En revelasyon pour Zan

Ler zapot Zan ti prizonnyen lo zil Patmos, Zezi ti montre li 16 portre oubyen vizyon lo bann keksoz ki pou arive a lavenir. Sa bann vizyon ti montre ki mannyer non Zeova pou ganny sanktifye, son Rwayonm pou vini e son lavolonte pou ganny fer lo later parey dan lesyel.

Dan en vizyon, Zan ti vwar Zeova lo son tronn glorye dan lesyel, antoure avek 24 ansyen dan lenz blan ek en kouronn annor lo zot latet. Lalimyer, zekler ek tapaz loraz ti sorti kot tronn Zeova. Sa 24 ansyen i tonm azenou devan Zeova e ador li. Dan en lot vizyon, Zan ti vwar en gran lafoul dimoun sorti dan tou nasyon, pep ek langaz pe ador Zeova. Sa Pti Mouton setadir Zezi i zot berze e i anmenn zot kot delo lavi. Pli tar dan en lot vizyon, Zezi i konmans dirize dan lesyel avek sa 24 ansyen. Dan en lot vizyon, Zan ti vwar Zezi pe lager avek Satan, sa dragon ek son bann demon. Zezi i tir zot dan lesyel e zet zot lo later.

Apre, Zan ti vwar en zoli portre Pti Mouton ek sa 144,000 pe debout lo Montanny Siyon. I ti osi vwar en lanz pe anvole partou lo later pe demann dimoun pour annan en gran respe pour Bondye e onor Li.

Dan en lot vizyon ankor, lager Armagedon i deklare. Pandan sa lager, Zezi ek son larme i ranport laviktwar lo Satan ek son bann demon. Dan son dernyen vizyon, Zan i vwar ki i annan lord ek lape dan lesyel ek lo later. Satan ek son desandans in ganny detrir. Tou dimoun dan lesyel e lo later i konsider non Bondye, Zeova, konman sen e ador zis li.