“Apros Avek Bondye, e I Ava Apros Avek Zot”
Avan e Apre—I ti trouv sa Lafors pour sanze
SANDRA, en madanm ki viv Meksiko ti dir ki i ganny konsidere konman sa dernyen dimoun dan son fanmiy. Vi ki i ti ganny rezete e i pa ti ganny lafeksyon, sa ti afekte son ladolesans en kantite. I dir: “Toudilon mon ladolesans mon ti santi ki mon pa vo nanryen e mon ti annan bokou dout konsernan mon legzistans e lo lavi an zeneral.”
Ler Sandra ti dan lekol segonder, i ti konmans bwar diven ki son papa ti annan kot lakour. Avek letan, i ti konmans aste son prop boutey bwar e i ti vin en alkolik. I admet: “Mon ti napa okenn rezon pour viv.” Dan dezespwar, Sandra ti konmans servi drog. I dir: “Sel keksoz ki ti ed mwan pour oubliy mon bann problenm, se sa ki mon ti mars avek dan mon sak: en boutey bwar, detrwa pilil, oubyen en pti gin mariwana.”
Apre ki Sandra ti fini lekol lasante, son problenm bwar ti vin pli grav. I ti esey touy son lekor. Me i ti sirviv.
Sandra ti rod led spirityel ek sipor emosyonnel avek diferan larelizyon, me tousala pa ti abouti dan nanryen. Dan son dezespwar, plizyer fwa i ti dir Bondye: “Kote ou ete? Akoz ou pa ed mwan?” Son moral ti’n ariv en nivo vreman ba, kan i ti ganny en konversasyon avek en Temwen Zeova. Sa konversasyon ti devlop dan en letid Labib. Sandra ti ganny touse oprofon ler i ti aprann ki “Zeova i pre avek sa bann ki annan leker brize.”—Psonm 34:18.
Son ansennyan Labib ti ed li konpran ki Zeova i konnen ki nou annan tandans pour fer sa ki mal akoz pese ek lenperfeksyon ki nou’n erite avek Adan. Sandra ti realize ki Bondye i konpran ki nou pa kapab fer parfetman sa ki son standar drwat i demande. (Psonm 51:5; Romen 3:23; 5:12, 18) I ti kontan pour aprann ki Zeova pa konsantre lo nou bann defo e i pa ekspekte nou fer plis ki sa ki nou kapab fer. En psalmis ti demande: “Si ou ti vey bann fot, O Ya, O Zeova, lekel ki ti pou kapab debout devan ou?”—Psonm 130:3.
En laverite vreman enportan dan Labib ki ti tous leker Sandra ti sa sakrifis ranson Zezi Kri. Atraver sa sakrifis, Zeova i akord bann imen obeisan en pozisyon drwat devan Li, kantmenm zot enparfe. (1 Zan 2:2; 4:9, 10) Wi, nou kapab ganny “pardon nou pese” e alor resevwar led pour sirmont okenn santiman ki nou pa vo nanryen.—Efezyen 1:7.
Sandra ti aprann bann bon leson atraver legzanp zapot Pol. Zapot Pol ti apresye bokou ki Bondye in pardonn li son bann fot ki i ti’n fer dan lepase e siport son gran konba pour sirmont bann defo ki ti persiste. (Romen 7:15-25; 1 Korentyen 15:9, 10) Pol ti sanz son fason viv, ‘tret son lekor dir e gard li anba en kontrol sever’ pour reste lo sa semen ki Bondye ti aprouve. (1 Korentyen 9:27) I pa ti les son tandans pour fer pese annan kontrol lo li e fer li vin lesklav.
Bann febles Sandra ti fatig li, me i ti kontinyen lalit avek zot. I ti priy en kantite pour ganny led Zeova pour sirmont sa bann febles e rod son mizerikord. (Psonm 55:22; Zak 4:8) Ler i ti realize ki Bondye i enterese avek li personnelman, Sandra ti kapab sanz son fason viv. I dir: “Mon kontan ki mon pe ansenny lezot Labib aplentan.” Sandra ti ganny privilez pour ed son gran ser ek son pti ser pour konn Zeova. Vi ki i travay pour “fer dibyen,” i osi servi son konnesans lo lasante pour ede dan bann lasanble Temwen Zeova.—Galat 6:10.
Ki’n arive avek sa problenm bwar ek drog ki Sandra ti annan? Avek konfyans i dir: “Mon lespri i kler. Mon nepli bwar, fimen, oubyen pran drog. Mon pa bezwen zot. Mon’n trouve sa ki mon ti pe rode.”
[Ekstre lo paz 9]
“Mon’n trouve sa ki mon ti pe rode”
[Bwat lo paz 9]
Serten Prensip Labib ki itil
La detrwa prensip Labib ki’n ed bokou dimoun pour ganny libere avek problenm bwar ek drog:
“Annou pirifye nou avek tou sa ki sali lekor ek lespri, e fer tou pour nou vin konpletman sen an vivan avek respe devan Bondye.” (2 Korentyen 7:1) Bondye i beni bann ki’n pirifye zot lekor avek sa ki sal, e evite fer bann keksoz ki mal.
“Lakrent pour Zeova i vedir annan laenn pour sa ki mal.” (Proverb 8:13) Lakrent pour Bondye i ed en dimoun pour liber son lekor avek bann move labitid, enkli labi drog. Apard ki fer plezir Zeova, sa dimoun ki’n fer sanzman i ganny proteze kont bann maladi danzere.
“Soumet zot avek bann dirizan ek lotorite e obei zot.” (Tit 3:1) Dan bokou pei, pour posed oubyen servi serten kalite drog i en lofans kont lalwa. Bann vre Kretyen pa posed oubyen servi bann drog ilegal.