PWEN 8

Servi legzanp pour ansennyen

Matye 13:34, 35

KI OU BEZWEN FER: Fer ou lansennyman pli tousan par servi bann legzanp senp ki enteresan pour lodyans e ki ansenny bann pwen enportan.

Servi bann legzanp senp. Parey Zezi, servi bann senp pti keksoz pour eksplik bann keksoz konplike e bann keksoz fasil pour eksplik bann keksoz ki difisil pour konpran. Pa bezwen azout bann detay ki pa neseser akoz i pou zis fer ou legzanp tro konplike. Fer sir ki bann diferan laspe ou legzanp i al byen avek sa leson ki ou pe ansennyen pour ki ou lodyans pa konfize avek bann detay ki pa al byen avek sa ki ou pe dir.

Obzerve. Get otour ou, etidye nou bann piblikasyon e ekout bann ansenyan ki annan leksperyans. Ler ou fer sa, not bann legzanp ki ou kapab servi pour amelyor ou fason ansennyen. Anmas sa bann legzanp pour ou kapab reservi zot.
Mazin ou lodyans. Servi bann legzanp lo bann keksoz ki ou lodyans i fer oubyen i enterese avek. Fer atansyon ki ou bann legzanp pa anbaras oubyen ofans zot.
Fer resorti pwen prensipal. Donn bann legzanp ki relye avek pwen prensipal e non pa bann pti detay. Fer sir ki ou lodyans pa zis rapel ou legzanp, me osi sa pwen enportan.