasyon? (b) Ki prensip ki kapab ed nou pour obeir sa bann ki pe diriz nou? (Vwar bwat “Obei zot bann dirizan.”)

¹⁵ Zeova in apwent son Garson konman sef kongregasyon. (Kolosyen 1:13) E Zezi li, in donn son ‘lesklav fidel e pridan’ sa responsabilite pour pran swen avek pep Bondye lo later spirityelman. (Matye 24:45-47) Konsey Direkter Temwen Zeova, i reprezant sa lesklav. Zis parey ti leka avek bann kongregasyon dan premye syek, bann ansyen ozordi i kapab direkteman ganny lenstriksyon ek konsey sorti kot Konsey Direkter, oubyen atraver son bann reprezantan, tel parey sirveyan rezyonal e distrik. Kan nou tou endividyelman nou respekte lotorite ki bann ansyen i annan, nou pe obeir Zeova.​—Ebre 13:17.

16. Dan ki sans bann ansyen i ganny apwente par lespri sen?

¹⁶ Bann ansyen ek asistan ministeryel pa parfe. Zot fer fot parey nou tou. Me kantmenm sa, bann ansyen i sa bann “kado” ki kongregasyon in gannyen pour ed zot reste for spirityelman. (Efezyen 4:8) Bann ansyen i ganny apwente par lespri sen. (Akt 20:28) Ki mannyer? Dan le sans ki premyerman zot bezwen annan bann kalifikasyon ki’n ganny rikorde dan Labib atraver led lespri sen. (1 Timote 3:1-7, 12; Tit 1:5-9) Epi, bann ansyen ki egzaminen si sa frer i annan bann kalifikasyon ki trouve dan Labib, zot senserman priye pour ganny gidans lespri sen.

17. Akoz parfwa bann madanm Kretyen i bezwen kouver zot latet?

¹⁷ Parfwa, i kapab arive ki dan serten kongregasyon i napa ansyen ek asistan ministeryel pour fer travay ki normalman zot ki fer. Par egzanp, pour kondwir sa renyon pour predikasyon. Dan en tel ka, bann frer ki’n batize i kapab ganny demande pour fer sa renyon. Si napa bann frer ki’n batize, bann ser ki kalifye i kapab ganny servi. Me sak fwa ki en madanm i fer en travay ki normalman i devret ganny fer par en frer, i devret kouver son latet.a (1 Korentyen 11:3-10) Ler zot fer sa, sa pa pe abes zot. Plito, i en fason pour montre respe pour laranzman Zeova an rapor avek lotorite dan fanmir e dan kongregasyon.

RESPEKTE BANN LOTORITE DAN LEMONN

18, 19. (a) Ki mannyer ou pou eksplik sa prensip dan Romen 13:1-7? (b) Ki mannyer nou montre ki nou respekte bann lotorite dan lemonn?

¹⁸ Bann vre Kretyen i vreman veye ki zot swiv byen sa bann prensip dan Romen 13:1-7. Anmezir ki ou lir sa bann verse, ou pou remarke ki sa bann “lotorite ki gouvernen” i bann gouvernman dan lemonn. Osi lontan ki Zeova i permet sa bann gouvernman egziste, zot fer bann keksoz enportan, par egzanp zot gard en bon nivo sekirite e zot fourni plizyer servis. Nou montre ki nou respekte sa bann lotorite kan nou obeir lalwa. Nou fer sir ki nou pey tou nou taks, byen ranpli okenn form oubyen dokiman ki gouvernman i demann nou pour ranpli e pour obeir okenn lalwa ki enplik nou fanmir, biznes oubyen okenn keksoz ki nou annan. Me parkont nou pa soumet avek bann lotorite dan lemonn ler zot demann nou pour dezobeir Bondye. Plito, nou dir menm keksoz ki bann zapot ti dir: “Nou devre obei Bondye plito ki zonm.”​—Akt 5:28, 29; vwar bwat “Ki lotorite mon devret obeir?”.

¹⁹ Nou osi montre respe pour bann lotorite dan lemonn dan lafason ki nou azir avek dimoun. Parfwa nou bezwen al kot bann dimoun ki travay dan gouvernman, an personn. Par egzanp, zapot Pol ti bezen al devan Lerwa Erod Agripa ek Gouverner Festis. Menm si zot ti vreman move, zapot Pol ti montre ki i ti annan respe pour zot dan lafason ki i ti koze. (Akt 26:2, 25) Nou imit legzanp Pol, ki swa sa dimoun ki nou koz avek dan gouvernman i annan gran lotorite oubyen i en gard. Kot lekol, bann zenn Kretyen i fer bokou zefor pour respekte zot ansennyan, bann ki travay dan ladministrasyon sa lekol ek bann anplwayer. Byensir nou pa respekte zis bann ki napa okenn problenm avek nou krwayans, me nou montre sa menm respe avek bann ki pa kontan Temwen Zeova. An zeneral, bann dimoun ki pa Temwen i devret remarke ki nou pare pour respekte zot.​—Romen 12:17, 18; 1 Pyer 3:15.

20, 21. Ki serten benediksyon nou gannyen ler nou respekte lotorite?

²⁰ Annou pa ezite pour montre respe. Zapot Pyer ti ekrir: “Respekte tou dimoun.” (1 Pyer 2:17) Kan dimoun i vwar ki nou senserman respekte zot, sa i kapab tous zot en kantite. Pa bliye, sa i en kalite ki pe vin deplizanpli rar. Ler nou respekte lezot sa i en fason ki nou pe pran konsey ki Zezi ti donnen aker: “Alor zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.”​—Matye 5:16.

²¹ Ozordi dan sa lemonn ki dan fernwanr, bann dimoun senser pe ganny atire ver sa lalimyer spirityel. Alors, kan nou montre respe dan fanmir, dan kongregasyon e ler nou respekte bann lotorite dan lemonn, sa i kapab atir dimoun e pous zot pour vin mars dan lalimyer ansanm avek nou. Pa sa i en lespwar merveye! Me menm si sa pa arive, i annan en keksoz ki nou asire. Kan nou respekte tou dimoun sa i fer plezir Zeova e i ed nou pour reste dan son lanmour. Eski i annan okenn pli gran rekonpans ki nou kapab gannyen ki sa?