Ki byenfe nou gannyen avek bann prensip Labib?

1. Akoz nou bezwen gidans?

Nou Kreater i pli saz ki nou. Konman en Papa ki kontan nou, i enterese avek nou. Deplis, i pa ti dan son plan pour nou depan lo nou prop lekor. (Zeremi 10:23, NWT) Alor, zis parey en zanfan i bezwen gidans son paran, nou tou nou bezwen gidans Bondye. (Izai 48:17, 18, NWT) Bann prensip dan Labib i gid nou e i en kado sorti kot Bondye.​—Lir 2 Timote 3:16.

Bann lalwa ek prensip Zeova i ansenny nou sa pli bon fason viv la konmela e i montre nou konman ki nou pou ganny rekonpans eternel dan lavenir. Vi ki Bondye in kree nou, i normal pour nou aksepte son gidans avek lapresyasyon.​—Lir Psonm 19:7, 11; Revelasyon 4:11.

2. Kisisa bann prensip Labib?

Bann prensip Labib i bann laverite de baz. De lot kote, lalwa i aplikab dan bann sityasyon pli spesifik. (Deterononm 22:8) Nou devret servi nou abilite pour reflesir pour konpran ki mannyer en prensip i aplikab dan en sityasyon spesifik. (Proverb 2:10-12) Par egzanp, Labib i ansennyen ki lavi i en kado sorti kot Bondye. Sa prensip i kapab gid nou dan nou landrwa travay, kot lakour e kan nou pe vwayaze. I gid nou pour ki nou pa met nou lavi ouswa lavi lezot an danze.​—Lir Akt 17:28.

3. Lekel sa de prensip pli enportan?

Zezi ti koz lo de prensip byen enportan. Sa premye prensip i montre ki bi lavi bann imen. Sa bi se pour konn, kontan e servi Bondye fidelman. Dan tou desizyon ki nou fer nou devret swiv sa premye prensip. (Proverb 3:6) Bann dimoun ki pran sa prensip o serye i vin zanmi Bondye, zot ere e zot pou ganny lavi eternel.​—Lir Matye 22:36-38.

Sa dezyenm prensip i montre nou ki mannyer pour viv anpe avek lezot. (1 Korentyen 13:4-7) Nou kapab aplik sa dezyenm prensip par imit lafason ki Bondye i tret lezot.​—Lir Matye 7:12; 22:39, 40.

4. Ki byenfe nou gannyen avek bann prensip Labib?

Bann prensip Labib i montre ki mannyer bann fanmir i kapab ini ansanm dan lanmour. (Kolosyen 3:12-14) Parol Bondye i osi protez bann fanmir akoz i ansenny en lot prensip, sa se ki maryaz i en keksoz permanan.​—Lir Zenez 2:24.

Si nou swiv bann lansennyman Labib, sa i kapab protez nou lo plan materyel e emosyonnel. Par egzanp, bann anplwayer i prefere annan bann anplwaye ki swiv sa prensip pour travay dir e onnet. (Proverb 10:4, 26; Ebre 13:18) Parol Bondye i osi ansenny nou pour kontant nou avek bann keksoz neseser e ki en relasyon pros avek Bondye i pli enportan ki bann keksoz materyel.​—Lir Matye 6:24, 25, 33; 1 Timote 6:8-10.

Nou pou annan en pli bon lasante si nou swiv bann prensip Labib. (Proverb 14:30, NWT; 22:24, 25) Par egzanp, si nou swiv lalwa Bondye pour pa bwar tro bokou, sa pou anpes nou ganny bann maladi mortel ouswa fer aksidan. (Proverb 23:20) Zeova i permet nou bwar lalkol, me nou pa devret bwar bokou. (Psonm 104:15; 1 Korentyen 6:10) Bann prensip Labib i benefisye nou akoz i ansenny nou pour pa zis vey sa ki nou fer me osi sa ki nou panse. (Psonm 119:97-100) Me, bann vre Kretyen pa zis respekte bann standar Bondye zis pour zot benefisye. Zot fer li pour onor Zeova.​—Lir Matye 5:14-16.