Gabriyel i vizit Mari

Elizabet ti annan enn son fanmir ki apel Mari ki ti reste dan lavil Nazaret, Galile. Mari ti’n fiyanse avek Zozef, en sarpantye. Ler Elizabet ti sis mwan ansent, lanz Gabriyel ti aparet avek Mari. I ti dir: ‘Bonzour Mari. Ou’n ganny laprouvasyon Zeova.’ I pa ti konpran ki Gabriyel ti pe esey dir li. Alor i ti dir li: ‘Ou pou tonm ansent e ou pou ganny en garson. Ou devret apel li Zezi. I pou vin Lerwa e son Rwayonm pou reste pour touzour.’

Mari ti dir: ‘Me mon en vyerz. Ki mannyer mon kapab ganny en zanfan?’ Gabriyel ti dir: ‘Napa nanryen ki enposib pour Zeova. Lespri sen pou desann lo ou e ou pou ganny en garson. Ou fanmir Elizabet osi in tonm ansent.’ Apre Mari ti dir: ‘Mwan mon lesklav Zeova! Ki sa ki ou’n dir i ariv mwan.’

Mari ti al dan en lavil dan montanny pour vizit Elizabet. Ler Mari ti dir li bonzour, Elizabet ti santi ki son pti baba ti’n bouze dan vant. Ranpli avek lespri sen, i ti dir: ‘Zeova in beni ou Mari. I en loner pour manman mon Senyer vin kot mwan.’ Mari ti dir: ‘Mon loue Zeova avek tou mon leker.’ Mari ti reste avek Elizabet pour trwa mwan e apre i ti retourn kot li Nazaret.

Ler Zozef ti konnen ki Mari i ansent, i ti nepli anvi marye avek li. Me en lanz ti aparet avek li dan en rev e dir: ‘Pa bezwen per pour marye avek li. I pa’n fer nanryen mal.’ Alor, Zozef ti marye avek Mari e anmenn li kot li.