PWEN 18

Ed lodyans aprann en keksoz itil

1 Korentyen 9:19-23

KI OU BEZWEN FER: Fer dimoun reflesir lo sa size koumsa zot pou santi ki zot in aprann en keksoz nouvo.

Mazin sa ki lodyans i deza konnen. Olye zis repet sa ki zot in deza tande, ed zot pour vwar sa size dan en nouvo fason.

Pas lo bann pwen ki zot deza konnen vitman, me pran plis letan ler ou pe koz lo bann nouvo nide.
Fer resers e medite. Ler i posib, enkli bann lenformasyon oubyen levennman ki zot pa tro familye avek pour eksplik bann nide enportan. Reflesir o profon lo lenformasyon ki ou bezwen prezante. Esey vwar ki mannyer sa lenformasyon i relye avek bann resers ki ou’n fer.

Anmezir ki ou prepar ou prezantasyon, reflesir lo la par demann ou lekor sa bann kestyon ‘kwa, akoz, kan, kote, lekel e ki mannyer.’ Fer ou diskour vivan par demann e reponn serten sa bann kestyon pandan ou prezantasyon.
Montre ki ou mesaz i itil. Eksplike ki mannyer bann pwen ki baze lo Labib i kapab ed ou lodyans dan zot lavi tou le zour. Koz lo bann sityasyon, pwennvi ek konportman spesifik ki aplikab pour ou lodyans.