666​—Pa senpleman en Mister

“Personn pa pou kapab aste ni vann, san ki i annan sa mark, setadir, non sa bebet, ou sif ki reprezant son non. Isi nou bezwen posed lasazes. Sa ki entelizan, les li kalkil sa sif sa bebet, parski sa sif se en sif en zonm, e i 666.”—Revelasyon 13:17, 18.

SA SIF 666 ki ganny mansyonnen dan profesi konsernan non oubyen mark misterye sa “bebet,” i enn parmi bann topik dan Labib ki’n atir latansyon bokou dimoun. Lo televizyon, Internet, osi byen ki dan bann film, liv, ek magazin, mark sa bebet i topik ki dimoun in fer bokou deba lo la.

Serten i krwar ki 666 i mark bann lennmi Kris mansyonnen dan Labib. Lezot i dir ki i vedir en mark idantifikasyon ki en dimoun fodre annan, par egzanp, en tatou oubyen en konponan elektronik dan en dimoun ki idantifye li konman en serviter sa bebet. I annan lezot ki krwar 666 i mark bann lepap Katolik. Letan zot ranplas bann let dan tit ofisyel lepap Vicarius Filii Dei (Reprezantan Garson Bondye) avek bann nimero Romen e apre fer ennde sanzman, zot ganny sa sif 666. Serten dimoun i dir ki sa menm sif i kapab ganny kalkile dan non Laten Lanperer Romen Diocletian e dan versyon Ebre non Nero Sezar.a

Me sa bann enterpretasyon ki zot esey fer e ki napa en baz solid i vreman diferan avek sa ki Labib li menm i dir konsernan mark sa bebet, parey nou pou vwar dan prosen lartik. Labib i dir ki bann ki annan mark sa bebet pou sibir lakoler Bondye ler i anmenn en lafen avek sa sistenm. (Revelasyon 14:9-11; 19:20) Alors, konpran ki sa sif 666 i vedir i plis ki senpleman rezourd en mister. Erezman, Zeova, pli gran legzanp lanmour e Sours lalimyer spirityel, pa’n kit son bann serviter dan fernwanr konsernan sa topik enportan.—2 Timote 3:16; 1 Zan 1:5; 4:8.

[Not anba lo paz]