PARTI SENK
Retourn kot “sa berze” ki vey lo zot
Eski ou’n rankontre enn oubyen plizyer parmi sa bann difikilte ki nou’n diskit lo la dan sa pti liv? Si wi, ou pa tousel. Bokou serviter fidel Bondye dan lepase e dan nou letan in fer fas avek sa bann menm difikilte. Zis parey Zeova ti ed zot sirmont sa bann difikilte, ou osi ou kapab.
Zeova pou dan ou kote anmezir ki ou retourn kot li
OU KAPAB asire ki Zeova pou dan ou kote anmezir ki ou retourn kot li. I pou ed ou fer fas avek ou bann traka, pas lo bann lofans e ou pou annan en konsyans kler ki pou donn ou lape lespri ek leker. Tousala i kapab ed ou pour anvi rekonmans servi Zeova ansanm avek ou bann frer ek ser. Ou pou dan menm sityasyon avek serten Kretyen dan premye syek ki zapot Pyer ti ekri sa lo zot: “Parski zot ti konman bann mouton perdi, me aprezan, zot in retourn kot sa berze, ki gardyen zot lam.”—1 Pyer 2:25.
Retourn kot Zeova i definitivman sa pli bon keksoz ki ou kapab fer. Akoz? Ou pou fer Zeova kontan. (Proverb 27:11) Parey ou konnen, Zeova i annan santiman, alor nou bann aksyon i annan en lefe lo li. Byensir, Zeova pa fors nou pour kontan li e servi li. (Deterononm 30:19, 20) En spesyalis Labib ti dir: “Leker imen napa en ponnyen an deor parey en laport. I bezwen ganny ouver par anndan.” Ler nou kontan Zeova avek tou nou leker e ador li, nou kapab swazir pour ouver sa laport. Ler nou fer sa, nou donn li en zoli kado, sa i nou lentegrite e sa i fer li vreman zwaye. Fransman, nanryen pa kapab ganny konpare avek sa lazwa ki nou gannyen ler nou donn Zeova sa ladorasyon ki i merite.—Akt 20:35; Revelasyon 4:11.
Deplis, ler ou rekonmans ador Zeova, ou bezwen spirityel pou ganny konble. (Matye 5:3, NW) Dan ki fason? Partou dan lemonn dimoun i demande, ‘Akoz nou egziste?’ Zot anvi konn larepons bann kestyon konsernan bi lavi. Bann imen i annan sa bezwen spirityel akoz Zeova in kree zot koumsa. I’n kree nou pour ganny satisfaksyon ler nou servi li. Nou ganny sa pli gran satisfaksyon ler nou konnen ki nou pe ador Zeova akoz nou kontan li.—Psonm 63:1-5.
Ou kapab asire ki Zeova i anvi ki ou retourn kot li. Ki mannyer ou pou konn sa? Reflesir en pti kou: Se atraver bokou lapriyer ki sa brosir in ganny byen prepare pour ou. Petet en ansyen, en frer oubyen en ser ki’n anmenn sa brosir kot ou. Apre ou’n ganny motive pour lir li e aplik sa ki ou’n lir dan ou lavi. Tousala i laprev ki Zeova pa’n oubliy ou. O kontrer, i pe zantiman atir ou pour retourn kot li.—Zan 6:44.
I rekonfortan pour konnen ki Zeova pa zanmen oubliy son bann serviter ki’n perdi. Sanmenm sa ki en ser ki apel Donna in aprann. I dir: “Ptitapti mon ti dekile avek laverite, me souvan mon ti medit lo Psonm 139:23, 24 ki dir: ‘O Bondye, egzamin mwan e konn sa ki i annan dan mon leker. Egzamin mwan e konn bann panse ki pe trakas mwan. Gete si i annan okenn keksoz dan mwan ki move e gid mwan lo sa semen leternite.’ Mon ti konnen ki mon pa ti merit dan lemonn, mon pa’n zanmen konfortab laba e mon ti osi konnen ki mon ti bezwen dan lorganizasyon Zeova. Mon ti konmans remarke ki Zeova pa ti’n zanmen kit mwan, me se mwan ki ti bezwen retourn kot li. Mon vreman kontan ki mon’n fer sa!”
“Mon ti konmans remarke ki Zeova pa ti’n zanmen kit mwan, me se mwan ki ti bezwen retourn kot li”
Nou priye ki ou osi ou pou reganny “lazwa Zeova.” (Neemya 8:10) Ou pa pou zanmen regret ou desizyon pour retourn kot Zeova.