Korney i ganny lespri sen

En o zofisye larme Romen ki apel Korney ti reste Sezare. Menm si i pa ti en Zwif, bann Zwif ti respekte li. I ti pare pour ed bann pov e bann ki ti dan bezwen. Korney ti krwar dan Zeova e i ti toultan priye. En zour, en lanz ti aparet avek Korney e dir: ‘Bondye in tann ou lapriyer. Anvoy bann zonm Zope kot Pyer i reste e demann li pour vin kot ou.’ Deswit, Korney ti anvoy trwa zonm Zope ki apepre 48 kilomet dan sid.

Pandan ki zot ti ankor dan semen, Pyer ki ti Zope ti ganny en vizyon. I ti vwar bann zannimo ki bann Zwif ti napa drwa manze e i ti tann en lavwa ki ti pe dir li manze. Pyer ti refize e i ti dir: “Mon pa’n zanmen manz okenn keksoz sal e enpir.” Apre sa, sa lavwa ti dir: ‘Pa bezwen konsider sa bann zannimo enpir. Bondye in fer zot vin pir.’ Pyer ti osi ganny dir: ‘I annan trwa zonm devan ou laport. Al avek zot.’ Pyer ti al kot laport e demann sa bann zonm ki zot pe rode. Zot ti reponn: ‘Korney, en zofisye larme Romen in anvoy nou kot ou. Ou bezwen al kot li, Sezare.’ Pyer ti envit sa bann zonm pour pas lannwit kot li. Son lannmen, i ti al avek zot Sezare, ansanm avek serten frer sorti Zope.

Finalman, ler Korney ti vwar Pyer, i ti tonm an zenou devan li. Me Pyer ti dir: ‘Leve! Mwan osi mon zis en zonm parey ou menm. Bondye in demann mwan pour vin kot ou, menm si bann Zwif pa antre dan lakaz bann ki pa Zwif. Alor, dir mwan akoz ou’n fer mwan vin isi.’

Korney ti dir Pyer: ‘Kat zour pase ler mon ti pe priy Bondye, en lanz ti demann mwan pour fer ou vin kot mwan. Silvouple, ansenny nou Parol Zeova.’ Pyer ti dir: ‘Mon’n konpran ki Bondye pa fer lapreferans. I aksepte nenport ki ki anvi ador li.’ Pyer ti ansenny zot en kantite keksoz lo Zezi. Apre, lespri sen ti desann lo Korney ek tou lezot dimoun ki ti kot li e zot tou zot ti ganny batize.