En gard prizon i vin en Kretyen

Dan lavil Filip, i ti annan en servant ki ti posede par en demon. Sa demon ti fer sa fiy devinen ki pou arive dan lavenir. Sa fiy ti fer bokou larzan pour son met ler i ti predir lavenir. Ler Pol ek Silas ti al Filip, sa fiy ti swiv zot partou kot zot ti ale pandan plizyer zour. Sa demon ti fer sa fiy kriye: “Sa bann zonm i lesklav Bondye Tre O.” Finalman Pol ti dir sa demon: “Mon donn ou lord, o non Zezi Kri, sorti dan sa fiy.” Sa demon ti sorti dan sa fiy.

Ler met sa fiy ti realize ki zot ti pou nepli ganny larzan avek li, zot ti vreman ankoler. Zot ti anmenn Pol ek Silas devan bann o zofisye lavil e dir: ‘Sa bann zonm pe kas lalwa e fer en kantite dezord dan nou lavil.’ Sa bann zofisye ti donn lord ki Pol ek Silas i ganny bate e ganny mete dan prizon. Sa gard prizon ti met zot dan kaso dan fon prizon kot i pli fernwanr e met zot dan blok dibwa.

Lezot prizonnyen ti tann Pol ek Silas pe sant bann sanson pour loue Zeova. En sel kou dan milye lannwit, i ti annan en gro tranblemandter ki ti sekwe partou dan prizon. Baro prizon ti ouver, blok dibwa ek lasenn prizonnyen ti detase. Sa gard ti tay anndan dan prizon e i ti vwar ki tou bann baro ti ouver. I ti krwar ki tou prizonnyen ti’n sove alor i ti pran en lepe pour touy son lekor.

Me Pol ti kriye: “Pa bezwen fer sa, parski nou tou nou la!” Sa gard prizon ti tonm azenou devan Pol ek Silas. I ti demann zot: “Ki mon bezwen fer pour ganny sove?” Zot ti dir li: ‘Ou ek ou fanmir, krwar dan Zezi.’ Apre Pol ek Silas ti koz avek zot lo parol Bondye e sa gard prizon ek tou dimoun dan son lakour ti ganny batize.