Promes Zefta

Ankor en fwa, bann Izraelit ti abandonn Zeova e konmans ador bann fo bondye. Ler bann Amonnit ti atak e lager avek bann Izraelit, sa bann fo bondye pa ti kapab fer okenn keksoz pour ed zot. Bann Izraelit ti soufer pour en kantite letan. Finalman zot ti dir Zeova: ‘Nou’n fer pese kont ou. Silvouple sov nou kont nou bann lennmi.’ Bann Izraelit ti detrir zot bann zidol e zot ti konmans ador Zeova ankor en fwa. Zeova pa ti anvi vwar zot kontinyen soufer.

En gerye ki ti apel Zefta ti ganny swazir pour gid lepep dan sa batay kont bann Amonnit. I ti dir Zeova: ‘Si ou ed nou ganny laviktwar dan sa batay, mon promet ki ler mon retourn kot mwan, mon pou donn ou sa premye dimoun ki pou sorti dan mon lakaz pour vin zwenn mwan.’ Zeova ti ekout lapriyer Zefta e i ti ed li ganny laviktwar dan batay.

Ler Zefta ti retourn kot son lakour, premye dimoun ki ti sorti pour vin zwenn li ti son fiy, son sel zanfan. I ti pe danse e bat tanbour. Ki Zefta ti fer? I ti mazin son promes e dir: ‘Ar mon fiy! Ou’n kas mon leker. Mon’n fer en promes avek Zeova. Pour gard sa promes, mon bezwen anvoy ou Silo, pour servi Zeova kot latant ladorasyon.’ Me son fiy ti dir li: ‘Papa, si ou’n fer en promes avek Zeova, ou bezwen gard li. Me mon zis demann ou pour les mwan pas de mwan dan bann montanny avek mon bann zanmi fiy. Apre sa, mon pou ale.’ Fiy Zefta ti fidelman servi kot latant ladorasyon pour larestan son lavi. Tou le lannen, son bann zanmi fiy ti al vizit li Silo.