Zot fer en promes avek Zeova

Apepre de mwan apre ki bann Izraelit ti’n kit Lezip, zot ti ariv kot Montanny Sinai e zot ti kanpe o bor sa montanny. Zeova ti apel Moiz e i ti mont anler lo montanny. Zeova ti dir li: ‘Mon’n sov bann Izraelit. Si zot obeir mwan e swiv mon lalwa, zot pou vin mon pep spesyal.’ Moiz ti desann lo montanny e dir bann Izraelit sa ki Zeova ti’n dir. Ki zot ti reponn? Zot ti dir: ‘Nou pou fer tou sa ki Zeova i dir nou fer.’

Moiz ti remont anler lo montanny. Laba, Zeova ti dir: ‘Dan trwa zour, mon pou koz avek ou. Dir bann dimoun pa vin anler lo Montanny Sinai.’ Moiz ti desann e i ti demann bann Izraelit pour met zot pare pour ekout Zeova.

Trwazyenm zour, bann Izraelit ti vwar zekler ek en nyaz nwanr lo montanny. Zot ti osi tann en loraz ek tapaz en tronpet. Apre Zeova ti desann lo montanny dan dife. Bann Izraelit ti tranble avek lafreyer. Sa montanny antye ti sekwe e lafimen ti kouver li. Tapaz tronpet ti vin deplizanpli pli for. Apre Bondye ti dir: ‘Mwan mon Zeova. Zot pa devret ador okenn lezot bondye.’

Moiz ti remont lo montanny e Zeova ti donn li bann lalwa. Sa bann lalwa ti pou ed bann Izraelit pour konnen ki mannyer zot devret ador Zeova e ki mannyer zot devret konport zot. Moiz ti ekri sa bann lalwa e apre i ti lir zot avek bann Izraelit. Zot ti promet: ‘Nou pou fer tou sa ki Zeova i dir nou.’ Wi zot ti fer en promes avek Bondye. Me eski zot ti gard zot promes?