Nominasyon Teokratik Bann Sirveyan Ek Asistan Ministeryel
“Vey byen zot lekor e pran swen troupo ki Sent-Espri in konfye zot konman bann gardyen.”—AKT 20:28.
1, 2. Konman ki Izai 60:22 pe akonpli?
DEPI byen lontan, Zeova ti predir ki ti pou ariv en keksoz remarkab dan letan lafen. Atraver profet Izai, i ti deklare: “Sa enn ki pti pou vin en milye, e sa enn tipti en nasyon pwisan. Mwan menm Zeova, mon pou akseler li dan son letan.”—Izai 60:22.
2 Eski i annan okenn laprev ki sa profesi pe ganny akonpli ozordi? Definitivman! Dan bann lannen 1870, en kongregasyon pep Zeova ti formen an Allegheny, Pennsylvania, U.S.A. Konpare avek sa pti group okonmansman, ozordi plizyer dizenn milye kongregasyon in fer zot laparisyon e zot pe prospere atraver lemonn. Plizyer milyon proklanmater Rwayonm—en nasyon pwisan—pe aktyelman asosye avek plis ki 91,000 kongregasyon dan 235 pei atraver lemonn. Napa okenn dout ki Zeova pa pe akseler rasanbleman son bann vre adorater avan konmansman “gran ladetres,” ki aktyelman tre pros.—Matye 24:21, NW; Revelasyon 7:9-14.
3. Ki savedir batiz “o non di-Per, di-Fis e di-Sent-Espri”?
3 Apre ki zot ti’n fer en dedikasyon personnel avek Zeova, e an armoni avek bann lenstriksyon Zezi, sa bann dimoun ti ganny batize “o non di-Per, di-Fis e di-Sent-Espri.” (Matye 28:19) Pour sa bann endividi ki’n dedye zot lavi, batiz “o non di-Per” i vedir ki zot rekonnet Zeova konman zot Papa seles e sa enn ki donn zot lavi e zot soumet anba son souvrennte. Batiz ‘onon di-Fis’ i endike ki zot rekonnet Zezi Kri konman sa enn ki’n delivre zot, e konman zot Sef ek zot Lerwa. Zot osi rekonnet ki lespri sen, oubyen lafors aktif Bondye, i zwe en rol pour diriz zot lavi. Sa i endike ki zot in osi batiz ‘onon Sent-Espri.’
4. Konman ki bann minis Kretyen i ganny ordonnen?
4 Zour zot batenm, sa bann nouvo disip ti ganny ordonnen konman bann minis Zeova Bondye. Lekel ki ti ordonn zot? Prensip sa parol dan 2 Korentyen 3:5 i osi kapab aplik pour zot: “Nou kapasite [konman bann minis] i sorti kot Bondye.” Napa pli gran loner ki zot ti a swete gannyen ki ganny ordonnen par Zeova li menm! Apre zot batenm, zot pou kontinyen progrese spirityelman konman bann minis sa “bon nouvel” osi lontan ki zot aksepte direksyon lespri Bondye e kontinyen aplik son Parol.—Matye 24:14; Akt 9:31.
Nominasyon Teokratik, Non Pa Demokratik
5. Eski bann sirveyan Kretyen ek bann asistan ministeryel i ganny swazir par en metod demokratik? Eksplike.
5 Pour arive pran swen avek bann bezwen spirityel sa gran kantite minis aktif, en bon sirveyans i esansyel delapar bann sirveyan kalifye ek bann asistan ministeryel kapab. (Filipyen 1:1) Ki mannyer sa bann zonm spirityel i ganny apwente? Metod ki ganny servi i pa parey avek bann ki Kretyente i servi. Par egzanp, bann sirveyan Kretyen pa ganny elekte par metod demokratik, setadir, par ganny lamazorite vot bann dimoun ki asosye avek en kongregasyon. Bann nominasyon i plito ganny fer par en metod teokratik. Ki savedir sa?
6. (a) Kisisa en vre teokrasi? (b) Akoz nominasyon bann sirveyan ek asistan ministeryel i teokratik?
6 Senpleman, en vre teokrasi i ganny dirize par Bondye. Bann Temwen Zeova i volonterman soumet anba son dominasyon e korpere avek kanmarad pour fer lavolonte divin. (Psonm 143:10; Matye 6:9, 10) Nominasyon bann sirveyan Kretyen, oubyen ansyen, ek bann asistan ministeryel i teokratik akoz prosedir pour rekomann e apwent sa bann zonm responsab i ganny fer dapre laranzman Bondye parey i ganny trouve dan Lekritir Sen. Byensir etan “sef lo tou,” Zeova i annan tou drwa pour determinen konman son lorganizasyon vizib pou fonksyonnen.—1 Kronik 29:11; Psonm 97:9.
7. Ki mannyer bann Temwen Zeova i ganny dirize?
7 Kontrerman avek plizyer larelizyon dan Kretyente, bann Temwen Zeova pa desid lo zot menm ki form gouvernman spirityel anba ki zot pou fonksyonnen. Sa bann Kretyen senser i sey zot mye pour reste pros avek bann standar Zeova. Bann sirveyan parmi zot pa ganny en fonksyon par en sistenm ‘kongregasyonalis,’ ‘yerarsik’ oubyen ‘presbiteryen’. Si bann eleman lemonn i sey enterfer avek lafason ki bann tel nominasyon i ganny fer, pep Zeova i refize pour konpromi. Avek rezolisyon, zot mentenir menm pozisyon ki bann zapot dan premye syek ti klerman eksprimen: “Nou devre obei Bondye plito ki zonm.” (Akt 5:29) Donk, dan tou keksoz bann Temwen i soumet zot avek Bondye. (Ebre 12:9; Zak 4:7) An swivan prosedir teokratik sa i anmenn laprouvasyon divin.
8. Ki diferans i annan ant bann prosedir demokratik e teokratik?
8 Etan bann serviter sa Gran Teokrat, Zeova, i byen pour nou kit antet diferans ant bann prosedir demokratik e teokratik. Prosedir demokratik i demann reprezantasyon egal. I souvan marke par kanpanny pour sa fonksyon e sa ki ganny vot mazoriter i ganny elekte. Dan nominasyon teokratik, nou pa servi bann prosedir parey. Sa bann nominasyon pa sorti kot zonm; ni kot en lasosyasyon anrezistre legalman. Pol ti pe aparaman refer avek son prop nominasyon konman “zapot pour bann pep,” par Zezi ek Zeova, kan i ti dir bann Galat ki i pa ti’n ganny apwente “atraver zonm, ni par en zonm, me par Zezi-Kri e par Bondye, son Papa ki’n resisit li.”—Romen 11:13; Galat 1:1.
Apwente par Lespri Sen
9. Ki Akt 20:28 i dir konsernan nominasyon bann sirveyan Kretyen?
9 Pol ti rapel bann sirveyan an Efez ki zot ti’n ganny apwente par Bondye atraver lespri sen. I ti dir: “Vey byen zot lekor e pran swen troupo ki Sent-Espri in konfye zot konman bann gardyen. Pran swen Legliz ki Bondye in gannyen par disan son prop Garson.” (Akt 20:28) Bann sirveyan Kretyen i bezwen kontinyen les zot ganny gide par lespri sen anmezir ki zot desarz zot fonksyon konman bann gardyen troupo Bondye. Si kelken ki ti pe servi dan en fonksyon nepli satisfer standar divin, avek letan lespri sen pou oper dan en tel fason ki i pou ganny retire dan son pozisyon.
10. Ki mannyer lespri sen i kapab zwe en rol sitan fondamantal dan nominasyon teokratik?
10 Ki mannyer lespri sen i kapab zwe en rol sitan fondamantal koumsa? Premyerman, sa resi ki donn bann kondisyon pour sirveyans spirityel ti ganny enspire par lespri sen. Dan son let ki i ti ekrir Timote ek Tit, Pol ti fer resorti bann kriter ki bann sirveyan ek asistan ministeryel i bezwen satisfer. An tou, i ti mansyonn 16 diferan kondisyon. Par egzanp, bann sirveyan ti bezwen napa okenn repros kont zot, modere dan zot labitid, rezonnab, byen organize, kontan ofer lospitalite, kalifye pour ansennyen, e egzanpler konman en sef fanmiy. Zot ti bezwen montre balans kan zot servi lalkol, fodre pa ki zot ti kontan larzan, e zot ti bezwen annan bon kontrol lo zot lekor. Pareyman, bann standar onivo ti ganny etabli pour apwent bann asistan ministeryel.—1 Timote 3:1-10, 12, 13; Tit 1:5-9.
11. Ki serten kalifikasyon ki bann zonm ki aspir responsabilite dan kongregasyon i bezwen annan?
11 En egzaminasyon lo sa bann kalifikasyon i montre ki sa bann ki pran linisyativ dan ladorasyon Zeova i bezwen egzanpler dan zot kondwit konman Kretyen. Bann zonm ki aspir responsabilite dan kongregasyon i devret donn levidans ki lespri sen pe oper lo zot. (2 Timote 1:14) I bezwen evidan ki lespri Bondye pe prodwir dan sa bann zonm bann fri konman “lanmour, lazwa, lape, pasyans, labonte, fidelite, ladouser, kontrol lo son prop lekor.” (Galat 5:22, 23) Sa bann fri i ganny manifeste dan lafason ki zot azir avek zot bann konpanyon Kretyen ensi ki lezot dimoun. Byensir, serten i kapab ekselan dan en serten kalite fri lespri, tandis ki lezot i kapab pli byen konble lezot kalifikasyon pour sirveyan. Toutfwa, dan zot fason viv an zeneral, tou bann ki swete ganny apwente sirveyan oubyen asistan ministeryel i devret demontre ki zot spirityel, alaoter bann legzizans Parol Bondye.
12. Lekel ki nou kapab dir i ganny apwente par lespri sen?
12 Kan Pol ti ankouraz lezot pour imit li, i ti kapab dir sa avek fransiz parski li menm i ti pe imit Zezi Kri, ki’n ‘les nou en legzanp pour nou swiv.’ (1 Pyer 2:21; 1 Korentyen 11:1) Nou kapab dir ki bann ki ranpli bann kondisyon Biblik ler zot ganny apwente konman bann sirveyan oubyen asistan ministeryel, in alor ganny apwente par lespri sen.
13. Konman ki lespri sen i ed bann ki fer rekomandasyon bann zonm pour servi dan kongregasyon?
13 I annan en lot fakter ki endike konman ki lespri sen i dirize dan rekomandasyon ek nominasyon bann sirveyan. Zezi ti dir ki nou “Papa ki dan lesyel pou donn son Lespri Sen tou bann ki demann li.” (Lik 11:13) Alor kan bann ansyen dan kongregasyon i zwenn pour rekomann kelken pour en responsabilite dan kongregasyon, zot priye ki lespri sen Bondye i gid zot. Zot baz zot rekomandasyon lo sa ki ganny site dan Parol enspire Bondye, e lespri sen i fer zot rekonnet si sa endividi ki zot pe konsidere pour apwente i satisfer bann legzizans Biblik. Bann ki fer bann rekomandasyon pa les zot ganny enfliyanse par laparans eksteryer, lakonplisman akademik, oubyen bann abilite natirel. Zot bezwen konsantre prensipalman lo si sa dimoun i en zonm spirityel, en dimoun ki bann manm kongregasyon pa ti a ezite pour aprose kan zot bezwen en konsey spirityel.
14. Ki nou aprann dan Akt 6:1-3?
14 Menm si konsey bann ansyen ansanm avek sirveyan rezyonal i rekomann bann frer pour servi konman sirveyan ek asistan ministeryel, nominasyon i vreman ganny fer dapre model ki’n ganny lese dan premye syek. En rafal, ti annan en bezwen pour bann zonm ki spirityelman kalifye okip en latas enportan. Konsey direkter ti donn sa direktiv swivan: “Swazir 7 zonm parmi zot ki annan bon repitasyon, ki ranpli avek Sent-Espri e ki annan bokou lasazes, e nou, nou ava donn zot sa responsabilite.” (Akt 6:1-3) Menm si bann zonm ki ti enplike dan sa sitiasyon ki ti fer bann rekomandasyon, se bann zonm responsab an Zerizalenm ki ti fer nominasyon. Menm metod i ganny swiv ozordi.
15. Ki rol Konsey Direkter i zwe dan nominasyon bann zonm?
15 Konsey Direkter bann Temwen Zeova i direkteman apwent tou manm lo bann Komite Brans. Kan zot pe deside lekel ki kapab pran en responsabilite byen sarze, Konsey Direkter i gard antet sa ki Zezi ti deklare: “Sa ki resevwar bokou pou bezwen rann kont bokou; e sa ki’n ganny konfye bokou par zonm pou annan plis pour rann kont.” (Lik 12:48) Apar ki apwent bann manm Komite Brans, Konsey Direkter i apwent bann ansyen dan bann Betel, ek bann sirveyan rezyonal e distrik. Sepandan, zot otoriz bann frer responsab pour fer serten lezot nominasyon pour zot. Konsernan sa, i osi annan legzanp Biblik ki nou refer avek.
‘Etabli bann Ansyen, Dapre Mon Rekonmandasyon’
16. Akoz Pol ti kit Tit an Kret, e ki sa i endike konsernan bann nominasyon teokratik denozour?
16 Pol ti dir avek son konpanyon, Tit: “Mon’n kit ou Kret pour ki ou met lord dan bann keksoz kot i fodre, e ki ou etabli bann ansyen, dan sak lavil, dapre mon rekonmandasyon.” (Tit 1:5) Apre sa Pol ti fer resorti bann kalifikasyon ki Tit ti bezwen rode dan bann zonm ki ti a kalifye pour bann tel nominasyon. Alor, denozour Konsey Direkter i apwent bann frer kalifye dan bann biro brans Lasosyete pour reprezant zot dan nominasyon bann ansyen ek asistan ministeryel. Konsey Direkter i fer byen atansyon ki sa bann ki pe akt konman son reprezantan i byen konpran e swiv bann prosedir Biblik pour fer bann tel nominasyon. Alors, se anba direksyon Konsey Direkter ki bann zonm kalifye i ganny apwente pour servi dan bann kongregasyon Temwen Zeova partou dan lemonn.
17. Konman ki en biro brans Lasosyete i okip bann rekomandasyon pour sirveyan ek asistan ministeryel?
17 Kan bann rekomandasyon pour apwent bann sirveyan ek asistan ministeryel i ganny sizere avek biro brans Lasosyete, sa bann zonm eksperyanse i depann lo lespri Bondye pour gid zot dan bann nominasyon. Sa bann zonm i santi zot responsab, zot realize ki zot pa devret prese pour enpoz lanmen lo personn, pangar zot partisip dan son bann pese.—1 Timote 5:22.
18, 19. (a) Ki mannyer serten nominasyon i ganny transmet? (b) Konman ki prosedir rekomandasyon ek nominasyon i antyerman deroule?
18 Serten nominasyon i kapab ganny transmet dan en let ki annan en stanp ofisyel lo la sorti kot en lasosyasyon legal. Sa let i kapab ganny servi pour apwent plis ki en frer dan kongregasyon.
19 Bann nominasyon teokratik i sorti kot Zeova atraver son Garson ek son lorganizasyon vizib lo later, ‘lesklav fidel e pridan’ ek son Konsey Direkter. (Matye 24:45-47) Prosedir pour rekomandasyon ek nominasyon i ganny antyerman dirize, oubyen gide, par lespri sen. Sa i leka parski bann kalifikasyon i ganny tire dan Parol Bondye ki enspire par lespri sen, e osi bann endividi ki ganny apwente i demontre laprev ki zot in prodwir fri lespri. Alors, nou kapab konsider ki bann nominasyon i ganny fer par lespri sen. Zis parey dan premye syek kot bann sirveyan ek asistan ministeryel ti ganny apwente dan en fason teokratik, ozordi i parey.
Rekonesan pour Gidans Zeova
20. Akoz nou partaz menm santiman avek David, rikorde dan Psonm 133:1?
20 Dan sa letan prosperite spirityel ek devlopman teokratik dan aktivite predikasyon, nou rekonesan ki Zeova i sa enn ki prensipalman responsab pour nominasyon bann sirveyan ek asistan ministeryel. Sa laranzman Biblik i ede mentenir parmi nou bann standar eleve ladrwatir Bondye. Deplis, lespri Kretyen ek zefor senser sa bann zonm i kontribye bokou anver nou lape ek linite merveye konman bann serviter Zeova. Parey psalmis David, nou alor santi nou pouse pour kriye: “Regarde! Konman i byen e konman i agreab pour bann frer viv ansanm dan linite!”—Psonm 133:1.
21. Konman ki Izai 60:17 pe ganny akonpli ozordi?
21 Konman nou rekonesan pour direksyon Zeova par mwayen son Parol ek son lespri sen! Vreman, sa parol rikorde dan Izai 60:17 i ranpli avek sans: “Olye kwiv mon pou anmenn lor, olye feray mon pou anmenn larzan, olye dibwa ek kwiv e olye bann ros ek feray; mon pou etabli lape konman ou bann sirveyan e ladrwatir konman bann ki donn ou latas.” Anmezir ki bann prosedir teokratik in ganny pli byen enplimante parmi bann Temwen Zeova, nou’n eksperyans sa bann benediksyon partou dan lorganizasyon teres Bondye.
22. Nou drwa nou rekonesans pour kwa, e ki nou devret determinen pour fer?
22 Nou annan en profon rekonesans pour bann laranzman teokratik parmi nou. Nou apresye bokou sa travay dir e satisfezan ki bann sirveyan ek asistan ministeryel pe fer. Avek tou nou leker, nou loue nou Papa lanmour, ki’n fer nou prospere spirityelman e beni nou en kantite. (Proverb 10:22) Annou, alor, determinen pour mars menm pa avek lorganizasyon Zeova. Pli enportan ankor, annou ansanm kontinyen servi dan linite pour onor, loue e glorifye gran non sen Zeova.
Konman Ou Ti a Reponn?
• Akoz nou kapab dir ki nominasyon bann sirveyan ek asistan ministeryel i teokratik, non pa demokratik?
• Konman ki bann zonm Kretyen responsab i ganny apwente par lespri sen?
• Ki rol Konsey Direkter i zwe dan nominasyon bann sirveyan ek asistan ministeryel?
• Akoz nou devret rekonesan an rapor avek bann nominasyon teokratik?
[Portre lo paz 9]
Bann ansyen ek asistan ministeryel i privilezye pour servi dapre nominasyon teokratik