Rebeka ti anvi fer Zeova kontan

Rebeka ti en madanm ki ti kontan Zeova. Son msye ti apel Izaak. Li osi i ti kontan Zeova. Ki mannyer Rebeka ti zwenn Izaak? Ki mannyer Rebeka ti montre ki i ti anvi fer Zeova kontan? Annou koz en pe plis lo li.

Papa Izaak ti apel Abraam e son manman ti apel Sara. Zot ti reste Kanaan. Bann dimoun laba pa ti ador Zeova. Me Abraam ti anvi ki son garson i marye avek en madanm ki ador Zeova. Alor, i ti anvoy enn son serviter, petet Eliezer pour al rod en madanm pour Izaak dan en pei ki ti apel Arann. Bann fanmir Abraam ti reste laba Arann.

Eliezer ti al ansanm avek lezot serviter Abraam. Sa vwayaz ti vreman long. Zot ti al avek dis samo ki ti pe anmenn manze ek kado. Me, ki mannyer Eliezer ti pou konnen ki madanm i ti pou swazir pour Izaak? Kan Eliezer ek lezot serviter ti ariv Arann, zot ti aret kot en pwi akoz Eliezer ti konnen ki i ti pou annan dimoun ki ti pou vin la pour vin sers delo. I ti priy Zeova e dir: ‘Si mon demann en zenn madanm delo e i donn mwan delo e i donn mon bann samo delo osi, mon pou konnen ki li menm ki ou’n swazir.’

Apre sa, Rebeka ti vin kot pwi. Labib i dir ki i ti vreman zoli. Ler Eliezer ti demann li en pe delo pour bwar, Rebeka ti dir: ‘Byensir. Mon pou donn ou delo epi mon pou al rod ankor pour ou bann samo osi.’ Zis mazinen! Ler samo i swaf, i bwar en kantite delo. Savedir Rebeka ti bezwen ale vini en kantite fwa kot pwi. Eski ou vwar li pe travay dir dan sa portre?— Eliezer ti vreman sirprann avek lafason ki Zeova ti ekout son lapriyer.

Eliezer ti donn Rebeka en kantite zoli kado. Rebeka ti envit Eliezer ek lezot serviter kot lakour son fanmir. Eliezer ti eksplike akoz Abraam ti’n anvoy li laba e ki mannyer Zeova ti’n reponn son lapriyer. Fanmir Rebeka ti kontan pour les Rebeka marye avek Izaak.

Eski ou krwar Rebeka ti anvi marye avek Izaak?— Rebeka ti konnen Zeova ki ti’n anvoy Eliezer kot li. Alor, ler fanmir Rebeka ti demann li si i ti anvi al Kanaan pour marye avek Izaak, i ti dir: ‘Wi, mon anvi ale.’ Deswit apre, i ti al avek Eliezer. Kan zot ti ariv Kanaan, i ti marye avek Izaak.

Vi ki Rebeka ti obei Zeova, Zeova ti beni li. Zezi ti ne dan son fanmir en kantite lannen pli tar! Si ou fer parey Rebeka e fer Zeova kontan, i pou beni ou osi.