Zeova i protez Zeosafat

Lerwa Zida, Zeosafat ti detrir bann lotel Baal ek zidol dan sa pei. I ti anvi dimoun i konn bann lalwa Zeova. Alor, i ti anvoy bann prens ek Levit partou Zida pour ansenny dimoun bann lalwa Zeova.

Bann nasyon dan zalantour ti per pour atak Zida akoz zot ti konnen ki Zeova ti avek son pep. Zot ti menm anmenn kado pour Lerwa Zeosafat. Me apre, bann Moabit, Amonnit e bann dimoun sorti dan rezyon Seir ti vin lager avek Zida. Zeosafat ti konnen ki i ti bezwen led Zeova. I ti fer tou bann zonm, madanm ek zanfan zwenn ansanm Zerizalenm. Devan zot tou i ti priye: ‘Zeova, san ou, nou pa pou kapab ranport laviktwar. Silvouple dir nou ki nou devret fer.’

Zeova ti reponn son lapriyer: ‘Pa bezwen per. Mon pou ed zot. Pran zot pozisyon, pa bouze e vwar konman Zeova pou delivre zot.’ Ki mannyer Zeova ti delivre zot?

Son lannmen bomaten, Zeosafat ti swazir bann santer e demann zot pour mars devan larme. Zot ti marse sorti Zerizalenm ziska en landrwa ki apel Tekoa, kot zot ti pe al lager.

Anmezir ki bann santer ti pe loue Zeova dan lazwa, Zeova ti lager pour son pep. I ti fer bann Amonnit ek Moabit sitan konfize ki zot ti konmans lager e touy kanmarad. Napa personn ki ti sirviv. Me Zeova ti protez bann dimoun Zida, bann solda ek pret. Tou dimoun dan bann pei vwazen ti tann sa ki Zeova ti’n fer e zot ti konnen ki Zeova ti ankor pe protez son pep. Ki mannyer Zeova i delivre son pep? Dan en kantite fason. I pa bezwen led bann imen pour fer li.