Nou kontan ler en dimoun i repantir

Plizyer fwa pandan son minister, Zezi in koz lo lenportans pour annan limilite. (Lik 14:8-11) I pe rod bann zonm ek fanm ki anvi servi Bondye avek limilite. Ziska aprezan, i posib ki serten parmi zot i ankor pe fer bann pese grav.

Bann Farizyen ek profeser lalwa i remarke ki sa bann dimoun ki annan en move lavi i kontan Zezi ek son mesaz. Bann Farizyen ek profeser lalwa pa konsider sa bann dimoun diny pour resevwar sa mesaz e zot konplent: “Sa zonm i akeyir bann ki annan en move lavi e i manz avek zot.” (Lik 15:2) Zot krwar ki zot pli siperyer e zot tret bann dimoun ordiner pli ba ki later. Pour montre ki kantite zot mepriz sa bann dimoun, sa bann sef i apel zot ‛am ha·’aʹrets an Ebre ki vedir bann “dernyen dimoun.”

De lot kote, Zezi i tret tou dimoun avek dinyite, labonte ek konpasyon. Alor en kantite parmi sa bann dimoun, enkli bann ki renonmen pour zot move lavi i vreman anvi ekout Zezi. Me ki mannyer Zezi i santi ler zot pe kritik li akoz i pe ed sa bann dimoun ordiner? Ki mannyer i reazir?

Nou vwar sa atraver en zoli legzanp ki Zezi i donnen, ki en pe parey sa enn ki i ti donnen Kapernaoum. (Matye 18:12-14) Dan tou le de legzanp, bann mouton ki sen e sof dan troupo Bondye i reprezant bann Farizyen ki krwar ki zot drwat e mouton perdi i reprezant bann dimoun ordiner. Zezi i dir:

“Lekel parmi zot ki annan 100 mouton ki si i perdi enn i pa pou kit sa 99 deryer dan dezer pour al rod sa enn ki’n perdi ziska ki i trouv li? Ler i’n trouv li, i byen kontan e i met li lo son zepol. Ler i ariv kot li, i kriy son bann zanmi ek vwazen e dir zot, ‘Vin rezouir avek mwan, parski mon’n trouv mon mouton ki ti’n perdi.’”​—Lik 15:4-6.

Ki mannyer Zezi i aplik sa legzanp? I eksplike: “Mon dir zot ki i pou osi annan plis lazwa dan lesyel ler en dimoun ki annan en move lavi i repantir ki pour 99 dimoun drwat ki pa bezwen repantir.”​—Lik 15:7.

I bezwen drol pour bann Farizyen ki Zezi i koz lo repantans. Dapre zot, zot bann dimoun drwat e alor zot pa bezwen repantir. Ler serten parmi zot ti kritik Zezi detrwa-z-an pase akoz i ti pe manz avek bann kolekter taks ek bann dimoun ki annan en move lavi, Zezi ti dir zot: “Mon’n vini, pa pour dimoun drwat me pour bann ki annan en move lavi.” (Mark 2:15-17) Bann Farizyen ki krwar zot pli siperyer ki lezot pa vwar akoz zot bezwen repantir, alor napa lazwa dan lesyel. Sa i vreman diferan avek sa ki arive ler bann dimoun ki annan en move lavi i vreman repantir.

Zezi i donn en lot legzanp pour met plis lanfaz lo sa pwen ki i annan en gran lazwa dan lesyel ler en dimoun ki annan en move lavi i repantir. Son legzanp i baze lo sa ki arive kot lakour en fanmir. I dir: “Lekel sa madanm ki annan dis pyes larzan ki si i perdi enn, i pa pou alim en lalanp, balye son lakaz e rod li partou ziska ki i trouv li? Ler i’n trouv li, sa madanm i kriy son bann zanmi ek vwazen e dir zot, ‘Vin selebre avek mwan, parski mon’n trouv mon pyes larzan ki ti’n perdi.’”​—Lik 15:8, 9.

Laplikasyon ki Zezi i fer i parey avek legzanp mouton perdi. Aprezan i dir: “Mon dir zot bann lanz Bondye osi i dan lazwa ler en dimoun ki annan en move lavi i repantir.”​—Lik 15:10.

Zis mazin sa, bann lanz Bondye i vreman kontan ler bann dimoun ki annan en move lavi i repantir! Sa i enteresan parski sa bann dimoun ki repantir e antre dan Rwayonm Bondye dan lesyel pou annan en pozisyon pli o ki bann lanz. (1 Korentyen 6:2, 3) Par kont, bann lanz pa zalou. Alor ki mannyer nou devret santi ler en dimoun ki annan en move lavi i retourn kot Bondye e repantir senserman?