PARTI ENN
“Sa enn ki’n perdi, mon pou rode”
Sa mouton i nepli konnen kot i pou ale. Ler i ti pe manz zerb en pti pe partou partou i’n separe avek lezot mouton. Aprezan i pa vwar ni troupo, ni berze. Fernwanr pe fer. Sa mouton in perdi dan en vale kot bann zannimo ki kapab manz li i ale vini e i pa kapab defann son lekor. Alafendefen i tann en lavwa ki i rekonnet, se lavwa sa berze. Sa berze i tay kot sa mouton, pran li, anvlop li dan son lenz e anmenn li ziska dan lakour.
SOUVANDFWA Zeova in konpar li avek en berze. Dan son Parol i donn nou sa lasirans: “Mon pou rod mon bann mouton e mon pou pran swen avek zot.”—Ezekyel 34:11, 12.
“Bann mouton ki mon pran swen avek”
Lekel mouton Zeova? Se bann dimoun ki kontan Zeova e ador li. Labib i dir: “Annou adore e prosternen, annou azenou devan Zeova nou Kreater. Parski i nou Bondye e nou son troupo, bann mouton ki i pran swen avek.” (Psonm 95:6, 7) Parey bann mouton ki pe swiv en berze, bann adorater Zeova i pare pour swiv zot Berze. Eski zot san defo? Non, akoz par ler zot in parey bann ‘mouton ki’n eparpiye,’ “bann brebi perdi” e “bann mouton perdi.” (Ezekyel 34:12; Matye 15:24; 1 Pyer 2:25) Kantmenm sa, ler en dimoun i ganny antrennen, Zeova pa zanmen perdi lespwar ki i pou retournen en zour.
Eski ou santi ki Zeova i ankor ou Berze? Ki mannyer Zeova i azir konman en Berze ozordi? Annou vwar trwa fason:
I nouri nou spirityelman. Zeova i dir: “Mon pou fer zot manz dan en landrwa kot i annan bon zerb . . . Zot pou alonze laba kot i annan bon zerb e zot pou manz bann pli bon zerb.” (Ezekyel 34:14) Zeova in toultan donn nou diferan nouritir spirityel kan i ler. Eski ou kapab rapel en lartik, en diskour ouswa en video ki ti reponn ou lapriyer? Eski pa sa ti konvenk ou ki Zeova i enterese avek ou personnelman?
I protez e siport nou. Zeova i fer sa promes: “Sa enn ki’n elwannyen mon pou retourn avek li, sa enn ki’n blese mon pou bande e sa enn ki fay mon pou fortifye.” (Ezekyel 34:16) Zeova i fortifye bann ki fay ouswa dekouraze akoz zot enkyet. Si son bann mouton i ganny blese, i pans zot e ed zot pour geri, par ler i menm servi son bann serviter pour fer sa. I ed bann ki’n elwannyen, ki kapab pe lalit avek bann santiman negatif pour retournen.
I santi li responsab pour nou. Zeova i dir: “Mon pou sov zot partou kot zot in eparpiye. . . . Sa enn ki’n perdi mon pou rode.” (Ezekyel 34:12, 16) Zeova pa konsider en mouton perdi konman enn ki pa kapab sanze. I konnen ler en mouton in perdi, i rod sa mouton e ler i retrouv li i dan en gran lazwa. (Matye 18:12-14) Apre tou, Zeova i dir ki son bann vre adorater i “mon mouton, bann mouton ki mon pran swen avek.” (Ezekyel 34:31) Ou, ou enn sa bann mouton.
Zeova pa konsider en mouton perdi konman enn ki pa kapab sanze. I dan en gran lazwa ler en mouton i ganny trouve
“Fer ki tou keksoz i vin parey avan”
Akoz Zeova pe rod ou e envit ou pour retourn kot li? Parski i anvi ki ou ere. I promet son bann mouton ki “bann benediksyon pou devers lo zot parey lapli.” (Ezekyel 34:26) Sa pa en promes dan vid. Ou menm ou’n deza eksperyans sa.
Rapel ki mannyer i ti ete ler ou ti pe aprann konn Zeova. Par egzanp, ki mannyer ou ti santi ler ou ti fek aprann laverite lo non Bondye ek son plan pour limanite? Eski ou rapel ki mannyer i ti gou pour zwenn ansanm avek bann frer ek ser Kretyen kot bann lasanble? Ler ou ti ganny sans pres sa bon nouvel avek en dimoun ki ti vreman enterese avek Labib, eski pa ou ti retourn kot ou byen kontan e byen satisfe?
Ou kapab reganny sa bann lazwa. Bann serviter Bondye dan lepase ti priye: “O Zeova, fer nou retourn kot ou e nou pou volonterman retournen. Fer ki tou keksoz i vin parey avan.” (Lamantasyon 5:21) Zeova ti reponn sa lapriyer e ler son pep ti retournen pour servi li zot ti reganny zot lazwa. (Neemya 8:17) Zeova pou fer parey pour ou.
Me an realite, i pli fasil pour dir retourn kot Zeova ki pour fer li. Alor, annou vwar kwa ki fer li difisil pour retournen e ki mannyer ou kapab sirmont sa bann difikilte.