En pti fiy i ganny resisite!

Zairis i vwar ler Zezi i geri sa madanm ki annan lemorazi. Alor i mazinen ki sirman Zezi i kapab ed son fiy osi, menm si i krwar ki son “fiy in bezwen fini mor aprezan.” (Matye 9:18) Eski Zezi i ankor kapab ed li?

Ler Zezi i ankor pe koz avek sa madanm ki i’n geri, serten zonm sorti dan lakour Zairis i vin dir li: “Ou fiy in mor! I pa neseser deranz Ansenyan plis ki sa, non?”​—Mark 5:35.

Sa nouvel in bezwen tap Zairis! Menm si dimoun i annan bokou respe pour li dan son kominote, sa zonm pa kapab fer nanryen. Son sel fiy in mor. Me Zezi i tande sa ki zot in dir Zairis. I vire, get Zairis e dir: “Pa bezwen per, zis annan lafwa.”​—Mark 5:36.

Apre sa, Zezi i al avek Zairis kot li. Ler zot arive zot tann en kantite tapaz. Bann dimoun ki’n rasanble pe fer leokri, plere e tap zot lestoman akoz zot dan latristes. Zezi i antre anndan e dir zot en keksoz enkrwayab: “Sa zanfan pa’n mor me i pe dormi.” (Mark 5:39) Ler zot tann sa, bann dimoun i riy Zezi. Zot konnen ki sa fiy in vreman mor. Par kont, Zezi pou servi pwisans Bondye pour montre ki i posib pour dimoun mor reviv zis parey en dimoun ki pe dormi i kapab leve.

Aprezan Zezi i fer tou dimoun al deor, eksepte Pyer, Zak, Zan ek paran sa fiy ki’n mor. I pran sa senk dimoun avek li e zot al kot sa fiy i ete. I pran lanmen sa fiy e dir: “‘Talita koumi,’ ki vedir: ‘Pti fiy, mon dir ou, leve!’” (Mark 5:41) Deswit sa pti fiy i leve e konmans marse. Zairis ek son madanm pa oule krwar sa ki’n arive, zot dan en gran lazwa! Pour montre ki sa fiy i vreman vivan, Zezi i demann zot pour donn li en pe manze.

Normalman, Zezi i demann bann ki i geri pour pa dir personn sa ki i’n fer pour zot e i demann paran sa fiy pour fer parey. Me kantmenm sa, paran sa fiy ek lezot dimoun ki la i fann sa nouvel “partou dan sa rezyon.” (Matye 9:26) Si ti ou, pa ou osi ou ti pou koz lo la avek tou dimoun? Dapre sa ki’n ganny rikorde dan Labib, sa i dezyenm rezireksyon ki Zezi in fer.