SAPIT 20

Dezyenm mirak dan lavil Kana

ZEZI I PRESE KI “RWAYONM LESYEL IN APROSE”
I GERI EN GARSON KI DAN EN LOT LANDRWA

Apre ki Zezi in pas apepre de zour Samari, i kit sa landrwa pour al dan son prop rezyon. I’n fer en gran kanpanny predikasyon Zide, me i pa pe retourn Galile pour repoze. O kontrer, i anvi fer plis dan son minister dan sa rezyon kot i’n grandi. Petet i pa pe ekspekte ki i pou ganny byen resevwar laba, akoz Zezi in dir ki “en profet pa ganny onore dan son prop pei.” (Zan 4:44) Olye reste avek Zezi, son bann disip i retourn kot zot fanmir e repran travay ki zot ti fer avan.

Ki mesaz Zezi i konmans anonse? Son mesaz i: “Rwayonm Bondye in aprose. Repantir e annan lafwa dan sa bon nouvel.” (Mark 1:15) Ki mannyer bann dimoun i reazir anver sa mesaz? En kantite Galileen i akey li e onor li. Zot pa pe fer sa zis akoz son mesaz. Plizyer mwan pase, serten parmi sa bann Galileen ti Zerizalenm pour Lapak e zot ti’n vwar bann mirak remarkab ki Zezi ti fer.—Zan 2:23.

Kote Zezi i konmans son minister, Galile? Aparaman dan lavil Kana, kot Zezi ti’n fer delo vin diven dan en resepsyon maryaz. La i fer dezyenm fwa ki Zezi i laba e i tande ki i annan en garson ki telman malad ki pros pour mor. I garson en zofisye gouvernman ki travay pour Lerwa Erod Antipas. Li menm li sa lerwa ki pou fer koup latet Zan ki batize pli tar. Sa zofisye i tande ki Zezi in retournen sorti Zide e ki aprezan i Kana. Alor sa zofisye i sorti Kapernaoum e i al Kana pour vwar Zezi. Dan son gran latristes, i sipliy Zezi: “Senyer, vin avek mwan avan ki mon zanfan i mor.”—Zan 4:49.

Sa msye i sirprann ler i tann larepons Zezi. Zezi i dir li: “Ale, ou garson in geri.” (Zan 4:50) Sa zofisye Erod i krwar Zezi e i retourn se li. Son bann lesklav i zwenn li dan milye semen pour donn li en bon nouvel. Son garson i byen, i ankor vivan! Pour esey konpran sa ki’n vreman arive, i demann zot: “Ki ler i ti ganny geri”?

Zot reponn: “Sa lafyev ti kit li yer enn er apremidi.”—Zan 4:52.

Bann lesklav i vin zwenn sa zofisye dan semen e i retourn kot li apre ki Zezi in geri son garson

Sa zofisye i realize ki i ti sanmenm sa ler ki Zezi ti’n dir, “Ou garson in geri.” I paret ki sa msye i ris akoz i annan bann lesklav. Apre sa, li ek tou dimoun dan son lakour i vin disip Kris.

Zezi in fer de mirak dan lavil Kana. Premyerman, i’n fer delo vin diven e apre i’n geri en garson ki ti en zistans apepre 26 kilomet avek li. Byensir, Zezi pa’n fer zis sa de mirak. Me sa gerizon i enportan akoz i montre ki i’n retourn Galile. I kler ki i en profet ki Bondye in aprouve, me ziska ki degre sa ‘profet pou ganny onore dan son prop pei’?

Nou pou vwar sa anmezir ki Zezi i retourn kot li Nazaret. Ki pou arive laba?