Zan i prepar semen

Zan, garson Zekarya ek Elizabet, ti vin en profet ler i ti grandi. Zeova ti servi Zan pour ansenny dimoun ki Mesi ti pe vini. Me olye ansenny dan bann sinagog oubyen lavil, Zan ti pres dan dezer. Dimoun sorti Zerizalenm e partou dan Zide ti vin ekout Zan. I ti ansenny zot ki pour fer plezir Bondye, zot ti bezwen aret fer bann move keksoz. Apre ki zot ti’n ekout Zan, en kantite dimoun ti repantir akoz zot pese e Zan ti batiz zot dan Larivyer Zourden.

Zan ti viv en lavi senp. I ti met lenz ki ti’n ganny fer avek pwal samo e i ti manz sotrel ek dimyel maron. Dimoun ti anvi konn plis lo li. Menm bann Farizyen ek Sadiseen ki ti byen vantar ti vin vwar li. Zan ti dir zot: ‘Zot bezwen sanz zot fason viv e repantir. Pa bezwen krwar ki zot spesyal zis akoz zot dir ki zot zanfan Abraam. Sa pa vedir ki zot zanfan Bondye.’

En kantite dimoun ti vin kot Zan e demann li: ‘Ki nou bezwen fer pour fer plezir Bondye?’ Zan ti dir bann Zwif: ‘Si ou annan de lenz, donn enn avek en dimoun ki bezwen.’ Ou konnen akoz i ti dir sa? I ti anvi ki son bann disip i konnen ki pour fer plezir Bondye, zot bezwen kontan lezot.

Zan ti dir avek bann kolekter taks: ‘Zot devret onnet e pa vol personn.’ I ti dir bann solda: ‘Pa bezwen pran gous oubyen koz manti.’

Bann pret ek Levit ti osi vin kot Zan e demann li: ‘Lekel ou? Tou dimoun i anvi konnen.’ Zan ti dir: ‘Zis parey profet Izai ti dir, mwan menm sa dimoun ki pe kriye dan dezer, ki pe ed dimoun retourn ver Zeova.’

Bann dimoun ti kontan sa ki Zan ti pe ansenny zot. En kantite dimoun ti pe demande si Zan i Mesi. Me i ti dir zot: ‘I annan en dimoun ki pli gran ki mwan ki pe vini. Mon pa diny pour delarg son sandalet. Mwan mon batiz avek delo me li i pou batiz avek lespri sen.’