Bann disip i ganny lespri sen

Dis zour apre ki Zezi ti’n retourn dan lesyel, son bann disip ti ganny lespri sen. Sa ti zour lafet Lapannkot lannen 33 e bann dimoun ti’n vin Zerizalenm sorti dan diferan landrwa pour selebre. I ti annan 120 disip Zezi ki ti’n rasanble dan en lasanm anler kot en lakaz. En sel kou, en keksoz enkrwayab ti arive. I ti annan en keksoz parey en pti dife lo latet sak disip e zot tou zot ti konmans koz dan diferan langaz. I ti annan en gro tapaz, parey tapaz en tanpet divan dan sa lakaz.

Bann viziter ki ti’n vin Zerizalenm sorti dan lezot pei ti tann sa tapaz e zot ti tay kot sa lakaz pour vwar ki ti pe arive. Zot ti etonnen ler zot ti tann bann disip pe koz dan zot langaz. Zot ti dir: ‘Sa bann dimoun i sorti Galile. Me ki mannyer zot kapab koz dan nou langaz?’

Apre, Pyer ek lezot zapot ti debout devan lafoul. Pyer ti dir bann dimoun ki mannyer Zezi ti ganny touye e ki Zeova ti resisit li. Pyer ti dir: ‘Aprezan Zezi i dan lesyel dan kote drwat Bondye e i’n donn nou son lespri sen parey i ti’n promet. Sanmenm sa zot in tande e vwar sa bann mirak.’

Sa ki Pyer ti dir ti vreman tous leker bann dimoun e zot ti demande: “Ki nou devret fer?” I ti dir zot: ‘Repantir e batize o non Zezi. Zot osi zot pou ganny lespri sen.’ Sa zour, apepre 3,000 dimoun ti ganny batize. Depi sa, en kantite dimoun ti vin disip. Avek led lespri sen, bann zapot ti form plis kongregasyon pour ki zot kapab ansenny bann disip tou sa ki Zezi ti’n demann zot pour fer.