Armagedon—En Katastrof ki pou met en Lafen avek Lemonn?
ARMAGEDON! Eski sa mo i fer ou mazin en senn kot tou keksoz in ganny detri oubyen kot liniver pe eksploze e tou keksoz i an flanm? Ozordi napa bokou lezot lekspresyon dan Labib ki’n telman ganny servi dan koze toulezour ki sa mo “Armagedon.” Sa mo in ganny servi en kantite pour dekrir en lavenir sonm ki limanite pou fer fas avek. Lendistri sinema in ranpli lespri dimoun avek bann senn efreyan konsernan en “Armagedon” ki pe aprose. Mister ek bann fo konsep in maske vre sinifikasyon sa mo. Plizyer dimoun in esey eksplik sinifikasyon sa mo ki sorti dan Labib. Me laplipar sa bann leksplikasyon pa an armoni avek sa ki Labib i ansennyen lo Armagedon.
Vi ki Labib i asosye Armagedon avek “lafen lemonn,” pa ou dakor ki i enportan byen konpran ki sa mo i vreman sinifye? (Matye 24:3, King James Version) Deplis pa i fer sans pour get dan Parol Bondye, li ki pli gran sours laverite, pour konnen kisisa Armagedon e ki mannyer i pou afekte ou ek ou fanmiy?
Atraver en tel letid lo Labib, ou pou vwar ki olye en katastrof ki pou met en lafen avek lemonn, Armagedon pou entrodwir en konmansman merveye pour dimoun ki anvi viv e epanouir dan en nouvo lemonn drwat. Anmezir ki ou lir vre sinifikasyon Armagedon dan sa lartik swivan, ou pou ganny en pli bon konprenezon lo sa laverite enportan dan Labib.
[Bwat/Portre lo paz 3]
KI OU MAZINEN ARMAGEDON I ETE?
• En lager nikleer
• En dezas natirel
• En kolizyon ant later ek en lobze dan lespas
• Destriksyon bann move dimoun par Bondye