Ki mannyer nou kapab ador Bondye dan en fason ki fer li plezir?

Parey nou ti vwar dan sa leson avan, pa tou larelizyon ki fer plezir Bondye. Me nou kapab ador nou Kreater dan en fason ki fer li kontan. Ki “kalite ladorasyon [oubyen larelizyon]” ki fer li plezir? (Zak 1:27, not) Annou vwar ki Labib i dir.

1. Lo ki nou ladorasyon i devret baze?

Nou ladorasyon i devret baze lo Labib. Zezi ti dir avek Bondye: “Ou parol i laverite.” (Zan 17:17) Serten larelizyon pa fatig zot avek sa laverite ki ganny trouve dan Parol enspire Bondye, Labib. Zot ranplas li par bann lansennyman ek tradisyon zonm. Me Zeova pa kontan ler zot “pa obei komannman Bondye.” (Lir Mark 7:9.) De lot kote, nou fer li kontan ler nou swiv Labib e ekout son konsey.

2. Ki mannyer nou devret ador Zeova?

Nou devret ador zis Zeova akoz se li ki nou Kreater. (Revelasyon 4:11) Savedir nou bezwen kontan li e ador zis li, san servi okenn zidol oubyen zimaz.​—Lir Izai 42:8.

Nou ladorasyon i bezwen “sen e akseptab” devan Zeova. (Romen 12:1) Sa i vedir ki nou bezwen obei son bann lalwa. Par egzanp, si nou kontan Zeova, nou pou osi kontan e respekte son lalwa lo maryaz. Nou pou osi evit okenn move pratik, parey fimen oubyen abiz drog ek lalkol.a

3. Akoz nou devret ador Zeova ansanm avek lezot Kretyen parey nou?

Bann renyon ki ganny fer tou le semenn i donn nou loportinite pour “loue Zeova . . . dan kongregasyon.” (Psonm 111:1, 2) En fason ki nou fer sa se par loue Bondye avek nou bann kantik. (Lir Psonm 104:33.) Zeova i demann nou pour asiste sa bann renyon akoz i kontan nou e i konnen ki sa pou donn nou lavi eternel. Ler nou rasanble ansanm nou ankouraz lezot e lezot i ankouraz nou.

AL PLI O PROFON

4. Nou pa devret ador bann portre ek stati

VIDEO: Eski Bondye i aksepte ki nou servi stati oubyen portre dan nou ladorasyon? (3:26)

• Ki ti arive dan letan Labib ler serten dan pep Bondye ti servi zidol pour ador li?

Serten dimoun i servi bann portre pour ador Bondye akoz pour zot sa i fer zot vin pli pros avek Bondye. Me an realite eski sa i kapab pe elwanny zot avek li? Lir Egzod 20:4-6 ek Psonm 106:35, 36 e apre reponn sa bann kestyon:

• Ki lobze oubyen portre ou’n vwar dimoun pe servi ler zot ador Bondye?

• Ki mannyer Zeova i santi ler i vwar dimoun servi sa bann stati oubyen portre?

• Ki mannyer ou ou santi konsernan servi sa bann stati oubyen portre?

5. Ador zis Zeova i liber nou avek bann fo krwayans

VIDEO: Laverite in liber mwan (5:16)

Lir Psonm 91:14 e apre reponn sa kestyon:

• Ki Zeova i promet pour fer pour nou ler nou montre li ki nou kontan li par ador zis li?

6. Nou ador Bondye dan bann renyon kongregasyon

Nou loue Zeova e ankouraz kanmarad par nou bann komanter e ler nou sante dan nou renyon. Lir Psonm 22:22 e apre reponn sa bann kestyon:

• Eski ou kontan sa bann komanter ki ou tande dan renyon?

• Ou ti a kontan prepare pour fer en komanter ou osi?

7. Zeova i kontan ler nou partaz sa ki nou aprann avek lezot

I annan plizyer fason ki nou kapab partaz sa laverite ki nou’n aprann dan Labib avek lezot. Lir Psonm 9:1 ek 34:1 e apre reponn sa kestyon:

• Ki keksoz ki ou’n aprann dan Labib ki ou ti a kontan koz lo la avek en lot dimoun?

REZIMEN

Nou fer plezir nou Kreater ler nou ador zis li, nou loue li dan renyon kongregasyon e nou partaz avek lezot sa ki nou’n aprann.

Revizyon

• Ki mannyer nou kapab aprann ador Bondye dan sa bon fason?

• Akoz nou devret ador zis Zeova?

• Akoz nou devret ador Bondye ansanm avek lezot e anvi fer li plezir?

FER PLIS RESERS

Dan sa zistwar “I No Longer Slave for Idols,” lir akoz en madanm ti aret servi zidol dan son ladorasyon.

“The Bible Changes Lives” (Latour Veyer 1 Zilyet 2011 an Angle)

Aprann kwa ki kapab ed ou fer komanter dan renyon kongregasyon.

“Loue Zeova dan kongregasyon” (Latour Veyer Zanvye 2019)

Vwar ki mannyer en garson ki ti vwar li difisil pour asiste renyon ti benefisye ler i ti asiste.

Zeova in pran swen avek mwan (3:07)

Bokou dimoun i asosye lakrwa avek bann Kretyen me eski nou devret servi li dan nou ladorasyon?

“Akoz Temwen Zeova pa servi lakrwa?” (Lartik lo jw.org)