“Mon pa responsab pour lanmor personn”

1-3. (a) Dekri ki ti arive sa zour swar ki Etikis ti mor. (b) Ki Pol ti fer e ki sa i montre nou lo Pol?

POL i Troas dan en lasanm anler e i annan en kantite dimoun dan sa lasanm. I koz avek bann frer pour en bon pe letan, vi ki sa i son dernyen lannwit ki i pou pase avek zot. I minwi, i annan en kantite lalanp ki pe alimen dan sa lasanm e sa i fer sa lasanm vin pli so e petet lafimen i fer anndan sonm. En zonm ki apel Etikis pe asize lo rebor lafnet. Anmezir ki Pol pe koze, Etikis i tonm dormi e i sorti anler lo trwazyenm letaz e tonm anba!

² Vi ki Lik i en dokter, petet i parmi bann dimoun ki tay deor pour egzamin Etikis. Me nou konnen ki’n arive. Zot “anmas li mor.” (Akt 20:9) Me apre, Pol i fer en mirak. Pol i bese e may Etikis. I dir sa lafoul: “Aret fer tapaz parski i vivan.” Pol in resisit Etikis!​—Akt 20:10.

³ Sa ki ti arive i montre ki lespri sen Bondye i pwisan. Personn pa ti kapab dir ki Pol ti responsab pour lanmor Etikis. Me Pol pa ti anvi ki lanmor Etikis i fatig sa bann dimoun ki ti la pour sa moman enportan oubyen dekouraz zot. Vi ki i ti’n resisit Etikis, ler Pol ti kit sa kongregasyon, bann frer ek ser ti’n ganny rekonforte e zot ti determinen pour kontinyen fer sa travay predikasyon. I kler ki Pol ti santi li responsab pour lavi lezot. Sa i fer nou rapel sa ki i ti dir dan Akt 20:26 ki dir: “Mon pa responsab pour lanmor personn.” Annou vwar ki mannyer legzanp Pol i kapab ed nou pour annan menm pwennvi avek li.

“I ti konmans son vwayaz pour al Masedwann” (Akt 20:1, 2)

4. Ki leksperyans difisil Pol ti’n pas ladan?

⁴ Parey nou’n vwar dan sa sapit avan, Pol ti’n pas dan en leksperyans difisil. Bann dimoun dan lavil Efez ti’n fer dezord akoz Pol ti’n pres dan sa lavil. Annefe, bann lorfev ki ti ganny zot larzan avek bann dimoun ki ti ador Artemis, ti’n fer dezord dan lavil zot osi! Akt 20:1 i dir: “Ler lafoul ti’n aret fer dezord, Pol ti fer bann disip vin kot li. Apre ki i ti’n ankouraz zot, i ti dir zot orevwar e i ti konmans son vwayaz pour al Masedwann.”

5, 6. (a) Konbyen letan Pol ti reste Masedwann e ki i ti fer pour bann frer ek ser laba? (b) Ki latitid Pol ti demontre anver bann frer ek ser?

⁵ Pandan ki Pol ti pe vwayaze pour al Masedwann, Pol ti aret dan por Troas e i ti reste laba pour en pe letan. Pol ti anvi ki Tit, ki ti’n ganny anvoye Korent, i vin zwenn li Troas. (2 Kor. 2:12, 13) Me ler Pol ti realize ki Tit pa ti pe vini, Pol ti al Masedwann e petet i ti reste laba pour apepre enn an e i ti “ankouraz bann ki ti laba en kantite.”a (Akt 20:2) Pli tar, Tit ti zwenn Pol Masedwann e i ti anmenn bann bon nouvel konsernan lafason ki bann Korentyen ti reazir ler zot ti ganny sa premye let ki Pol ti anvoy pour zot. (2 Kor. 7:5-7) Alor Pol ti ekri en lot let pour zot e ozordi sa let i apel 2 Korentyen.

⁶ Remarke ki Lik i dir ki Pol ti “ankouraz” bann frer ek ser dan lavil Efez ek Masedwann. Sa mo “ankouraz” i montre nou ki mannyer Pol ti konsider son bann frer ek ser. Pol pa ti fer parey bann Farizyen ki pa ti respekte lezot dimoun, me i ti pare pour travay ansanm avek bann frer ek ser ki ti form parti kongregasyon Bondye. (Zan 7:47-49; 1 Kor. 3:9) Pol ti demontre sa menm latitid menm ler i ti konsey zot.​—2 Kor. 2:4.

7. Ki mannyer bann sirveyan ozordi i kapab swiv legzanp Pol?

⁷ Ozordi, bann ansyen dan kongregasyon ek bann sirveyan rezyonal i fer en kantite zefor pour swiv legzanp Pol. Menm ler zot konsey en dimoun, zot anvi ankouraz li. Bann sirveyan i rod fason pour ankouraz lezot olye kondann zot. En sirveyan rezyonal ki annan en kantite leksperyans ti dir: “Laplipar nou bann frer ek ser i anvi fer sa ki byen me souvan zot vwar li difisil pour fer sa parski zot fristre, zot per e zot santi ki zot pa kapab fer nanryen dan sa sityasyon ki zot ladan.” Bann sirveyan i kapab ankouraz sa bann frer ek ser.​—Ebr. 12:12, 13.

“Bann Zwif ti’n fer en konplo pour touy li” (Akt 20:3, 4)

8, 9. (a) Kwa ki ti fer Pol sanz son plan? (b) Akoz bann Zwif pa ti kontan Pol?

⁸ Pol ti kit Masedwann e i ti al Korent.b Apre ki i ti’n pas trwa mwan laba, i ti anvi al Sankre e apre i ti pou pran bato pour al Siri. Ler i ti pou ariv Siri, i ti pou kapab al Zerizalenm pour anmenn kontribisyon pour bann frer ek ser ki ti dan bezwen.c (Akt 24:17; Rom. 15:25, 26) Me i ti annan en keksoz ki ti arive ki ti fer Pol sanz son plan. Akt 20:3 i dir: “Bann Zwif ti’n fer en konplo pour touy li”!

⁹ Bann Zwif pa ti kontan Pol parski zot ti konsider li konman en aposta. Pa tro lontan pase, ler i ti al prese Korent, Krispis ki ti en zofisye enportan dan sinagog Korent ti konverti. (Akt 18:7, 8; 1 Kor. 1:14) En lot fwa, bann Zwif Korent ti anmenn bann sarz kont Pol devan Galyon, ki ti gouverner provens Akai. Me Galyon ti kennsel sa bann sarz akoz zot ti napa laprev e sa ti fer bann lennmi Pol ankoler. (Akt 18:12-17) I kapab ki bann Zwif Korent ti konnen oubyen zot ti mazinen ki byento Pol ti pou pran bato pour al Sankre, ki ti o bor Korent, alor zot ti fer konplo pour atak li laba. Ki Pol ti pou fer?

10. Eski Pol ti evite al Sankre parski i ti per? Eksplike.

¹⁰ Pol ti deside pour pa al Sankre pour li pa met son lekor dan danze e pour protez sa kontribisyon ki zot ti’n donn li pour anmennen, alor i ti retourn Masedwann. I vre, pour vwayaz lo later osi ti danzere. Sa letan, souvan i ti annan bann bandi ki ti kasyet dan bann semen. Menm bann lotel ti kapab danzere. Me kantmenm sa, Pol ti swazir pour vwayaz lo later menm si i ti danzere dan plas al Sankre. Me gran mersi, i pa ti pe vwayaz li tousel. Bann dimoun ki ti pe vwayaz avek Pol lo sa vwayaz misyonner ti Aristark, Gayis, Sekondis, Sopater, Timote, Trofim ek Tisik.​—Akt 20:3, 4.

11. Ki mannyer bann Kretyen ozordi i fer sa ki zot kapab pour pa met zot lekor dan danze e ki legzanp Zezi in kite konsernan sa?

¹¹ Ozordi, bann Kretyen i fer parey Pol e zot fer sa ki zot kapab pour pa met zot lekor dan danze ler zot dan predikasyon. Dan serten landrwa, zot al prese ansanm dan bann group oubyen par de dan plas al zot tousel. Me ki bann Kretyen i fer ler zot ganny persekite? Bann Kretyen i konnen ki zot pou ganny persekite. (Zan 15:20; 2 Tim. 3:12) Me kantmenm sa, zot pa met zot lekor dan danze. Annou vwar legzanp Zezi. En fwa, ler bann dimoun ki ti opoz li dan lavil Zerizalenm ti konmans anmas ros pour saboul li, “Zezi ti kasyet e i ti kit tanp.” (Zan 8:59) Pli tar, ler bann Zwif ti pe fer konplo pour touy li, “Zezi ti nepli mars kot bann Zwif ti kapab vwar li, me i ti al dan en rezyon pros avek dezer.” (Zan 11:54) Zezi ti fer sa ki i ti kapab pour pa met son lekor dan danze tan ki sa pa ti al kont lavolonte Bondye. Ozordi osi, bann Kretyen i fer parey.​—Mat. 10:16.

“Zot ti vreman kontan en kantite” (Akt 20:5-12)

12, 13. (a) Ki mannyer bann frer ek ser dan kongregasyon ti santi ler Etikis ti ganny resisite? (b) Ki lespwar dan Labib ki fer bann ki’n perdi en dimoun ki zot kontan dan lanmor, kontan?

¹² Pol ek bann dimoun ki ti avek li ti al Masedwann ansanm e apre sakenn ti fer son prop semen. Apre, zot ti rezwenn ankor Troas.d Sa resi i dir: “Senk zour pli tar, nou ti zwenn zot Troas.”e (Akt 20:6) Laba menm ki Pol ti resisit Etikis, parey nou’n vwar o konmansman sa sapit. Zis mazinen ki mannyer bann frer ek ser ti santi ler zot ti vwar ki zot zanmi Etikis ti’n ganny resisite! Parey sa resi i dir, “zot ti vreman kontan en kantite.”​—Akt 20:12.

¹³ Byensir, ozordi napa sa bann kalite mirak. Me ler bann ki’n perdi en dimoun ki zot kontan dan lanmor, i konn sa lespwar konsernan rezireksyon ki dan Labib, “zot vreman kontan en kantite.” (Zan 5:28, 29) Remark sa: Vi ki Etikis ti enparfe, pli tar i ti mor ankor. (Rom. 6:23) Me bann dimoun ki pou resisite dan nouvo lemonn pou ganny sa sans pour viv pour touzour! An plis ki sa, bann dimoun ki pou diriz ansanm avek Zezi dan lesyel, pou vin imortel. (1 Kor. 15:51-53) Bann Kretyen ozordi, ki swa bann ki’n ganny swazir oubyen “lezot mouton,” zot annan bon rezon pour zot “vreman kontan en kantite.”​—Zan 10:16.

“An piblik e kazankaz” (Akt 20:13-24)

14. Ki Pol ti dir bann ansyen Efez ler i ti zwenn zot Mile?

¹⁴ Pol ek bann dimoun ki ti avek li ti kit Troas e zot ti al Asos, apre zot ti al Mitilenn, Kyos, Samos ek Mile. Pol ti anvi ariv Zerizalenm a tan pour Lafet Lapannkot. Vi ki ler i ti pe retournen i ti anvi ariv Zerizalenm pli vit posib pour Lapannkot, i ti pran en bato ki pa ti aret Efez. Me kantmenm sa, Pol ti anvi koz avek bann ansyen Efez, alor i ti demann zot pour zwenn li Mile. (Akt 20:13-17) Ler zot ti arive, Pol ti dir zot: “Zot konn tre byen sa ki mon’n fer ler mon ti avek zot depi premye zour ki mon ti met lipye dan provens Lazi. Mon’n travay konman lesklav pour Senyer avek bokou limilite ek larm e pas atraver bann leprev akoz konplo bann Zwif. Me mon pa ti ezite dir zot tou sa ki ti pour zot prop dibyen e pour ansenny zot an piblik e kazankaz. Me mon ti rann temwannyaz afon avek bann Zwif ek bann Grek pour zot repantir devan Bondye e annan lafwa dan nou Senyer Zezi.”​—Akt 20:18-21.

15. Ki serten lavantaz i annan pour pres kazankaz?

¹⁵ Ozordi, i annan diferan fason pour pres sa bon nouvel. Parey Pol, nou fer zefor pour al pres dan bann landrwa kot i annan dimoun, par egzanp lo bestop, lo semen kot i annan en kantite dimoun oubyen dan bazar. Me pres kazankaz i sa metod ki bann Temwen Zeova i servi plis. Akoz? En rezon i akoz predikasyon kazankaz i donn tou dimoun sa loportinite pour tann sa mesaz Rwayonm regilyerman e sa i montre ki Bondye pa fer lapreferans. I osi permet bann dimoun ki annan leker senser pour ganny led ki zot bezwen. Predikasyon kazankaz i osi ed bann dimoun ki pe fer sa travay pour kontinyen andire e i fer zot lafwa vin pli for. Anfet, en keksoz ki idantifye bann vre Kretyen ozordi i ki zot devoue pour rann temwannyaz “an piblik e kazankaz.”

16, 17. Ki mannyer Pol ti demontre kouraz e ki mannyer bann Kretyen ozordi i swiv son legzanp?

¹⁶ Pol ti dir bann ansyen Efez ki i pa konnen ki bann danze i pou kapab gannyen ler i retourn Zerizalenm. I ti dir zot: “Kantmenm sa, mon prop lavi pa enportan pour mwan, sa ki enportan se ki mon kapab fini mon lakours ek sa minister ki mon’n gannyen avek Senyer Zezi, pour rann temwannyaz afon lo sa bon nouvel konsernan labonte ekstraordiner Bondye.” (Akt 20:24) Pol ti demontre kouraz e i pa ti les nanryen, setadir problenm lasante oubyen persekisyon, anpes li fini son travay ki i ti annan pour fer.

¹⁷ Ozordi osi, bann Kretyen i andir diferan kalite problenm. Dan serten pei, gouvernman i enterdi sa travay predikasyon e zot ganny persekite. I annan ki pe lager avek en maladi oubyen en problenm emosyonnel. Bann zenn Kretyen i fer fas avek presyon kot lekol. Nenport sirkonstans ki zot ladan, bann Temwen Zeova i reste fidel avek Zeova parey Pol. Zot determinen pour “rann temwannyaz afon lo sa bon nouvel.”

“Vey byen zot lekor e lo tou dimoun ki dan troupo” (Akt 20:25-38)

18. Ki Pol ti fer pour li pa responsab pour lanmor personn e ki mannyer bann ansyen Efez ti kapab fer parey?

¹⁸ Apre sa, Pol ti averti bann ansyen Efez e i ti dir zot ki zot kapab swiv son legzanp. Premyerman, i ti dir zot ki sa ti kapab sa dernyen fwa ki zot ti pou vwar li. Apre sa i ti dir: “Mon pa responsab pour lanmor personn, parski mon pa’n ezite pour dir zot tou keksoz lo lavolonte Bondye.” Ki mannyer bann ansyen Efez ti pou kapab swiv legzanp Pol e fer ki zot pa responsab pour lanmor personn? I ti dir zot: “Vey byen zot lekor e lo tou dimoun ki dan troupo. Lespri sen in apwent zot konman sirveyan pour pran swen avek kongregasyon Bondye ki i’n aste avek disan son prop Garson.” (Akt 20:26-28) Pol ti averti zot ki i pou annan dimoun ki pou vin parmi troupo parey “lelou feros” e zot pou “devir laverite e fer bann disip swiv zot.” Ki sa bann ansyen ti devret fer? Pol ti dir zot: “Reste eveye e rapel byen ki pour trwa-z-an, lizour konman aswar, mon pa ti zanmen aret averti zot avek larm.”​—Akt 20:29-31.

19. Ki mannyer i ti konmans annan bann aposta ver lafen premye syek e ki ti arive plizyer syek pli tar?

¹⁹ Ver lafen premye syek, bann dimoun ki ti parey “lelou feros” ti konmans vin dan kongregasyon. Apepre lannen 98, zapot Zan ti ekri: “I deza annan en kantite lennmi Kris. . . . Zot ti parmi nou, me zot pa ti parey nou, parski si zot ti parey nou, zot ti pou’n reste avek nou.” (1 Zan 2:18, 19) Dan trwazyenm syek, vi ki i ti deza annan bann aposta, sa ti fer ki i ti annan bann sef larelizyon ki swadizan Kretyen e dan katriyenm syek, Lanperer Constantine ti fer ki sa bann larelizyon “Kretyen” i ganny rekonnet. Bann sef larelizyon ti “devir laverite” parski zot ti fer krwar ki sa bann koutim payen ki zot ti pe swiv ti bann koutim “Kretyen.” Ozordi, nou kapab vwar sa menm keksoz dan sa ki bann larelizyon ki swadizan Kretyen i ansennyen e dan zot bann koutim.

20, 21. Ki mannyer Pol ti met lentere lezot avan sa ki pour li e ki mannyer bann ansyen dan kongregasyon i kapab fer parey?

²⁰ Lafason ki Pol ti viv ti vreman diferan avek sa bann dimoun ki ti pou esey anbet troupo pli tar. Pol ti travay pour siport son lekor pour ki i pa met en fardo lo kongregasyon. I ti fer en kantite keksoz pour bann frer ek ser me i pa ti pe fer sa pour li vin ris. Pol ti ankouraz bann ansyen Efez pour toultan met lentere lezot avan sa ki pour zot. I ti dir zot: “Ed sa bann ki feb e zot devret gard antet parol nou Senyer Zezi ler li menm i ti dir: ‘I annan plis lazwa pour donnen ki pour resevwar.’”​—Akt 20:35.

²¹ Ozordi, bann ansyen i fer parey Pol e zot met lentere lezot avan sa ki pour zot. Zot pa fer parey bann sef larelizyon ki swadizan Kretyen, ki pran larzan avek zot troupo pour zot vin ris, o kontrer sa bann ansyen in ganny sa responsabilite pour “pran swen avek kongregasyon Bondye” e zot met lentere lezot avan sa ki pour zot. Bann frer ek ser dan kongregasyon pa devret orgeye oubyen anvi vin bann dimoun enportan, parski sa bann ki “rod son prop laglwar” pa pou reisi. (Prov. 25:27) Anfet, bann dimoun ki arogan pou onte.​—Prov. 11:2.

22. Kwa ki ti fer bann ansyen dan lavil Efez kontan Pol?

²² Bann frer ek ser ti kontan Pol parski i ti kontan zot. Anfet, ler i ti’n ariv ler pour li ale, “zot tou zot ti plere en bon pe, zot ti may Pol e anbras li avek tandres.” (Akt 20:37, 38) Bann Kretyen i kontan e apresye bann dimoun ki fer parey Pol e ki met lentere troupo avan sa ki pour zot. Apre ki ou’n vwar bon legzanp Pol, pa ou pou dakor ki Pol pa ti pe fer vantar oubyen egzazere ler i ti dir: “Mon pa responsab pour lanmor personn”?​—Akt 20:26.