Zot ti ekri lo Zezi

Eski ou vwar sa bann zonm dan sa portre?— Zot apel Matye, Mark, Lik, Zan, Pyer, Zak, Zid ek Pol. Sa bann zonm ti viv dan menm lepok ki Zezi e zot ti ekri lo Zezi. Annou koz plis lo zot.

Trwa parmi zot ti bann zapot ki ti pres ansanm avek Zezi. Eski ou konnen lekel sa trwa?— Matye, Zan ek Pyer. Matye ek Zan ti bann zapot ki ti konn Zezi tre byen e zot tou le de zot ti ekri en liv lo lavi Zezi. Zapot Zan ti osi ekri en liv ki apel Revelasyon e trwa let ki apel Premye Zan, Dezyenm Zan ek Trwazyenm Zan. Zapot Pyer ti ekri de let ki dan Labib. Sa de let i apel Premye Pyer ek Dezyenm Pyer. Dan son dezyenm let, Pyer ti ekri konsernan sa letan ler Zeova ti koze dan lesyel e dir sa lo Zezi: ‘Sa i mon garson. Mon kontan li e mon fyer akoz li.’

Lezot zonm dan sa portre osi ti koz lo Zezi dan bann liv ki zot ti ekrir. Enn parmi zot ti apel Mark. Manke i ti la ler Zezi ti ganny arete e i ti vwar tou sa ki ti arive. En lot i apel Lik. I ti en dokter e petet i ti vin en Kretyen apre lanmor Zezi.

De lezot ekriven Labib ki ou vwar dan sa portre ti bann pti frer Zezi. Eski ou konnen ki mannyer zot apele?— Zot apel Zak ek Zid. Premye kou, zot pa ti krwar dan Zezi. Zot ti menm krwar ki i ti en pti pe fou fou. Me pli tar zot ti krwar dan Zezi e vin Kretyen.

Dernyen ekriven Labib ki ou vwar dan sa portre se Pol. Avan ki i ti vin en Kretyen, i ti apel Sol. I pa ti kontan bann Kretyen e i ti fer zot mizer. Eski ou konnen kwa ki ti fer Pol anvi vin en Kretyen?— En zour, Pol ti pe vwayaze lo semen kan en sel kou i ti tann en lavwa dan lesyel koz avek li. I ti Zezi sa! I ti demann Pol: ‘Akoz ou fer martir bann ki krwar dan mwan?’ Apre sa, Pol ti sanze e vin en Kretyen. Pol ti ekri 14 liv Labib, depi Romen ziska Ebre.

Nou lir Labib sak zour nou, pa i vre?— Ler nou lir Labib, nou aprann en kantite keksoz lo Zezi. Eski ou ti a kontan konn plis lo Zezi?—