Akoz? ‘Bondye, Akoz ou’n les sa arive?’

RICARDO i ankor rapel ler li avek son madanm, Maria, ti pe asize dan en lasanm kot dimoun i esper dokter.a Zot tou le de zot ti napa kouraz pour lir rezilta dernyen tes medikal ki Maria ti’n fer. Finalman, Ricardo ti ouver lanvlop, e zot ti get vitman vitman bann term medikal lo sa rapor. Zot ti trouv sa mo “kanser.” Omoman ki zot ti realize ki sa mo i vedir, zot ti konmans plere.

Ricardo i rapel: “Sa dokter ti vreman zantiy, me ti evidan ki i ti konnen ki sitiasyon i grav, akoz i ti kontinyen dir nou fodre nou met konfyans dan Bondye.”

Avan ki tretman ti konmanse, dokter ki ti pe tret Maria ti remark bann mouvman envolonter dan son lipye drwat. Lezot tes ki zot ti fer ti revele ki kanser ti’n propaz kot son laservel. Apre zis en semenn, tretman ti arete. Maria ti tonm dan en koma e de mwan plitar i ti mor. Ricardo i eksplike, “Mon ti kontan ki i’n aret soufer, me mon mank li sitan en kantite ki mon anvi mor mwan osi. Plizyer fwa, avek larm dan mon lizye mon demann Bondye: ‘Akoz ou’n les sa arive?’ ”

Ler Maler i arive, bokou Kestyon i ganny demande

Parey Ricardo, bokou bokou dimoun partou lo later i oblize fer fas avek konsekans ki soufrans i anmennen. Laplipar-di-tan, se bann inosan ki soufer. Mazin sa bann douler penib ki ganny koze par lager ki pe ravaz limanite zanmen fini. Oubyen konsider soufrans bokou viktim vyol, labi zanfan, vyolans domestik, ek lezot mesanste ki ganny komet par imen. Toudilon listwar, i paret ki napa en limit avek lenzistis ek douler ki zonm ek fanm in pare pour anmenn lo kanmarad. (Eklezyast 4:1-3) I osi annan bann viktim ki soufer en kantite akoz bann dezas natirel oubyen akoz maladi emosyonnel, mantal, e fizik. I pa sirprenan ki bokou dimoun i demande, “Akoz Bondye i permet bann tel soufrans?”

I pa fasil pour fer fas avek soufrans. Sa i leka menm pour bann dimoun ki annan en krwayans relizye. Petet ou osi ou’n demann ou lekor, akoz en Bondye tou pwisan ki kontan nou, i les nou soufer. Trouv en larepons satisfezan e vre pour sa kestyon troublan, i esansyel pour nou lape lespri e nou relasyon avek Bondye. Labib i reponn sa kestyon. Silvouple egzamin sa ki Labib i dir dan sa lartik swivan.

[Not anba lo paz]

[Portre lo paz 3]

Dokter ti kontinyen dir nou fodre nou met konfyans dan Bondye