Zeova i anvoy Zeremi prese

Zeova ti swazir Zeremi konman en profet pour pep Zida. I ti demann li pour prese e averti bann dimoun ki zot bezwen aret fer sa ki mal. Zeremi ti dir: ‘Me Zeova, mon ankor tro zenn. Mon pa konn koze devan dimoun.’ Zeova ti dir li: ‘Pa bezwen per. Mon pou dir ou ki pour dir. Mon pou ed ou.’

Zeova ti demann Zeremi pour rasanble bann ansyen, kraz en resipyan later devan zot e dir zot: ‘Se koumsa ki Zerizalenm pou ganny kraze.’ Ler Zeremi ti fer sa ki Zeova ti dir, bann ansyen ti ankoler. En pret ki ti apel Pasour ti bat Zeremi e met son lanmen ek son lipye dan blok dibwa. Tou dilon lannwit, Zeremi pa ti kapab bouze. Pasour ti larg li son lannmen bomaten. Zeremi ti dir: ‘Mon nepli kapab tenir. Mon pou aret prese.’ Me eski i ti vreman arete? Non. Ler Zeremi ti reflesir lo la ankor, i ti dir: ‘Mesaz Zeova i parey en dife dan mwan. Mon pa kapab aret prese.’ Zeremi ti kontinyen averti dimoun.

En kantite lannen ti pase e i ti annan en nouvo lerwa Zida. Bann pret ek bann fo profet pa ti kontan mesaz Zeremi. Zot ti dir bann prens: ‘Sa zonm i merit lanmor.’ Zeremi ti dir: ‘Si zot touy mwan, zot pou touy en zonm inosan. Mon dir parol Zeova, pa mon prop parol.’ Ler bann prens ti tann sa, zot ti dir: ‘Sa zonm pa merit lanmor.’

Zeremi ti kontinyen prese e bann prens ti vreman ankoler. Zot ti demann lerwa pour met Zeremi amor. Lerwa ti dir zot ki zot kapab fer sa ki zot anvi avek Zeremi. Zot ti pran Zeremi e zet li dan en gran trou kot i ti annan labou. Zot ti krwar ki i ti pou mor ladan. Zeremi ti konmans anfonse dan labou.

Apre sa, en zofisye lakour ki apel Ebed-Melek ti dir lerwa: ‘Bann prens in zet Zeremi dan en gran trou labou! Si nou kit li laba, i pou mor.’ Lerwa ti donn lord Ebed-Melek pour pran 30 zonm avek li e tir Zeremi dan sa trou. Pa nou devret parey Zeremi ki pa ti les nanryen anpes li prese?