Pyer i dir i pa konn Zezi

Ler Zezi ti avek son bann zapot dan en lasanm anler, i ti dir zot: ‘Zot tou zot pou abandonn mwan tanto.’ Pyer ti dir: ‘Pa mwan! Menm si tou lezot i kit ou, mon pa pou zanmen kit ou.’ Me Zezi ti dir Pyer: “Avan ki en kok i sante, trwa fwa ou pou dir ki ou pa konn mwan.”

Ler bann solda ti anmenn Zezi kot lakaz Kaif, laplipar zapot ti taye. Me de zot ti swiv dan lafoul. Enn ti Pyer. I ti al dan lakour lakaz Kaif o bor dife pour sof son lekor. Dan laklerte, en servant ti vwar figir Pyer e dir: ‘Mon konn ou! Ou ti avek Zezi!’

Pyer ti dir: ‘Non, pa mwan sa, mon pa konnen ki ou pe sey dir!’ I ti al kot baro. Me en lot servant ti vwar li e i ti dir lafoul: “Sa zonm ti avek Zezi!” Pyer ti dir: ‘Mon pa ni menm konn Zezi!’ En zonm ti dir: ‘Ou enn parmi zot! Ou fason koze i montre ki ou sorti Galile, parey Zezi.’ Me Pyer ti fer serman: ‘Mon pa konn li!’

Deswit apre sa, en kok ti sante. Pyer ti vwar Zezi vire e get li. I ti mazin sa ki Zezi ti’n dir li, alor i ti al deor e plere asodlarm.

Antretan, Sannedren ti pe rasanble dan lakaz Kaif pour zot ziz Zezi. Zot ti’n fini deside pour touy Zezi me la zot ti pe zis rod en rezon pour fer li. Me zot pa ti kapab trouv nanryen kont li. Finalman, Kaif ti demann Zezi: ‘Eski ou Garson Bondye?’ Zezi ti dir: “Mwan menm.” Kaif ti dir: ‘Nou pa bezwen plis levidans. I pe koz kont Bondye!’ Lakour ti dakor: ‘Sa zonm i merit mor.’ Zot ti kalot Zezi, kras lo li, kouver son figir, tap li e dir: ‘Si ou en profet, dir nou lekel ki’n tap ou!’

Ler lizour ti fer, zot ti anmenn Zezi dan lasal Sannedren e demann li ankor: ‘Eski ou Garson Bondye?’ Zezi ti reponn: ‘Ou menm ou pe dir.’ Zot ti akiz li pour koz kont Bondye e anmenn li kot pale gouvernen Romen, Pons Pilat. Ki ti arive apre sa? Annou gete.