Zeova ti donn Eliya lafors

Zezabel ti tann sa ki ti’n arive avek bann profet Baal e i ti vreman ankoler. I ti anvoy Eliya en mesaz: ‘Demen ou pou mor parey sa bann profet Baal.’ Eliya ti vreman per, i ti sove e tay dan dezer. I ti priye: ‘Zeova mon nepli kapab. Zis les mwan mor.’ Eliya ti telman fatige, alor i tonm dormi anba en pye dibwa.

En lanz ti lev li e zantiman dir li: ‘Leve e manze.’ Eliya ti vwar en dipen ron lo bann ros ki so ek en brok delo. I ti manze, bwar e i ti retonm dormi. Lanz ti lev li ankor e dir: ‘Manze. Ou bezwen annan lafors pour ariv kot ou pe ale.’ Alor Eliya ti manz ankor en pe. Apre sa, i ti rekonmans marse pour 40 zour ek 40 lannwit ziska Montanny Oreb. Laba Eliya ti antre dan en kavern e tonm dormi. Me Zeova ti koz avek li. I ti dir: ‘Ki ou pe fer la Eliya?’ Eliya ti reponn: ‘Bann Izraelit in kas zot promes avek ou. Zot in kas ou bann lotel e touy ou bann profet. La zot pe sey touy mwan osi.’

Zeova ti dir: ‘Ale e debout lo montanny.’ Premye kou, en gro diven ti soufle. Apre, i ti annan en tranblemandter ek en dife. Finalman, Eliya ti tann en lavwa dous e kalm. I ti kouver son figir avek son manto e i ti debout deor o bor sa kavern. Apre Zeova ti demann li akoz i ti sove. Eliya ti dir: ‘Zis mwan ki reste.’ Me Zeova ti dir li: ‘Ou pa tousel. I annan 7,000 dimoun Izrael ki ankor pe ador mwan. Al apwent Elisa konman profet dan ou plas.’ Deswit, Eliya ti al fer sa ki Zeova ti’n demann li pour fer. Eski ou krwar ki Zeova pou ed ou ler ou fer sa ki i demann ou pour fer? Be wi! Annou vwar en keksoz ki ti arive pandan lasesres.