Ki mannyer ou fanmir i kapab ere?

1. Akoz maryaz i enportan pour en fanmir ere?

Sa bon nouvel i sorti kot Zeova, sa Bondye ere ki oule bann fanmir i ere. (1 Timote 1:11) Bondye ki ti konmans sa laranzman maryaz. Ler de dimoun in marye legalman, sa i enportan pour ki zot fanmir i ere akoz bann zanfan i kapab grandi dan en lanvironnman ki an sekirite. Bann Kretyen i devret respekte lalwa zot pei konsernan lafason ki maryaz i ganny anrezistre.​—Lir Lik 2:1, 4, 5.

Ki mannyer Bondye i vwar maryaz? I oule ki sa i en linyon permanan ant en zonm ek en fanm. Zeova i oule ki bann msye ek madanm i reste fidel avek kanmarad. (Ebre 13:4) I ay divors. (Malaki 2:16) Me i permet en Kretyen pour divorse e remarye si son msye oubyen madanm in komet adilter.​—Lir Matye 19:3-6, 9.

2. Ki mannyer en koup marye i devret tret kanmarad?

Zeova ti kree zonm ek fanm pour ki zot zwe en rol ki konplemant kanmarad dan maryaz. (Zenez 2:18, NWT) Konman sef fanmir, sa msye i annan sa responsabilite pour fourni son fanmir avek dekwa lo plan materyel e i devret osi ansenny zot lo Bondye. En msye i devret kontan son madanm e pare pour fer sakrifis pour li. Sa msye ek son madanm i devret kontan e respekte kanmarad. Vi ki bann msye ek madanm i enparfe, i vreman enportan ki zot aprann pardonnen si zot oule ere dan zot maryaz.​—Lir Efezyen 4:31, 32; 5:22-25, 33; 1 Pyer 3:7.

3. Si ou pa ere avek ou konzwen, eski ou devret kit li?

Si ou rankontre bann difikilte dan ou maryaz, zot tou le de zot devret fer zefor pour tret kanmarad avek lanmour. (1 Korentyen 13:4, 5) Parol Bondye pa ankouraz separasyon pour rezourd bann problenm ki normalman arive dan maryaz.​—Lir 1 Korentyen 7:10-13.

4. Zanfan, ki Bondye i ekspekte avek ou?

Zeova i oule ki ou ere. I donn ou sa pli bon konsey pour ki ou lavi konman en zenn i gou. I oule ki ou benefisye avek lasazes ek leksperyans ou paran. (Kolosyen 3:20) Zeova i anvi ki ou osi ou ere kan ou fer keksoz pour ou Kreater ek son Garson.​—Lir Eklezyast 11:9–12:1; Matye 19:13-15; 21:15, 16.

5. Paran, ki mannyer ou zanfan i kapab ere?

Ou devret travay dir pour donn ou zanfan manze, lenz ek landrwa reste. (1 Timote 5:8) Me pour ki ou zanfan i ere, ou bezwen ansenny zot pour kontan Bondye e les Bondye ansenny zot. (Efezyen 6:4) Ou lanmour pour Bondye i kapab annan en gran lefe lo leker ou zanfan. Si ou lenstriksyon i baze lo Parol Bondye, i kapab annan en bon lefe lo fason panse ou zanfan.​—Lir Deterononm 6:4-7; Proverb 22:6.

Bann zanfan i bezwen ganny ankouraze e felisite. Zot osi bezwen koreksyon ek disiplin. Sa formasyon pou anpes zot fer bann keksoz ki ti’n kapab fer zot malere. (Proverb 22:15) Toudmenm, disiplin pa zanmen devret dir ouswa kriyel.​—Lir Kolosyen 3:21.

Temwen Zeova i pibliy diferan liv ki kapab ed bann paran ek zanfan. Sa bann liv i baze lo Labib.​—Lir Psonm 19:7, 11.