“Ou pese in ganny pardonnen”

Aprezan dimoun partou kote in tann koz lo Zezi. I annan dimoun ki menm sorti lwen pour vin ekout li ansennyen e pour vwar son bann mirak. Par kont, apre detrwa zour, i retourn Kapernaoum, sa landrwa prensipal kot i ti reste diran son minister. Partou dan sa lavil ki o bor Lanmer Galile, nouvel i fannen ki Zezi in retournen. Sa i fer ki bokou dimoun i vin kot sa lakaz kot i ete. Serten parmi zot i bann Farizyen ek ansenyan Lalwa ki sorti partou Galile ek Zide, enkli Zerizalenm.

‘I annan sitan en kantite dimoun ki’n rasanble la ki i nepli annan plas ankor, pa ni menm devan laport, alor i konmans koz lo parol Bondye avek zot.’ (Mark 2:2) La devan tou sa bann dimoun en keksoz vreman remarkab pe al arive. Sa pou montre nou ki Zezi i annan pouvwar pour retir pese ek soufrans e i kapab fer tou dimoun reganny en bon lasante.

Anmezir ki Zezi pe ansennyen dan sa lasanm ranpli avek dimoun, kat zonm i anmenn en zonm paralize lo en lanmak. Zot oule ki Zezi i geri zot zanmi. Par kont, vi ki i annan en lafoul dimoun, zot pa kapab “anmenn li kot Zezi.” (Mark 2:4) Zis mazinen ki kantite sa ti’n kapab dekouraz zot! Zot mont lo twa lakaz ki plat e zot fer en trou. Apre sa, zot fer desann sa lanmak ki sa zonm paralize i lo la.

Eski Zezi i ankoler akoz zot in enteronp li? Byensir non! I vreman enpresyonnen ler i vwar zot lafwa e i dir avek sa zonm paralize: “Ou pese in ganny pardonnen.” (Matye 9:2) Me eski Zezi i vreman kapab pardonn bann pese? Bann profeser lalwa ek bann Farizyen i pran sa an mal e zot dir: “Akoz sa zonm pe koz koumsa? I pe koz kont Bondye. Lekel apard Bondye ki kapab pardonn pese?”​—Mark 2:7.

Zezi i konnen ki zot pe mazinen, alor i dir zot: “Akoz zot pe mazin bann keksoz koumsa? Kwa ki pli fasil pour dir sa zonm paralize, ‘Ou pese in ganny pardonnen’ oubyen pour dir ‘Leve, pran ou lanmak e marse?’” (Mark 2:8, 9) Baze lo sa sakrifis ki Zezi pou ofer pli tar, i kapab pardonn pese sa zonm.

Apre sa, Zezi i montre sa lafoul, enkli bann ki pe kritik li, ki i annan lotorite pour pardonn pese lo later. I vire pour get sa zonm paralize e i donn li sa lord: “Mon dir ou, Leve, pran ou lanmak e al kot ou.” Deswit sa zonm i fer sa. Devan tou dimoun i pran son lanmak e ale. Bann dimoun pa oule krwar sa ki zot in vwar! Zot loue Bondye e dir: “Zanmen nou’n deza vwar en keksoz koumsa”!​—Mark 2:11, 12.

I enportan pour remarke ki Zezi i montre ki nou malad akoz pese e reganny en bon lasante i relye avek pardonn pese. Labib i dir ki nou zanset Adan ti fer pese e ki nou tou nou’n erit pese ek tou son bann konsekans, setadir maladi ek lanmor. Me anba dominasyon Rwayonm Bondye, Zezi pou pardonn pese tou bann ki kontan e servi Bondye. Ler sa i arive, i pou nepli annan maladi pour touzour.​—Romen 5:12, 18, 19.