Lanz Zeova ti protez Ezekya

Lanpir Asiryen ti pe domin lo rwayonm sa dis tribi Izrael. Senakerib, lerwa Asiri ti anvi domin osi lo rwayonm sa de tribi Zida. I ti konmans pran bann lavil Zida, enn par enn. Me lavil ki i ti pli anvi ti Zerizalenm. Senakerib pa ti konnen ki Zeova ti pe protez Zerizalenm.

Ezekya, lerwa Zida ti donn Senakerib en kantite larzan pour ki i pa atak Zerizalenm. Menm si Senakerib ti pran sa larzan, i ti anvoy son larme pwisan pour atak Zerizalenm. Bann dimoun dan lavil ti per parski bann Asiryen ti vin deplizanpli pli pre. Ezekya ti dir zot: ‘Pa bezwen per. Bann Asiryen i for me Zeova pou fer nou pli for ki zot.’

Senakerib ti anvoy son mesaze, en Rabsake, Zerizalenm pour boufonn lepep. Rabsake ti debout an deor lavil e kriye: ‘Zeova pa pou kapab ed zot. Pa les Ezekya anbet zot. Napa okenn bondye ki pou kapab protez zot kont nou.’

Ezekya ti demann Zeova ki i pou fer. Zeova ti reponn: ‘Pa bezwen per sa ki sa Rabsake pe dir. Senakerib pa pou pran Zerizalenm.’ Apre sa, Ezekya ti ganny bann let sorti kot Senakerib. Sa bann let ti dir: ‘Zis rann zot lekor. Zeova pa kapab sov zot.’ Ezekya ti priye: ‘Silvouple Zeova, sov nou pour ki tou dimoun i konnen ki ou sa sel vre Bondye.’ Zeova ti dir li: ‘Lerwa Asiri pa pou vin Zerizalenm. Mon pou protez mon lavil.’

Senakerib ti asire ki Zerizalenm ti pou byento vin pour li. Me en zour swar, Zeova ti anvoy en lanz kot bann solda ti pe kanpe an deor lavil. Sa lanz ti touy 185,000 solda! Lerwa Senakerib ti perdi son bann solda byen for. I ti napa swa apard ki retourn kot li. Zeova ti protez Ezekya ek Zerizalenm, zis parey i ti’n promet. Si ou ti Zerizalenm sa letan, eski ou ti pou annan konfyans dan Zeova?