Eski en dimoun i kapab fer bann bon keksoz zour Saba?

Zezi in fer en kantite pandan son minister Galile. Par kont, ler Zezi i dir, “Mon bezwen anons bon nouvel Rwayonm Bondye dan lezot lavil,” i pe mazin lezot landrwa apard ki Galile. Alor, i al “prese dan bann sinagog Zide.” (Lik 4:43, 44) Sa i fer sans parski i dan letan prentan e bann Zwif i pros pour selebre en lafet Zerizalenm.

Levanzil pa koz bokou lo son bann aktivite Zide par kont i koz bokou lo minister Zezi, Galile. Menm si laplipar dimoun Zide pa enterese avek mesaz Zezi, sa pa anpes li pres avek devouman e fer bann mirak partou kote.

Pa bokou letan apre, Zezi i al Zerizalenm, lavil prensipal Zide, pour asiste Lapak lannen 31. Pre o bor sa landrwa ki apel Baro Mouton, kot i annan en kantite aktivite, i annan en gran basen avek bann kolonn toultour. Sa basen i apel Betzata. I annan en kantite dimoun malad, aveg e bwate ki vin kot sa basen. Pour ki rezon? Parski zot krwar ki bann dimoun i kapab ganny geri si zot antre dan sa basen ler delo i azite.

En zour Saba, Zezi i vwar en zonm ki’n malad pour 38 an kot sa basen. Zezi i demann li: “Eski ou ti a kontan ganny geri?” Sa zonm i reponn: “Msye, mon napa personn pour met mwan dan basen ler delo pe azite, me ler mon pe esey ale, en lot dimoun i pas avan mwan.”​—Zan 5:6, 7.

Zezi i dir en keksoz ki fer sa zonm e tou dimoun ki tande sirprann: “Leve! Pran ou nat e marse.” (Zan 5:8) Sa zonm i fer sanmenm sa. Deswit sa zonm i ganny geri, i anmas son nat e i konmans marse!

Ler bann Zwif i vwar sa zonm, olye kontan ki en bon keksoz in arive, zot konmans ziz li e dir: “I en zour Saba e i kont lalwa pour ou anmenn sa nat.” Sa zonm i reponn zot: “Sa enn ki’n geri mwan ki’n dir mwan, ‘Pran ou nat e marse.’” (Zan 5:10, 11) Sa bann Zwif i kritik sa dimoun ki’n fer sa gerizon zour Saba.

Zot demann li, “Lekel sa zonm ki’n dir ou, ‘Pran ou nat e marse’?” Akoz zot demann li sa? Parski i “annan bokou dimoun e Zezi [in] kit sa landrwa.” Sa zonm ki’n ganny geri pa konnen ki mannyer Zezi i apele. (Zan 5:12, 13) Me pli tar, sa zonm i zwenn Zezi dan tanp e aprezan i konnen lekel ki’n geri li kot sa basen.

Sa zonm ki’n ganny geri i al kot bann Zwif ki ti’n demann li lekel ki’n geri li. I dir zot ki i Zezi. Ler zot tann sa, zot al kot Zezi. Eski zot al kot Zezi pour konnen ki mannyer Zezi i kapab fer sa bann keksoz ekstraordiner? Non. Plito, zot kritik Zezi akoz i’n fer sa bann bon keksoz zour Saba. Zot menm konmans persekit li akoz sa!