Zezi i donn manze plizyer milye dimoun

Zis avan Lapak lannen 32, bann zapot ti’n fini al anons mesaz Rwayonm dan bann lavil ek vilaz. Ler zot ti retournen zot ti fatige, alor Zezi ti anmenn zot Betsayda, kot zot ti pou kapab repoze. Me ler zot bato ti arive o bor lans, Zezi ti vwar plizyer milye dimoun ki ti’n swiv zot laba. Menm si Zezi ti anvi pas en pe letan tousel avek son bann disip, i ti byen resevwar sa bann dimoun. I ti geri bann malad e i ti konmans ansenny sa lafoul. Pandan en lazournen antye, Zezi ti koz avek zot lo Rwayonm Bondye. Me lo tar apremidi, son bann disip ti vin kot li e dir: ‘Bann dimoun i bezwen lafen. Fer zot ale pour ki zot kapab rod en keksoz pour manze.’

Zezi ti dir: ‘I pa neseser pour zot ale. Donn zot en keksoz pour manze.’ Bann zapot ti demande: ‘Ou ti a kontan nou al aste dipen pour zot?’ Filip, enn parmi bann zapot ti dir: ‘Menm si nou ti annan ase larzan, napa landrwa kot nou pou kapab aste sa kantite dipen pour sa lafoul.’

Zezi ti demande: ‘Ki kantite manze nou annan?’ Andre ti dir: ‘Nou annan senk dipen ek de pti pwason. Sa pa pou zanmen ase.’ Zezi ti dir: ‘Anmenn sa dipen ek pwason kot mwan.’ I ti demann lafoul pour asiz lo zerb par group 50 ek 100. Zezi ti pran sa dipen ek pwason, i ti get anler e priye. Apre i ti donn son bann zapot sa manze pour zot donn dimoun. Sa 5,000 zonm, ensi ki bann madanm ek zanfan ti manze vant plen. Apre sa, bann zapot ti anmas sa ki ti reste pour ki nanryen pa ganny gaspiye. I ti annan 12 pannyen plen! Sa ti enkrwayab, pa i vre?

Bann dimoun ti sitan enpresyonnen par sa mirak ki zot ti anvi fer Zezi vin zot lerwa. Me Zezi ti konnen ki i pa ti ankor ariv letan pour Zeova fer li vin lerwa. Alor i ti fer lafoul ale e i ti demann bann zapot pour al lot kote Lanmer Galile. Zot ti anbark dan zot kannot e Zezi ti al anler lo montanny li tousel. Akoz? Parski i ti anvi priy son Papa. Menm si Zezi ti annan en kantite keksoz pour fer, i ti toultan rod letan pour priye.